2 MACABEOS 6 - Guarani Bible with DC

Oporogüɨrovia vae reta imotareɨ jare tumpa-ranga imboete(1 Mac 1.41-64)

1Mbovɨ ara ma oasa yave, mburuvicha guasu omondo metei tenondegua Atenas pegua oyavɨuka vaerä judío reta pe iyɨpɨ reta iporookuai guasu jare omopüa vaerä teko ïkotɨa Tumpa iporookuai güi,

2ñemomarai pe oeya vaerä tupao Jerusalén pegua, echa omboguapɨ tumparä Zeus Olímpico jee vae, jare tupao ɨvɨtɨ Guerizim pegua oiko vaerä Zeus ipɨakavi vae jorä, jokuaeɨgua reta oiporu rami.

3Opaete vae jókuae tëta pe jorɨ katu jare yavai omomara vaerä kuae teko pɨ̈chɨi reta.

4Teko kavimbae jare arete pɨ̈chɨi vae jɨrurä oyapo reta tupao, itumpa ambuae vae reta iyapirai kuña jeko kaviä vae ndive jare oyopɨɨ reta mbaemboetea renda rupi kuña mbokere reta ndive. Güɨroike reta vi tupao japɨpe pe mbaembae reta mbaetɨta tëi oï joko pe vae,

5mɨmba oyeyuka oyeapɨ jese vae iárambo omboyoa reta mɨmba, mborookuai guasu oyopia mbotarä vae.

6Mbaetɨ ara mbutuu oyemboete, jaeramiño vi arete oiko ñomai vae reta, jare amogüe reta imara etei ma oyembojee judío pe.

7Opaete vae pe jouka reta mɨmba yasɨ ñavo oyeyuka omboarete vaerä mburuvicha guasu iara pɨpe vae, tupao Baco iyarete yave, omboguatauka reta vi kuae tumpa jaɨkue jare oñonouka reta iñäka re temitɨ hiedra jee vae joogüe.

8Mbaetɨ Tolemaidaɨgua retaño ikɨ̈reɨ körai yogüɨreko, jáeramo oyapouka reta ñee opaete tëtaguasu reta Grecia pegua rupi ñogüɨnoi judío reta vae, jou vaerä vi jókuae mɨmba reta oyeyuka morogüɨrökuaveerä vae.

9Mbaetɨ yave kia oyapo griego reta jeko, jaema voi oñeaseokɨ̈ti. Opaete kuae oechauka ko maemegua guasu oyearo ma ko vae.

10Jökoraiño vi, güɨraja reta mókoi kuña reta mburuvicha jóvai imembɨ reta oñemokañɨmaa ramo, güɨroata reta jeta vae jókuae tëta guasu rupi imembɨ ovoɨ reve reve, joko güi oitɨ reta oguambɨ guasu iyapɨte güi.

11Ɨvɨkua rupi oyapo ara mbutuu iara omboete vae reta, jërakua Filipo pe yave, opaetei oipɨɨuka reta, echa ara mbutuu iara omboete reta ramo mbaetɨ etei oyeepɨ reta jovaicho güi.

12Ayókuai kia ñavo omongeta kuae tembikuatía, agüɨye tipɨatɨtɨ, echa kuae ñenupa ou ko tëta ombosɨmbi vaerä, mbaetɨ ko omokañɨtei vaerä,

13echa Tumpa mbaetɨ oñemoïru mbaeyoa iyapoa reta ndive, jaeñoma järeaño oiporaraukata chupe,

14ïru tëta guasu reta oinupa vaerä, yandeYa ipɨaguasu oäro reta iyoa tɨnɨe regua, ërei yande ko,

15ñanenupa oï ndei yandeyoa jeiete mbove.

16Echa jae mbaetɨ iporerekua poi yandegüi, yayembosɨmbi maemegua rupi, jae mbaetɨ yandereeya.

17Jaekaviño ma ko pomomaendúa kuae re, yaeya räri kuae pe kuae regua miari, ërei yaasa ïru yemongeta yayapo.

Eleazar jembiporara

18Eleazar, jae ko mborookuai regua oikuaa katu yae vae, jare omboete yae jëtaɨgua reta vae, ñäteɨ reve opopira chugüi reta iyuru, oipota tëi omee reta jou kuchi isoo.

19Ërei jae, ombotenonde iyeupe mano, tekove güi, jáeramo oguata manorenda kotɨ,

20echa opa ondɨvɨ soo. Oyapo paravete opaete yaaɨu vaerä vae ombosɨrɨ iyeugüi vae reta rami, yepe tëi jekove oaɨu.

21Tembíu mborookuai guasu oyopia vae jouka vae reta, jare oipokuaa ñomai kuae kuimbae vae reta, güɨraja tëi ikatu kotɨ jei chupe güeruruuka vaerä iyeupe jëta güi tembíu ikavi vae, jou jaanga vaerä oyeapo jókuae soo mbaeyuka pegua mburuvicha guasu oporookuai jese vae,

22echa jayave ñoi oasayepeta mano güi, jökorai omoñera tëi kuae oñochëi jae ndive vae reta oepɨ vaerä.

23Ërei Eleazar, oyembopɨa-kɨ̈reɨ oyapo vaerä jupi vae okuakuaa ramo, indechi jare iñäka morotï omboete ramo mborookuai omboete ramo jei: “Cheyukaño mo ɨmambae.

24Ngaraa ko chendechi reve ipöra aikuaku aiko mbae, maera pa taɨrusu reta pe aechaukata aiko, cheti, Eleazar cheré vae, noventa año pe, apia aiko mborogüɨrovia güi vae.

25Chendechi pei pa ko cheaputa aiko jae reta arakae yave chereko rupi ombaeyavɨ vaerä yogüɨreko, jáeramo tome tayembogüɨ jare tañemoamɨriuka chendechi pei.

26Echa yepe tëi ndipo añave aasayepe mbɨa reta iporonupa güi, ërei Tumpa imbaepuere vae ipo güi ko ngaraaí aasayepe.

27Jáeramo, taeya kuae tekove, chendechi kavi aechauka vaerä amano,

28jare opaete taɨrusu reta tomae cheré, opaete vae, jókuae oïti ma omano vaerä mborookuai guasu re vae reta vi.”

Opa kuae ñee ojäa yave, oguata mano renda kotɨ.

29Jeroataa reta oendu yave iñee, jeiete ete iyarasɨ reta,

30ërei Eleazar ñenupa pe omanota ma yave jei: “YandeYa oikuaa katu oikuaa katu cheve jëgua tëi aasayepe vaerä, ërei añave tuicha aiporara aï ñenupa; ërei aikuaa katu vi aiporara aï oyerovia katu reve mbaemboete anoi ikotɨ ramo.”

31Jökorai yave omano, jare jókuae rupi oechauka jäta ngatu taɨrusu reta pe jare opaete tëta pe, jáeramo ngaraaí iñakañɨ chugüi vae.