1Che jae: “Tayangareko chereko re,
agüɨye vaerä cheyoa cheñee rupi,
tayeyuruopɨ, jeko kavimbae reta ñogüɨnoi ramboeve cheróvai.”
2Mbaetɨ amoë cheñee, kïrii apɨta,
¡jupi vae re ave mbaetɨ chemiari!
Jáeramo mbae jasɨ jeiete cheve.
3Ërei ¡cheɨvɨte pe jakuvo!
Chepɨa pe ayemboakuvo,
jare jae cheñeeäta reve:
4“CheYa, eikuaauka cheve cherekove iyapɨ,
mbovɨ ara ra aikoveta aiko vae,
¡taikuaa cheyegua michi peguaño aikota vae!
5Remee cheve mbovɨ araño aikove aiko vaerä,
cherekove mbaeä etei ko ndeve,
¡añetete opaete kuimbae oikove vae mbaeä etei ko!
6¡Añetete opaete kuimbae oasa küaraɨa ramiño!
Añetete oyemoambekoiño ma,
omboatɨ mbatee mbaeyekou vae, mbaetɨ oikuaa kia imbaerä ko vae.
7Añave cheYa, ¿kia re pa aärota?
¡CheYa, ndereño ko cheporoäro!
8Chereepɨ opaete ayapombae ndeporookuai vae güi;
agüɨye cheñono cheyóyai yóyai vaerä yarakuaambae reta.
9Chekïrii, mbaetɨ cheñee amoë,
echa nde ko opaete mbae reyapo.
10Eekɨ chegüi reiporarauka cheve vae;
cheyukata ma ndepo reñono cheré vae.
11Kuimbae rembosɨmbi tembiporara rupi mbaeyoa güi,
kupii mbae omboai rami,
remboai jae oaɨu yae vae.
¡Añetete mbaeä etei ko kuimbae!
12CheYa Tumpa, eendu cheyerure,
¡eyeapɨsaka asapúkai ndeve vae re!
¡Agüɨye emaeiño tayaeo!
Echa che, oguataiño vae rami ko ndeve,
oguataiño vae cheñemuñagüe reta rami.
13Emaeño mo cheré, tachepɨ̈rata ye,
ndei amano mbove.”
Who We AreWhat We EelieveWhat We Do
2025 by iamachristian.org,Inc All rights reserved.
