JEREMÍAS 41 - Guarani Bible with DC

Gedalías imano(2 R 25.25-26)

1Chiúa yasɨ pe, Ismael, Netanías taɨ, Elisama jɨmɨmino, mburuvicha iñemuña pegua, ojo Mizpa pe oñoväe vaerä Gedalías, Ahicam taɨ ndive, ojo payandepo kuimbae ndive. Jare jókuae Mizpa pe okaru päve ñogüɨnoi ramboeve,

2Ismael, Netanías taɨ jare jókuae payandepo kuimbae opüa aramoete pegua jare kɨsepuku pe oyuka reta Gedalías, Ahicam taɨ, Safán jɨmɨmino, jókuae mburuvicha guasu Babilonia pegua oñono Judá pe oeya tëta juvicharä vae.

3Ismael oyuka vi opaete Judáɨgua reta jare sundaro Caldeaɨgua reta ñogüɨnoi Gedalías ndive Mizpa pe vae.

4Pɨareve pe, Gedalías oyuka güire, ndei vɨteri kia oikuaa mbove,

5yogüeru oväe Siquem güi, Silo jare Samaria güi ochenta kuimbae; kuae reta opa jovaraa oñapi güeru, jare jemimonde reta osoro jare jete reta opa ombopere güeru. Güeru reta temitɨ jäɨgüe jare ikäti kavi vae incienso, güɨraja reta vaerä yandeYa itupao pe.

6Jayave Ismael, Netanías taɨ oë oövaiti Mizpa güi oyaeo reve ojo tape rupi. Oövaiti ma yave jei chupe reta:

—Peyu pemae Gedalías, Ahicam taɨ re.

7Ërei ngatu tëta guasu mbɨte pe ma yogüeru yave, Ismael jare jupiegua kuimbae reta oñaseokɨ̈ti jare omombo reta ɨrɨru pe.

8Ërei, jókuae kuimbae reta güi, payandepo jei Ismael pe:

—Agüɨye oreyuka; ore reta oime rogüɨnoi trigo, cebada, olivo iasaite jare ei, oime oñeomi oï ko pe.

Jayave Ismael mbaetɨ oyuka reta iñeïru reta rami.

9Jókuae ɨrɨru pe Ismael omombo opaete oyukagüe jëogüe vae, jae ko mburuvicha guasu Asa oyapouka vae, Baasa mburuvicha guasu Israel pegua güi oyeepɨ vaerä yave vae.1 R 15.16-22. Jae ko ɨrɨru tuicha yae vae, ërei Ismael omotɨnɨe tëogüe pe.

10Oipɨɨ vi mburuvicha guasu tayɨ reta jare Mizpa pe opɨtagüe reta, Nabuzaradán sundaro omaeäro vae juvicha omee Gedalías, Ahicam taɨ ipo pe vae. Ismael opa oipɨɨ jare yogüɨraja oasa reta vaerä Amón iñemuña reta iɨvɨ kotɨ.

11Johanán, Carea taɨ, jare sundaro juvicha reta ñogüɨnoi jae ndive vae oikuaa yave jókuae yoyuka, Ismael, Netanías taɨ oyapogüe,

12omboatɨ reta opaete isundaro reta jare opa yogüɨraja oñeraro jae reta ndive. Oväe reta chupe ɨrɨru guasu Gabaón2 S 2.13. pe oïa pe.

13Ismael oipɨɨ güɨraja vae reta oecha yogüeru yave Johanán jare opaete sundaro juvicha reta, oyerovia yae reta.

14Jare opa oyerova reta yogüɨraja oñemoïru Johanán ndive.

15Ërei Ismael, Netanías taɨ jare juri kuimbae jae ndive ñogüɨnoi vae, opa otekuarai Johanán güi jare yogüɨraja Amón iñemuña reta iɨvɨ pe.

16Javoi Johanán, Carea taɨ jare sundaro reta juvicha reta jae ndive ñogüɨnoi vae ipo pe opɨta opaete Ismael, Netanías taɨ güɨraja tëi Mizpa güi Gedalías oyuka güire vae reta; jae ko: Sundaro reta, kuña reta, michia reta jare oyeapiaogüe reta. Johanán opa ye güeru Gabaón güi.

17Ñogüɨnoe reta tape pe yogüɨraja regua oväe reta Gerut-quimam pe, Belén güi köiño oï vae pe, joko pe opɨta reta. Iyemongeta reta ko, jae yogüɨraja reta vaerä Egipto kotɨ,

18otekuarai reta vaerä Caldeaɨgua reta güi, echa okɨɨye yae reta chugüi, Ismael oyuka Gedalías jeko pegua, jae ko mburuvicha guasu Babilonia pegua oñono tëi tëta juvicharä oeya vae.