JOB 36 - Guarani Bible with DC

Eliú ombotuicha Tumpa

1Eliú jekuae imiari ye, jare jei:

2Ndepɨaguasuño cheve räri, romboeta,

echa oimeño mbae jae vaerä ndeve Tumpa regua.

3Aiporuta tuicha rupi chearakuaa,

aechauka vaerä cheApoa jaekavi ko oyapo oï vae.

4Echa mbaetɨ ko cheapu aï,

nde ndive ko oï yarakuaa katu vae.

5Mase, jae ko Tumpa tuicha vae,

ërei mbaetɨ ko oporogüɨröɨro;

imbaepuere yae ko arakuaa katu pe.

6Mbaetɨ omeeta tekove iyoa vae pe,

ërei oiporara vae ombojupi.

7Ngaraa oeya jupi vae reta;

oñonota mburuvicha guasu reta iguapɨa pe jekuae avei pegua,

jare ombotuichaukata.

8Ërei oyepokuauka karena pe yave,

jare omoäse yave jasɨ katu oï vae,

9Tumpa oechaukata chupe oyavɨgüe,

jare këraiägua oyererajauka ipɨayemboete rupi vae.

10Imiari chupe reta oyembosɨmbi vaerä,

jare jei chupe reta oyepoepɨ vaerä iyoa reta güi.

11Oendu reta yave jare omboete reta yave,

yogüɨreko kavi retata omano regua.

12Ërei mbaetɨ yave oendu reta ñee,

oyeekɨta tekove chugüi reta,

jare omanota yarakuaambae reve.

13Iyoa vae reta iyarasɨ yae,

yepe tëi tembipɨɨrɨru pe ñogüɨnoi,

mbaetɨ ave oiporu reta yemborɨ.

14Jae reta omano taɨrusu reve,

ñemomarai pe omano vae reta ipɨte pe.

15Tembiporara rupi Tumpa güɨroasayepe oiporara vae,

mbae jasɨ katu vae rupi oikuaauka chupe.

16Nde nerenoeta vi mbɨatɨtɨ güi ikavía pe,

yepi yave reyekou jeta mbae renoi vae pe.

17Nderé oyembopo jeko pɨ̈chɨi vae reta oiporarata vae,

ngaraa ndepuere reasayepe iporojäa güi.

18Jáeramo eipoɨu, agüɨye eyererajauka mbaeyekou pe,

ani korepoti jeta reipɨɨ vɨari vae rupi.

19Mbɨatɨtɨ pe, ngaraa osirive ndeve ndesapúkai,

ani opaete reyemoambeko jese vae.

20Agüɨye eipota pɨ̈tu,

jeta vae reta opa okañɨ jenda güi yave.

21Eyeandu, agüɨye eyerova ikavimbae kotɨ,

echa kuae jeko pegua reiporara.

22Mase, Tumpa tuicha ko imbaepuere pe,

mbaetɨ kia oporomboe vae ipuere omboyovake;

23mbaetɨ kia ipuere jei chupe: “Kuae eyapo”,

ani güɨröɨro iparavɨkɨ chugüi.

24Opaete vae omboete iparavɨkɨ rupi,

nemaendúa vi nde remboete vaerä.

25Opaete vae ipuere oecha jae iparavɨkɨ,

yepe tëi mombɨrɨ güi.

26Tumpa tuicha yae ko, mbaetɨ yandepuere yaikuaa opaete jesegua,

mbaetɨ vi yandepuere yaipapa iaño.

27Jae omboɨru otɨkɨ vae ɨ jɨru pe,

javoi oipoepɨ amarä.

28Ama okɨ amapɨtu reta güi,

jare oa jeta ɨ kuimbae reta re.

29¿Kia pa ipuere oikuaa amapɨtu oñemoai vae re,

ani, maera pa jɨapu ara vae?

30Mase, Tumpa omboyekuaa iama-vera amapɨtu re,

jare oeya pɨtumimbi pe ɨguasu jugua.

31Kuae reta rupi Tumpa oyangareko jeta vae reta re,

jare jeta omee tembíu.

32Amapɨtu reta pe oyasoi tembipe,

oyókuai agüɨye vaerä oesape,

jae oipota rami etei.

33Ama-rɨapu omoërakua jae oime ko oï vae,

jare ama ɨvɨtuai reve vae omombeu jae iyarasɨ mbaeyoa kotɨ vae.