1Remondoro yave mona ara, javoi regüeyɨ,
nderóvai opata ko tɨkui ɨvɨtɨ reta,
2tata jaku rai yae vae mbae omondɨkui vae rami,
tata ombopupu ɨ vae rami.
Jayave nderovaicho reta ndekuaata,
jare tëtaguasu reta orɨrɨita nderóvai.
3Reyapo yepi mbae tuichagüe,
ore mbaetɨi royemongeta vae,
regüeyɨ yave ɨvɨtɨ reta opa tɨkui nderóvai.
4Mbaetɨi oyeendu kuae nunga,
mbaetɨi oyeecha Tumpa nde rami vae,
kërai oyapo avei mbaembae, jese güɨrovia vae reta peguarä vae.
5Nde remboresive jókuae ipɨakatu reve kavi oyapo mbaejupi vae,
jare imaendúa nde ndepɨa jemimbota oyapo vaerä vae reta.
Nde ndearasɨ oreve, echa oreyoa;
ɨma yae rupi ma roiko mbaeyoa rupi,
¿roasayepe vɨteriñota ra?
6Opaete ore reta ko mbae ikɨa vae rami,
orerembiapo kavi reta, tarapo ikɨa vae rami ko ndeve;
opaete ore roa, ɨvɨra joo oa rami,
jare orerembiapo kavimbae reta orereraja,
ɨvɨtu güɨraja mbae rami.
7Mbaetɨ metei ave oyerure ndekotɨ vae,
mbaetɨ metei ave imaendúa oyeko vaerä nderé;
jáeramo orereeya,
orereeya orepiru vaerä ñana rami, orembaeyoa reta pe.
8Ërei oreYa, nde ko jae oreRu;
ore ko ñaeu,
nde ko jae oreapoa;
¡nderembiapo ko opaete ore reta!
9OreYa, agüɨye ndearasɨ yae,
agüɨye vi nemaendúa avei oreyoa reta re.
¡Mase, ndembae vae ko opaete ore reta!
10Tëta ndembae oñeñono tee vae ipombae oï,
Sión ipoä oï,
Jerusalén kïrii ngatu opɨta.
11Orembaemboetea ikavi yae vae,
oreñemuñagüe reta pɨpe ndemboete yepi vae,
opa oyemboai tata pe.
¡Opaete mbaembae roaɨu yae yepi vae, opa oyemboai!
12OreYa Tumpa, opaete kuae mbaembae oasa reve ¿mbaetɨta ra mbae reyapo?
¿Nekïriiñota ra, jekuaeñota ra orembopɨatɨtɨ yae?
Who We AreWhat We EelieveWhat We Do
2025 by iamachristian.org,Inc All rights reserved.
