ECLESIÁSTICO 46 - Guarani Bible with DC

Josué jare Caleb

1Josué, Nun taɨ, oiko ñoraro regua jëiagüe vae

omborɨ oiko Moisés ñeemombeuarä.

Oñeñono oiko vaerä iara pe jae jee jei rami,

metei yemboasa tuicha vae Tumpa jembiparavo reta peguarä,

oiporarauka vaerä tovaicho reta pe

jare omee vaerä Israel pe ɨvɨ chupegua reta vae.

2¡Aa jae mbae tuichagüe vae iyɨva omopüa yave

jare isaruya ombovava metei tëta guasu kotɨ yave!

3Ngaraa kia ipuere jese

Tumpa iñoraro pe oñoraro yave.

4Jae oyapogüe rupi ko opɨta kuaraɨ jenda pe aeño,

jare metei ara vae oiko vaerä mókoi ara vae rami.

5Oyerure Tumpa ɨvate ete pe oï vae pe

tovaicho oipota rupi güi opoko jese yave,

jare Tumpa oendu iyerure ombou chupe

amandau ita nunga nunga vae jeta rupi,

6jare oitɨ tovaicho reta re,

pɨpe opa omokañɨtei jovaicho reta chugüi ɨvɨ Bet-horón jee vae pe.

Jare jökorai oikuaa jókuae tëta guasu reta, oiporara maemegua vae,

Tumpa etei ko omborɨ jëta ipo reta ñoraro pe vae.

7Josué oiko jupi rupi Tumpa pe,

jare Moisés oiko yave jaenunga vi.

Jae jare Caleb, Jefune taɨ,

oyemboasa reta tëta reta oñemopüa yave,

jare ombosɨrɨ reta tëta ipo reta güi Tumpa iyarasɨ

jare omokïrii reta vi iñeenguru vae reta.

8Jókuae ramo, seisciento mil vae Israel-ɨgua reta ipɨte pe

jae mókoi retaño oasayepe,

oike vaerä oyemombae tëta guasu re

neche jare ei ɨ rami oguataa pe.

9Tumpa omee mɨ̈rata Caleb pe

ojoi indechi regua,

agüɨye vaerä oyandu jókuae tëta guasu ɨvate oï vae.

Jare iñemuña reta pe opa opɨta imbaeyekou reta,

10opaete Israel-ɨgua reta oikuaa vaerä

kërai ikavi ko yaiko vaerä jupi rupi Tumpa pe vae.

Mburuvicha oporojäa vae Samuel

11Jare ipuere vi ombojee mburuvicha oporojäa vae reta, metei metei rupi,

mbaetɨ oyembotavɨuka reta

jare mbaetɨ vi oyembosɨrɨ reta Tumpa güi.

¡Ikɨambae vae ko yemomaendúa jesegua!

12¡Ikägüe reta toyembopɨau ye tɨvɨa pe

jare jee reta oyembopɨau vi iñemuña reta rupi!

13Samuel, mburuvicha oporojäa vae jare sacerdote,

tëta jembiaɨu jare iYapoa jembiparareko,

ndei oa güire ma Tumpa oiparavo vae,

oñeñono tee Tumpa pe ñeemombeuarä oiko vae rupi,

Tumpa oyokuaigüe rupi oyapo oiko vaerä mburuvicha guasu

jare oiparavo tëta guasu juvicharä oiko vaerä vae reta.

14Tumpa oyokuaigüe rupi oiko tëta ruvicharä

jare ojo opou Jacob jeyupa reta rupi.

15Jae ko ñeemombeúa añetegüe jei vae jeko pegua, oparandu reta chupe,

jare jeigüe vae omboyekuaa güɨrovia vaerä jese vae.

16Jae vi oeka Tumpa kotɨ

jovaicho reta oipota rupi güi opoko jese yave,

jare omee mɨmba oyeyukagüe opaetei oyeapɨ vae rupi metei vecha rai.

17Jare Tumpa, ara kotɨ güi, oenduuka metei ararɨapu;

iñee tätagüe jɨapu vae ndive oyeendu;

18opa oipɨɨ tovaicho ruvicha reta

jare opa omokañɨtei filisteo reta juvicha reta.

19Jupa pe ma oï, jare jeiete yae ma oï yave,

jei Tumpa jovake jare mburuvicha guasu reta Tumpa oiparavo vae reta jovake:

“Che mbaetɨ ko oyeguauka kia pe,

metei mbɨrɨru re ave yepe.”

Jare mbaetɨ ko kia ipuereta oikuaku.

Iyarakuaa katu reve ojo oväe jekove iyapɨ pe

Tumpa jesa róvai jare opaete kuimbae reta.

20Imano jaɨkue rupi jekuae güɨrave oparandu chupe vae,

jare omombeu mburuvicha guasu pe mbae oasata vae;

jɨvɨa güi ma ñeemombeúa oiko jeko pegua oupi iñee.