JOB 17 - Guarani Bible with DC

1Chepɨ̈rata opa ojo oiko chegüi,

ara reta opa ojo oiko chegüi,

tɨvɨa cheräro oï.

2Cheɨpɨ pe jaeño ma ñogüɨnoi oporoyóyai yóyai vae;

jae reta iporombopɨatɨtɨ mbaetɨ osɨrɨ chegüi.

3CheTumpa, nde ndepuere chemborɨ,

echa, ¿kia pa ikɨ̈reɨta chemborɨ?

4Echa kuae reta güi repɨ̈ro arakuaa,

jáeramo, agüɨye emaeño toyembotuicha reta.

5Ivɨa-ïru ombotavɨ vae reta,

taɨ reta yogüɨrekota susere rupi.

6Tumpa cheñono, opaete vae imiari vaerä chekotɨ,

jae reta jóvai aiko kia ondɨvɨ jova re vae rami.

7Cheresa jäve mbae jasɨ jeko pegua,

cherete oasa küaraɨa oasa rami.

8Jupi vae reta oecha yave omopɨakañɨ.

Jekombae vae reta opüata iyoa vae reta re.

9Jupi vae reta ojota tenonde,

ikavi oyapo vae oñemoïruta ipɨ̈rata.

10Ërei pe reta peyu ye,

jare mbaetɨta aväe pepɨte pe metei ave yarakuaa vae.

11Ara reta oasa ojo oiko chegüi,

ayemongeta tëi ayapo vaerä vae opa oikomegua chegüi.

12Pe reta pere pɨ̈tu pe: “Ara ko oï”,

ani “pɨtumimbi opata ma, tembipe köi yae ma ou.”

13¿Mbae ye pa aärota? Omanogüe reta ñogüɨnoia ko jae chero,

ayapo kavita cheruparä pɨtumimbía pe.

14Tɨvɨa pe jae: “Cheru ko nde.”

Taso reta pe jae: “Chesɨ jare chereindɨ ko nde.”

15Jayave, ¿ketɨ pa oime aäro vae,

jare kia pa oikuaa mbae cheräro vae?

16Omanogüe reta ñogüɨnoia pe ajata,

kuae aäro tëi vae ndive aputuuta ɨvɨkúi pe.