TOBIT 4 - Guarani Bible with DC

Tobit iporomboarakuaa

1Jókuae ara voi Tobit imaendúa korepoti Gabael oñovatu oeya Ragues Media pe vae re,

2jare jei iyeupe: “Che ko mano aiporu aiko. ¿Maera ra aenɨiä cheraɨ Tobías jare chemiari jae ndive kuae korepoti re ndei amano mbove?”

3Jaema jayave oenɨi taɨ Tobías, jare jae ou oväe yave jei chupe: “Cheraɨ, amano yave, cheötɨ kavi kuri. Omboete ndesɨ. Agüɨye eya eiko metei ara ave oikove oiko ramboeve. Emee chupe oipota vae, jare agüɨye mbae ere eiko chupe.

4Nemaendúa katu, cheraɨ michi, jeta ko ikavimbae rupi oasa jɨe pe reiko yave. Jaema jae omano yave, cheɨpɨ pe eñotɨ kuri cherɨvɨa oïa pe.

5Jare agüɨye neakañɨ Tumpa güi, reikove reiko ramboeve. Agüɨye eyapo eiko mbaeyoa reipota reve, jare eyapo iporookuai. Eiko mboromboete rupi, ara ñavo jare agüɨye ekua ikavimbae jape rupi.

6Reyapo kavi mbae yave, opaete mbae reyapogüe oë kavita ndeve.

7Jare jökoraita vi oiko opaete mboromboete oiko vae.

Emee mbota renoigüe güi. Jare mbota remee yave, agüɨye emee neräkateɨ reve. Reecha kia paravete vae yave, agüɨye neäteɨ emborɨ. Jayave ko Tumpa ngaraa vi mbae oikuaku ndegüi.

8Emee mbota mbae renoi rupi, jeta renoi yave, jeta vi emee, jare michi renoi yave agüɨye ekɨɨye emee, jókuae mbovɨ renoi vae güi.

9Jökorai reyapo yave reñovatu ko reï ndeyeupe mbaeyekou, mbae oata oï ndeve yave peguarä.

10Echa mbota ko kuimbae güɨroasayepeta mano güi jare pɨtumimbi güi.

11Mbota ñamee yave Tumpa peko ñamee ñaï jókuae mbota ikavigüe vae.

12Cheraɨ michi, agüɨye mbae eyapo vɨari kuña ndive, jayave, eekaño nderembirekorä metei nerëtara. Yande ko jae ñeemombeúa reta iñemuña reta, jayave agüɨye ereko ketɨgua kuña, ñaneñemuña reta jëtaɨguambae vae. Jayave cheraɨ michi, nemaendúa, Noé re, Abraham re, Isaac re, jare Jacob re, jae ko ñaneñemuña arakaegüe reta: jaema opaete jae reta, ikuña reta aeño ko güɨreko reta. Jare Tumpa ombobendice opaete imichia chupe reta, jare yogüɨreko jae ɨvɨ omee chupe reta vae iyarä.

13Jayave cheraɨ michi, eaɨu Israel-ɨgua reta, jae ko nerëtara reta. Agüɨye eyemboaguara eiko, jare agüɨye eröɨro Israel-ɨgua rereko vaerä nderembirekorä. Echa yemboaguara oporomokañɨtei ko oï, jare akɨ yandemombaravete yeyé vae ko. Akɨ jae ko yɨmbɨaɨ ichɨ.

14Kia ñavo oparavɨkɨ ndeve vae pe jupiveiño emboepɨ, Tumpa pe reyeokuai yave, jae ndemboekopota ko. Emae ngatu ndeyeupe cheraɨ michi, opaete mbae reyapo vae rupi; jare eiko kavi reporomboete reve.

15Nde reipotaä kia mbae oyapo ndeve vae, agüɨye vi nde eyapo kia pe. Agüɨye eyembosavaɨpo eiko vino pe. Agüɨye eyepokuaa esavaɨpo eiko.

16Emboyao nderembíu iyɨmbɨaɨ oï vae ndive jare nderemimonde emee jemimondembae pe. Oime mbae jembɨre ndeve yave, embopota kia. Jare mbota remee yave agüɨye nerakäteɨ reve emee.

17Emboyao nderembíu jupi vae pe, ërei agüɨye emee jupimbae vae pe.

18Eeka arakuaa kuimbae yarakuaa vae pe jare agüɨye eröɨro eiko kia ndemboarakuaa vae.

19Opaete mbae rupi emboete Tumpa, ndeYa, jare eyerure chupe reo kavi vaerä opaete mbae reyapo vae pe. Echa tumpa-raanga omboete vae reta mbaetɨ ko iyarakuaa: YandeYa ko omee opaete mbae. Jare jae oipota yave, ñanemomichita vi ko ipuere rupi. Cheraɨ michi, eipɨɨ kuae yemongeta; jare agüɨye neakañɨ chugüi.

20Añave Cheraɨ michi, chemiarita ndeve metei mbae re: Gabael, Gabrí taɨ, oime oñovatu güɨnoi cheve, tresciento treinta kilo korepoti Ragues pe tëta Media pe.

21Agüɨye ndepɨatɨtɨ, cheraɨ kuae yandeparavete yapɨta vae re. Ërei Tumpa yamboete yave, jare resɨrɨ opaete mbaeyoa güi yave, jare reyapo mbae ikavigüe yandeYa Tumpa jesa róvai, täta ko reyemboikokatu.”