JUDIT 12 - Guarani Bible with DC

Judit opɨta teyupa pe

1Holofernes jei jembiokuai pe güɨraja vaerä mbaerɨru korepoti pegua reta oïa pe, jare omee reta jae jembíu güi jare ivino.

2Ërei Judit jei chupe:

—Mbaetɨta jau jókuae tembíu, agüɨye vaerä ambaeyavɨ yandeporookuai reta pe. Che oime ko aru jau vaerä.

3Holofernes jei chupe:

—Ërei jókuae nderembíu opa ndegüi yave pa nó, ¿ketɨ güi pa rovaëta jókuae rami etei vae nderembiurä? Mbaetɨ ko kuae pe, orepɨte pe, metei äve nerëtaɨgua.

4Jaema Judit jei chupe:

—¡Agüɨye jökorai ere cheruvicha! Ngaraa cherembíu opa chegüi ndei cheYa oyapo mbove che rupi mbae oipota oyapo vae.

5Holofernes jembiokuai reta güɨraja teyupa pe, jare joko pe oke pɨare mbɨte regua. Ndei köe mbove opüa,

6jare omondo körai jei Holofernes pe: “Cheruvicha tomee cheve kuae reta aë vaerä aja ayerure.”

7Jare Holofernes jei isundaro reta pe omaeño vaerä oë ojo.

Jare jökorai Judit oiko mboapɨ ara teyupa pe. Pɨ̈tu ñavo oë ojo Betulia ɨvɨtɨ päu kotɨ jare oyau ɨesaɨ köiño oï sundaro reta jeyupa güi vae pe.

8Ou yee ma joko güi yave oiporu iYa Tumpa pe, Israel-ɨgua reta iTumpa pe omee vaerä chupe yavaimbae reve omborɨ vaerä jëtaɨgua reta.

9Opa jökorai oyeapo kavi yave, ou yevɨ teyupa pe jare joko pe oï tembíu güeru reta chupe regua kaaru yave.

Judit pe ou mbarea ojo vaerä okaru Holofernes pɨri

10Irundɨ araa pe, Holofernes oyapouka omongaru vaerä jembiokuai reta, mbaetɨ reve oparea ïru mburuvicha reta pe,

11jare jei Bagoas pe, jae ko kuimbae jae güɨrovia katu yae vae jae ipo pe oñono opaetei imbaembae reta:

—Ekua emoñera hebrea reyangareko reï jese vae tou tokaru jare tokau yande ndive.

12Echa chevegua ñemomarai tuichagüeta ko oua oï chépɨri jókuae nunga kuña yave, jare amokɨ̈reɨä yave opukata ko cheré.

13Jaema Bagoas oë ojo Judit oïa pe jare jei chupe:

—Kuñatai michi, agüɨye neäteɨ ayu aparea ndeve, reo vaerä remoïru michi oreve oreruvicha. Eyu reyerovia reve jeu vino orépɨri jare eyeapo añave voi kuña Asiriaɨgua reta ñogüɨnoi Nabucodonosor jo pe vae rami.

14Jare Judit jei chupe:

—¿Mbae nunga pa che cheäteɨ vaerä aja cheruvicha pe? Opaete chepɨa reve ayapota jae oipota vae. Kuae cheveguarä yerovia tuichagüe ko opaete cherekove pegua.

15Jare opüa omonde jemimonde ikavigüe vae jare oñono iyé opaete oñemopöra pɨpe vae reta. Jembiokuai räri ojo tenonde, ojo Holofernes jóvai oipɨso ɨvɨ rupi Judit jenonde, vecha piregüe Bagoas omee chupe oiporu vaerä opaete ara rupi vae, oupi jembíu reta jóvai güɨnoi vae.

16Jare Judit oike ojo rupive, ojo oguapɨ, Holofernes täta oipota omae jese jare oipotaecha täta oyemoangapɨɨ jese vae; echa oechaɨpɨ güive jae oäro ñomai jëguata ko chupe vae.

17Holofernes jei chupe:

—¡Ekau jare eyerovia ore ndive!

18—Jökoraita ko cheruvicha —jei Judit—, kuae ara tuicha vae ko cheveguarä.

19Jare jaemai omboɨpɨ jou jembiokuai oyapogüe jare okau jóvai.

20Holofernes täta oyerovia ipuere rupi vino jou yave, mbaetɨ jökorai okau metei ara pe vae.