SAN MARCOS 5 - Guarani Bible with DC

Gadaraɨgua aña oya jese vae(Mt 8.28-34; Lc 8.26-39)

1Jayave yogüɨraja oväe ɨguasu jovaicho pe, Gadaraɨgua reta iɨvɨ pe.

2Jesús ogüeyɨ barco raɨ güi rupive, ou oövaiti tɨvɨa renda güi metei kuimbae aña oya jese vae.

3Jae oiko tɨvɨa renda rupi, jare mbaetɨ kia ipuere oipokua, karena ave omondoo.

4Jeta vese ma jae reta oipokua tëi karena pe. Ërei jae opa omondoo ndoo karena. Ipuereä etei kia jese.

5Pɨ̈tu rupi jare ara rupi osapúkai oiko tɨvɨa renda rupi jare ɨvɨtɨ rupi, jare oyembopere ita pe.

6Kuae kuimbae oecha yave Jesús mombɨrɨ güi, osɨi ou ikotɨ jare oyetavatɨka jóvai.

7Jare iñeeäta reve jei:

—¿Maera pa reyu cheve Jesús, Tumpa Tuichagüe yae vae Taɨ? Romoñera Tumpa jee re, agüɨye eiporarauka cheve.

8Echa Jesús jei ma aña pe:

—Aña, esɨrɨ kuae kuimbae güi.

9Jayave Jesús oparandu chupe:

—¿Mbae pa nderee?

Jae jei chupe:

—Jeta vae, echa jeta vae ko ore.

10Jare aña reta omoñera yeyé Jesús agüɨye vaerä omoë reta jókuae ɨvɨ güi.

11Jare joko pe jeta kuchi reta okaru ñogüɨnoi köiño ɨvɨtɨ güi.

12Jayave opaete aña reta omoñera Jesús, jei reta reve:

—Oremondo pea kuchi reta kotɨ. Emaeño oreré roike vaerä jese reta.

13Jayave Jesús omaeño jese reta. Jare aña reta oë kuimbae güi jare yogüɨraja oike kuchi reta re. Jayave jókuae kuchi reta täta osɨi oa ɨ̈vɨa ɨvate vae güi ɨguasu pe, jare joko pe opa ipɨ̈tupa reta. Jókuae kuchi reta oupitɨ dos mil rupi.

14Jayave kuchi iyangarekoa reta opa otekuarai, jare omombeu tëta guasu pegua reta pe jare ikatu rupigua reta pe kuae oyeapo vae regua. Jare opaete vae reta yogüeru oecha vaerä.

15Jare yogüeru oväe yave Jesús oïa pe, oecha kuimbae aña oyase jese vae oguapɨ oï joko pe. Oecha oyemonde kavi ma jare yarakuaa kavi ma. Jae ko tenonde yave jeta aña reta oya jese vae. Jare opaete yogüeru vae reta okɨɨye.

16Jare kuchi iyangarekoa reta tenonde yave oecha vae reta omombeu ïru reta pe kërai oasa kuimbae aña oya jese vae jare kuchi reta.

17Jayave opaete vae reta omoñera Jesús ojo ye vaerä jae reta iɨvɨ güi.

18Jare Jesús oyeupi ye ma oï barco raɨ pe yave, jókuae kuimbae aña reta oya jesegüe vae omoñera omaeño vaerä ojo jupíe.

19Ërei Jesús mbaetɨ omaeño jese, jei chupe:

—Ekua nerëta pe emombeu nerëtara reta pe mbae tuichagüe ndeYa oyapo ndeve vae, jare kërai ndeparareko vae.

20Jayave kuimbae ojo, jare omboɨpɨ omombeu ɨvɨ Decápolis jee vae rupi mbae tuichagüe Jesús oyapo chupe vae. Jare opaete vae ipɨakañɨ jese.

Jairo tayɨ jare kuña Jesús jemimonde re opoko vae regua(Mt 9.18-26; Lc 8.40-56)

21Jesús ou ye oväe ɨguasu jovaicho kotɨ güi barco raɨ pe kuaraɨ oikea kotɨ yave, yogüeru jeta vae reta jae oïa pe. Jare Jesús opɨta ɨguasu jembeɨ pe.

