ECLESIASTÉS 8 - Guarani Bible with DC

1¿Kia pa yarakuaa vae rami? ¿Kia pa, oikuaa opaete mbaembae regua vae rami? Kuimbae iyarakuaa, oyekuaa jese; mbaetɨ jova arasɨ oiko.

Mburuvicha guasu jeigüe yayapo vaerä

2Eyapo mburuvicha guasu iporookuai, echa jökorai ko reñererökuavee Tumpa jóvai.

3Agüɨye eë rai voi mburuvicha guasu jóvai güi. Agüɨye eyemoinge ikavimbae pe, echa jae ikɨ̈reɨ oyapo vae oyapota ko.

4Echa mburuvicha guasu iñee güɨnoi ko mbaepuere, jare ngaraa metei ave jei chupe: “¿Mbae pa reyapo?”

5Mborookuai oyapo vae, ngaraa maratu oiko; jare yarakuaa vae, oikuaa kërai yave jare këraita ko oyapo vae.

6Echa opaete mbaembae oime iara, kërai yave jare këraita ko oyeapo vae; echa oime mbae ikavimbae yae vae kuimbae pe,

7jae ko mbaetɨ oikuaa mbae ra oasata vae jare kërai yave ko oasata vae, ¿kia pa omombeuta chupe?

Metei ave mbaetɨ güɨnoi mbaepuere tekove re jare mano re

8Mbaetɨ kia güɨnoi mbaepuere tekove re oyopia vaerä, mbaetɨ vi kia ave güɨnoi mbaepuere mano re. Mbaetɨ kia ave ipuere ojoyepe kuae mbaesusere güi. Iyoa vae ave, jeko ngaraa güɨroasayepe.

9Opaete kuaekuae aecha, añeñono ramboeve aikuaa vaerä opaete mbaembae kuae ɨvɨ pe oyeapo vae, jare kuimbae güɨnoi mbaepuere ïru reta re vae rupi oyapo ikavimbae iyeupe.

Oime mbaembae jupimbae vae

10Jaeramiño aecha vi kuimbae reta ipɨapochɨ yae vae omano yave, oñotɨ reta mboromboete rupi kavi; ërei ngatu oapeko tupao vae jare jupigüe oyapo tëta guasu pe vae güi ñakañɨ reta. Kuaekuae mbaeä etei vi ko.

11Echa mbaetɨ oñejäa voi oiporara vaerä jókuae ikavimbae iyapoa ramo, kuimbae reta oyemongeta oyapo vaerä ikavimbaeño.

12¡Yepe tëi iyoa vae, jeta iyoa reve oikopuku! Ërei che aikuaa vae, jae ko, yogüɨreko kavita Tumpa güiño oipoɨu vae, jaeño omboete vae;

13jare iyoa vae reta ngaraa yogüɨreko kavi, ngaraa ɨma año yogüɨreko, metei küaraɨa ramiñota; Tumpa güi mbaetɨ oipoɨu reta jeko pegua.

14Kuae ɨvɨ pe oime mbaetɨ mbae jupi rupi oyeapo vae, jae ko kuimbae jupi vae oiporara teko kavimbae oyapo rami, jare kuimbae jeko kavimbae oiko kavi jeko kavi vae rami.Sal 73; Jer 12.1-4; Hab 1.2-4,12-17. ¡Che jae kuae mbaeä etei vi ko!

15Jáeramo chevegua, yerovia ko jae ikavi yae ete vae. Ikavi yae ete kuimbae oyapo vaerä kuae ɨvɨ pe vae jae ko, okaru vaerä jare jou vaerä vino jare oyerovia oiko vaerä, echa jaeño ko jókuae iparavɨkɨagüe jekovia, opaete ara Tumpa omee tekove chupe ramboeve kuae ɨvɨ pe.

16Che jeiete añeñono aikuaa vaerä arakuaa jare aecha vaerä opaete kuae ɨvɨ pe oyeapo vae, echa oime amogüe mbaetɨ etei oyembojopeɨ kërai ave yepe ara pe ani pɨ̈tu rupi,

17jare aecha opaete Tumpa jembiapo reta kuimbae mbaetɨ ipuere oikuaa opaete mbaembae kuae ɨvɨ pe oyeapo vae, yepe tëi jeta oyemoambeko oikuaa vaerä, ërei ngaraai ipuere oikuaa; yepe tëi yarakuaa vae jei: “Che aikuaa”, ërei ngaraai ko oupitɨ.