TOBIT 12 - Guarani Bible with DC

Araɨgua oyekuaauka chupe reta

1Opa ma menda omboarete reta yave, Tobit oenɨi taɨ Tobías jare jei chupe:

—Cheraɨ, agüɨye neakañɨ emboepɨ neguataïru pe ñanemiari rami, ipuere vi oasa ete ye remboepɨ chupe.

2Jaema Tobías jei chupe:

—Cheru, ¿mbovɨ pa amboepɨta chupe? Yepeta mbɨte amee chupe jókuae chemborɨ aru vae reta, mbaeä cheve.

3Echa jae chereru ye ikavi, jare ikavi royu roväe cherembireko ndive, jare chemborɨ güeru korepoti, jare nde vi ndembogüera, jaema ¿këraita pa yamboepɨ chupe?

4Jare Tobit jei chupe:

—Cheraɨ, jupi ko remee vaerä chupe mbɨte rupi mbae rerugüe.

5Jaema jayave Tobías oenɨi Rafael jare jei chupe:

—Ko oï kuae mbɨte rupi opaete mbaembae reta yarugüe, pɨpe amboepɨta ndeve chemborɨ vae, jare Tumpa ndiveño ekua.

6Jaema jayave Rafael oenɨi reta güɨraja mókoi reve ïkotɨa jare jei chupe reta:

—Pemboete Tumpa jare pemiari opaete pe mbae ikavi vae oyapo peve vae re. Pemboete, peyemongoi Salmo pe jee re. Mboromboete toï Tumpa pe peikuaauka opaete pe jae oyapo ikavi vae pe ndive vae. Agüɨye pekuérai pemee yasoropai chupe.

7Mburuvicha guasu omee yave kia pe mbae oyeapo vɨari vaerä vae, ikavi kïrii yapɨta; ërei ikavi ko yamboete Tumpa yamombeu vaerä opaete vae pe jae oyapogüe vae, peyapo mbae ikavi vae, jayave ngaraa ou mbae ikavimbae perupi.

8Ikavi peyerure yekuaku reve, jare pemee yemborɨ paravete vae pe, mbaemboete reve, mbaeyekou ikavi vae ndive. Ikavi ko yemborɨ ñamee vaerä mbaeyekou oro pegua yamboatɨ vae güi.

9Yemborɨ ñamee paravete vae pe vae, yandereepɨta mano güi jare oyoeta yandegüi mbaeyoa. Yemborɨ omee avei vae oiko pukuta ko.

10Kia ñavo mbaeyoa oyapo vae jare ikavimbae oyapo vae, iyeí ko oyovaicho.

11Añave amombeuta peve añetetegüe vae, mbaetɨ eteita ma añomi pegüi. Aramo jaema peve mburuvicha guasu güɨrovia katu vae pe imiari yave jae oikuaagüe vae re, ikavi ko kïrii yapɨta, ërei ikavi yamboeteuka Tumpa yamombeu vaerä jae oyapo yandeve vae.

12Ikavi nde, Tobit jare Sara ndive peyerure ramboeve, cheko peyerure añono yandeYa jóvai, jare jae omae vaerä jese. Jaenunga vi nde reñotɨ yave omanogüe vae reta.

13Nemaendúa, neäteɨmbae reve repüa yave rekaruta tëi reï yave reeya jare reo reñotɨ vaerä omanogüe vae, Tumpa ko chembou rojäa vaerä.

14Jare añave Tumpa vi chembou rombogüera vaerä, jare nderaɨtatɨ Sara, ambogüera vaerä.

15Che ko jae araɨgua Rafael, Tumpa jembiokuai metei chiu vae reta güi roiko yandeYa jembiokuairä vae.

16Jare mókoi reve opa okɨɨye reta jare oyetavatɨka omboya jesɨva ɨvɨ re, täta okɨɨye reta.

17Ërei araɨgua jei chupe reta:

—¡Agüɨye pekɨɨye! ¡Peyembopɨa maiaño! Pemboete Tumpa.

18Che ayu aiko pe ndive vae, mbaetɨ ko ayu che aeño, Tumpa ko jei. Pemee yasoropai chupe ara ñavo, jare pemboete.

19Pe chereecha akaru jare aɨu yave, chea ko chereecha peiko, metei oyekuaa vaeño ko.

20Pemee yasoropai yandeYa ɨvɨ iya pe, pemboete Tumpa. Che aja yeta Tumpa pɨri, echa jae chembou. Peñono kuatía pe opaete mbae oasa pe ndive vae.

Jare ojo ɨvate.

21Jaema jae reta opa opüa jare mbaetɨ yé ma oecha reta.

22Jayave omboɨpɨ oyapo reta yasoropai Tumpa pe jare omee mbaemboete chupe mɨakañɨ oyapo vae re: ¡Metei Tumpa iaraɨgua oyekuaa chupe reta!