22Jayave ou metei kuimbae Jairo jee vae. Jae ko judío reta itupao pe tenondegua vae reta güi metei. Jae oecha yave Jesús, oyetavatɨka itindɨasɨ reve jóvai.

23Jare omoñera, jei chupe:

—Cherayɨ omano ma oï. Yaja eñono ndepo jese oikove vaerä, agüɨye vaerä omano.

24Jesús ojo jupíe, jare jeta vae yogüɨraja jupíe, jare oyopɨ yae reta.

25Jare jae reta ipɨte pe ojo metei kuña doce año ma oiporara tugüɨ guasu vae.

26Jare oiporara yae ma jeta oporopoano vae reta oipoano tëi reve, jare opa ma ikorepoti oiporu iyeugüi. Ërei mbaetɨ okuera, jeseve jeieteño imbaerasɨ.

27Jae oendu Jesús regua yave, ou oya Jesús re ikupe kotɨ rupi jeta vae reta ipɨte rupi, jare opoko jemimonde re.

28Echa jei iyeupe: “Jemimonde re yepe tapoko, akuerata ko.”

29Jare opoko jese rupive jugüɨ opɨta chugüi, jare oendu jete okuera jókuae tembiporara güi.

30Ërei Jesús oikuaa imbaepuere oë chugüi yave, oyerova omae jeta vae re, jare oparandu:

—¿Kia pa cheremimonde re opoko?

31Jayave jemimboe reta jei chupe:

—Mbaetɨ pa reecha kuae jeta vae reta ndeopɨ ñogüɨnoi. ¿Maera pa reparandu, kia ra nderemimonde re opoko vae?

32Ërei Jesús omae iyɨpɨ rupi, oecha vaerä kia ra jökorai oyapo.

33Kuña oikuaa ma okuera yave ou ikotɨ. Orɨrɨi okɨɨye güi, jare oyetavatɨka Jesús jóvai, jare omombeu chupe opaete oyapo vae.

34Jayave Jesús jei chupe:

—Cherayɨ, rekuera ma, rerovia cheré ramo. Ekua ndepɨakatu reve. Rekuera ma ko reiporara vae güi.

35Jare Jesús imiari oï jae ndive ramboeve, yogüeru oväe amogüe vae Jairo jëta güi. Jare jei reta chupe:

—Nderayɨ omano ma. Agüɨye mo emoambeko oporomboe vae.

36Ërei Jesús kuae oendu yave, jei Jairo pe tupao pe tenondegua vae pe:

—Agüɨye ndepɨatɨtɨ. Eporogüɨroviaño.

37Jare mbaetɨ omaeño ïru reta yogüɨraja vaerä jae ndive, jaeño Pedro, Jacobo jare tɨvɨ Juan.

38Yogüɨraja oväe yave tupao pe tenondegua vae jo pe, Jesús oecha jeta vae reta jäsémbai oapïro reta ñogüɨnoi kuñatai.

39Jesús oike yave o pe, jei chupe reta:

—¿Maera pa peräsémbai peyaeo? Kuae kuñatai omanoä ko. Okeño ko oï.

40Ërei jae reta oyóyai. Jayave Jesús omoë opaete vae oka pe, jare güɨroike kuñatai oïa pe kuñatai tu jare ichɨ, jare jemimboe jae ndive yogüɨraja vae reta.

41Jayave Jesús oipɨɨ kuñatai ipo pe, jare jei chupe:

—Talita cumi (kuae oipota jei: “Kuñatai, che jae ndeve, epüa.”)

42Jayave kuñatai opüa jare omboɨpɨ oguata. Kuae kuñatai doce año ma güɨnoi. Jare Jesús ndive ñogüɨnoi vae reta ipɨakañɨ yae.

43Jayave Jesús oyókuai yeyé reta agüɨye vaerä omombeu kia pe ave, jare oyókuai reta vi omongaru vaerä kuñatai.