1Mburuvicha guasu Nahas Amón iñemuña pegua oporepeña tëta Jabes Galaad pegua re jare opa ojo oyembojeyupa reta. Ërei opaete Jabes pegua reta jei Nahas pe:
—Eyapo ñemoïru ore ndive, jare toroyeokuai ndeve.
2Jare Nahas jei chupe reta:
—Pemaeño aekɨ peresäɨ peakatu kotɨgua yave, tayapo ñemoïru pe reta ndive, jökorai amomarai vaerä Israel iñemuña reta.
3Jayave Jabes pegua tenondegua vae reta jei:
—Emee oreve chiu ara orepuere vaerä romondo ñee jerajaa reta opaete ɨvɨ Israel rupi; jare mbaetɨ yave kia orereepɨ vaerä, toroñemee ndepo pe.
4Jare ñee jerajaa reta yogüɨraja oväe Gabaa pe Saúl oikoa pe, jare omombeu reta ñee jókuae tëta pe. Opaete vae jäse oyaeo kuae oendu yave.
5Jökorai ñogüɨnoi yave Saúl ou oiko iko güi igüeye reta jaɨkue jare oparandu:
—¿Maratu pa yogüɨreko vae? ¿Maera pa oyaeo reta?
Omombeu reta chupe kuimbae reta Jabes pegua iñee.
6Saúl oendu yave kuae ñee reta, Tumpa iEspíritu ogüeyɨ jese mbaepuere ndive, jare täta yae iyarasɨ.
7Oipɨɨ oyuka mókoi güeye jare opa oyasɨa sɨa, jare omondo opaete Israel iɨvɨ rupi ñee jerajaa reta ndive jei reve: “Köraita oyeapo igüeye jókuae ñäteɨ oñemoïru che ndive jare Samuel ndive vae.”
Jare Tumpa ombou kɨɨye opaete re, jare metei rami tëta ñogüɨnoe oñemoïru jae reta ndive.
8Jare opaete reve oyomboatɨ Bezec pe tresciento mil kuimbae Israel kotɨgua, jare treinta mil kuimbae Judá kotɨgua.
9Jare jei jókuae ñee jerajaa yogüeru ñee omombeu vae reta ndive:
—Körai pere Jabes pegua reta pe Galaad pe: “Pɨareve kuaraɨ ara mbɨte yave poepɨta.”
Ñee jerajaa reta yogüɨraja jare omombeu Jabes pegua reta pe, jare jae reta täta oyerovia.
10Jare Jabes pegua reta jei tovaicho Nahas pe.
—Pɨareve roñemeeta ndepo pe, javoi eyapo oreve reyemongeta jaekavita ndeve vae.
11Jare pɨareve pe, Saúl oyapo mboapɨ yemboyao sundaro reta, jare ndei köe mbove oike reta jovaicho reta jeyupa mbɨte pe, jare oyuka Amón iñemuña reta kuaraɨ ara mbɨte regua. Jare jembɨregüe reta opa otekuarai, oñemoai jae jae aeño, mbaetɨ opɨta päve vae.
12Jayave opaete vae jei Samuel pe:
—¿Kia reta pa jei: “Oikota ra Saúl yanderuvicha guasurä”? Emee orepo pe jókuae kuimbae reta, opa toroyuka.
13Ërei Saúl jei chupe reta:
—Kuae ara mbaetɨ eteita kia omano, echa kuae ara yandeYa ko güɨroasayepe Israel iñemuña reta, jovaicho reta güi.
14Jayave Samuel jei opaete vae pe:
—Peyu yaja Gilgal pe, joko pe yamboɨpɨ mborookuaía.
15Jare opaete vae yogüɨraja Gilgal pe, jare joko pe omboguapɨ reta Saúl mburuvicha guasurä. Javoi omee reta mɨmba oyeyukagüe yembopɨakatu pegua yandeYa pe, jare joko pe Saúl jare opaete Israel iñemuña reta oyerovia yae reta.
Who We AreWhat We EelieveWhat We Do
2025 by iamachristian.org,Inc All rights reserved.
