ESDRAS 1 - Guarani Bible with DC

Ciro omee mborookuai vae(2 Cr 36.22-23)

1Tenondegua año Ciro omboɨpɨ oï mburuvicha guasurä Persia pe yave, oyembopo vaerä yandeYa iñee Jeremías2 Cr 36.21; Jer 25.11; 29.10. rupi omombeu vae. YandeYa oñono Ciro mburuvicha guasu Persia pegua ipɨa pe omoërakuauka vaerä mborookuai ñee rupi jare tupapire rupi opaete iporookuaía rupi, jei reve:

2“Ciro mburuvicha guasu Persia pegua jei körai: ‘PeYa Tumpa ara pe oï vae omee chepo pe opaete mborookuaía reta ɨvɨ pegua, jare cheokuai amopüa vaerä chupe tupao Jerusalén pe,Is 44.28; 45.1-4. ɨvɨ Judá pe.

3Jayave oipotagüe pegüi reta jókuae ɨvɨ pegua, peYa Tumpa imbae vae, jae tapemborɨ, jare pekua Jerusalén kotɨ, ɨvɨ Judá pe, jare pemopüa pɨau ye tupao peYa, Israel Tumpa pe (jae ko Tumpa ete), Jerusalén pe oï vae.

4Jare opaete jembɨregüe ketɨ ketɨ rupi ñogüɨnoia pe, joko pegua reta tomborɨ korepoti pe, oro pe, mbaembae pe jare mɨmba pe, jare mbota pɨa-kɨ̈reɨ ngatu reve oñemee vae güɨraja reta vaerä Tumpa jo peguarä, Jerusalén pe.’ ”

Israel iñemuña reta oyerova ye Jerusalén kotɨ

5Jayave oyupavo Judá jare Benjamín iñemuña itenondegua reta, sacerdote reta jare levita reta, opaete jókuae Tumpa omokɨ̈reɨ ipɨa pe yogüeru ye vaerä omopüa yandeYa jo vae reta, Jerusalén pe.

6Jare opaete iyɨ́vɨri yogüɨreko vae reta omborɨ korepoti pe, oro pe, mbaembae pe jare mɨmba reta pe, mbaembae ikavi jare jepɨ vae pe, jare vi opaete mbota ipɨa-kɨ̈reɨ ngatu reve omee chupe reta vae.

7Jare mburuvicha guasu Ciro güɨnoe opaete tembiporu reta tumpa-raanga2 R 24.13; 25.13-16; 2 Cr 36.10,18. reta jo güi, Nabucodonosor güɨraja Jerusalén güi yandeYa jo güi vae.

8Ciro mburuvicha guasu Persia pegua oyókuai Mitrídates mbae iñovatúa, jare jae güɨnoe oipapa omee Sesbasar mburuvicha Judá pegua pe.

9Jae kuae oyepapagüe reta: Treinta tasa guasu oro pegua, mil jara tasa guasu korepoti pegua, veintinueve kɨse,

10treinta tasa oro pegua, cuatrociento diez tasa korepoti pegua, jare ïru mil tembiporu reta.

11Ërei opaete reve ko tembiporu oro pegua jare korepoti pegua oupitɨ cinco mil cuatrociento. Opaete kuae tembiporu reta opa ye güeruruka Sesbasar, iɨvɨ güi oyererajauka vae reta ndive, yogüeru ye yave Babilonia güi Jerusalén pe.