JEREMÍAS 10 - Guarani Bible with DC

Tumpa-raanga reta jare Tumpa añetete vae

1Israel iñemuña reta, peyeapɨsaka kuae ñee yandeYa jei pekotɨ vae re.

2Jei körai:

“Agüɨye pemomoe ïru tëtaguasu reta jeko,

agüɨye pekɨɨye mɨakañɨ reta ara re oyekuaa vae güi,

yepe tëi tëtaguasu reta okɨɨye chugüi.

3Echa jókuae tëtaguasu pegua reta,

iporogüɨrovia reta mbaeä etei ko.

Oyasɨa reta ɨvɨra kaa pe,

jare ipoki omaeopa vae ombokavi yɨvapa pe,

4javoi omopöra korepoti pe jare oro pe,

omotäta vaerä oikutu clavo pe martillo pe

täta kavi oï vaerä.

5Sɨmbi, omɨimbae oyemboɨ reta karandaɨ rami,

mbaetɨ imiari reta,

ovoɨ reta güɨraja,

echa mbaetɨ ipuere oguata reta.

Agüɨye pekɨɨye chugüi reta,

echa mbaetɨ ipuere reta oyapo ikavimbae ani ikavi vae ave.”

6CheYa, mbaetɨ kia nde rami vae;

nde ko tuichagüe,

nderee tuichagüe jare imbaepuere yae vae.

7Nde ko tëtaguasu reta Juvicha guasu,

¿kia pa oipoɨu potaä ndegüi?

Jupi ko ndegüi oipoɨu vaerä opaete vae.

Echa opaete yarakuaa katu vae reta güi

jare mburuvicha guasu reta ɨvɨ pegua güi,

mbaetɨ kia nde rami.

8Opaete tumpa-raanga reta yarakuaambae ko,

mbaetɨ etei ko yarakuaa reta.

¡Jókuae tumpa-raanga reta ɨvɨra pegua mbaetɨ ipuere pemboe!

9Tarsis güi güeru reta korepoti

oyemboipegüe itumpa-raangarä,

jare oro güeru reta Ufaz güi;

ipoki omondɨkui mbae omopöra oyapogüe ko,

omboemimonde temimonde jovɨ vae jare pɨ̈ta vae pe;

opaete kuae reta, ipoki mbae oyapo vae reta jembiapoño ko.

10Ërei yandeYa Tumpa jae ko añetete vae,

jae ko Tumpa oikove vae jare Mburuvicha guasu opambae.

Iyarasɨ yave, okana ɨvɨ;

tëtaguasu reta mbaetɨ jösa chupe.

11(Körai pere itumpa-raanga pota vae reta kotɨ: “Okañɨta ko ɨvɨ güi tumpa-raanga reta mbaetɨi oyapo ara jare ɨvɨ vae; mbaetɨ eteita opɨta chugüi reta metei ave ɨvɨ pe.”)

Tairari mbaemboete pegua Tumpa pe(Jer 51.15-19)

12YandeYa imbaepuere pe oyapo ɨvɨ;

oñono kavi ɨvɨ oikuaa kavi reve;

oipɨso ara iyarakuaa yae reve.

13Iñee rupi jɨapu ɨ ɨvate ara pe,

omboyeupi amapɨtu ɨvɨ iyapɨ kotɨ güi,

ombou ama-vera okɨ yave,

jare güɨnoe ɨvɨtu, oñovatúa güi.

14Opaete kuimbae reta yarakuaambae ko.

Tumpa-raanga omondɨkui oyapo vae oñemomaraiukata opɨta,

echa ko jembiapo reta oporombotavɨ, mbaetɨ jekove;

15jaanga retaño ko.

YandeYa iporojäa iara pe,

opaeteita ko oyemboai reta.

16Ërei ¡ambuaeyee ko chugüi reta Jacob iTumpa,

opaete mbaembae iYapoa!

Jae oiparavo imbaerä Israel.

YandeYa Imbaepuere yae ete vae;

jókuae jae ko jee.

Tëtaguasu Judá opata oyemboai

17—Jerusalén, tovaicho oñova güɨnoi vae,

eroyakavo ndembaembae reta.

18Echa yandeYa jei:

“Añave amondota mombɨrɨ kuae ɨvɨ pegua reta.

Aiporarauka yaeta chupe reta,

oyandu ete kavi yae reta vaerä.”

19—¡Maera pa ko ayemboai apɨta!

¡Chepere jasɨ yae!

Ërei, ¡taiporara kuae tembiporara reta!

20Chero guakapi pegua oyemboai oï,

opaetei iïcha oso.

Chemembɨ reta opa chereeya,

¡mbaetɨ ma oikove reta!

Mbaetɨ ma kia omopüa ye vaerä chero guakapi pegua,

asoya o imboyaoa omoata vaerä ave mbaetɨ.

21—Echa kuae tëta re oyangareko vae reta yarakuaambae katuai ko;

mbaetɨ oeka reta yandeYa.

Jáeramo osusere reta,

jare opaetei oñemoai moai vae.

22¡Peyeapɨsaka!

Jërakua tëtaguasu ɨvɨtuguasu kotɨgua güi oyeendu ou jetagüe,

oeya vaerä ipombae opaete tëta guasu reta Judá pegua,

opɨta vaerä aguarayaɨmba reta jëtarä.

23CheYa, aikuaa ko metei ave mbaetɨ jekove jae imbaei,

mbaetɨ mbaepuere güɨnoi tenonde kotɨ oikota oiko vae re.

24Eiporarauka oreve oreYa Tumpa, reikuaa rupi kavi,

agüɨye opaetei ndearasɨ eiporu oreré,

echa oremokañɨteita ko.

25Eitɨ ndearasɨ tëtaguasu reta mbaetɨ ndekuaa vae re,

tëta reta mbaetɨ ndemboete vae re,

echa opa omokañɨtei reta Jacob iñemuña reta,

opaetei omboai reta,

tëtaguasu opa omboai oeya reta.