1¿Maera pa pochɨ jare oyomboemboe kuimbae reta?
¿Maera pa tëtaguasu reta oyapo yemongeta ikavimbae?
2Mburuvicha guasu ɨvɨ pegua reta oñomopüa jare oyovaicho,
tenondegua reta oyomboatɨ yandeYa kotɨ jare jembiparavo kotɨ, jei reve:
3“¡Yayora jókuae oporoäpɨti pɨpe vae!
¡Yayora yandeyeugüi ñaneapɨti pɨpe vae!”
4Ërei ara pe güɨnoi iporookuaía vae opuka;
yandeYa oyóyai yóyai omae jese reta.
5Jaɨkue rupi jae omomiari iyarasɨ reve,
iyarasɨ pe omongɨɨye.
6Jei: “Ërei che amboguapɨ mburuvicha guasu Sión re,
ɨvɨtɨ chembae oï tee vae re.”
7Che amoërakuata yandeYa jei vae;
yandeYa jei cheve: “Cheraɨ ko nde;
che ko romoñemuña añave.
8Eiporu cheve tëtaguasu reta ndembaerä,
jare che tamee ndeve;
jare toiko ndembaerä opaete ɨvɨ iyapɨ rupi.
9Remoamɨrita mbaepuere yae rupi,
¡mbaerɨru ñaeu pegua rami remonguruvita!”
10Añave, mburuvicha guasu reta; pearakuaa katu peyeupe;
oporojäa ɨvɨ pe vae reta,
peendu yemboarakuaa.
11Peyeokuai yandeYa pe peipoɨu reve,
jare peyerovia pemboete reve.
12Pemboete Taɨ, agüɨye vaerä iyarasɨ, jare opa pemano;
echa aramoete pegua iyarasɨ.
¡Toyerovia katu opaete jese güɨrovia vae!
Who We AreWhat We EelieveWhat We Do
2025 by iamachristian.org,Inc All rights reserved.
