1 SAMUEL 3 - Guarani Bible with DC

YandeYa oenɨi Samuel

1Kunumi Samuel oyeokuai yandeYa pe Elí jóvai. Jókuae ara rupi yandeYa iñee mbaetɨ oyeendu, echa mbaetɨ oyeechauka avei.

2Ërei metei pɨ̈tu Elí oyapakua oï jupa pe; jesa omboɨpɨ ma ogüe, mbaetɨ ma oecha kavi yave,

3Samuel oke oï yandeYa jo pe, Tumpa ikäjou oïa pe; ndei mechero Tumpa imbae opa oyembogüe mbove,

4yandeYa oenɨi:

—¡Samuel!

—¡Ko aï! —jei Samuel.

5Jare osɨi ojo Elí oïa pe, jei:

—¡Ko aï! ¿Mbaerä pa chereenɨi?

Jare Elí jei chupe:

—Che mbaetɨ ko roenɨi; ekua eyapakua.

Jare jae ojo ye oyapakua.

6Jare yandeYa jekuae oenɨi ye:

—¡Samuel!

Jare Samuel opüa ojo ye Elí oïa pe, jare jei:

—¡Ko aï! ¿Mbaerä pa chereenɨi?

Jare jae jei:

—Cheraɨ, che mbaetɨ ko roenɨi; ekua eyapakua.

7Jare Samuel mbaetɨ vɨteri yepe oikuaa yandeYa, iñee ave ndeiño oendu chupe.

8YandeYa jekuae oenɨi ye Samuel mboapɨa ma. Jare jae opüa ojo Elí kotɨ, jare jei:

—¡Ko aï! ¿Mbaerä pa chereenɨi?

Jayave Elí oikuaa yandeYa ko oenɨi kunumi vae,

9jare jei Samuel pe:

—Ekua eyapakua, jare nereenɨi yave, ere chupe: “Nemiari cheYa, echa ko che nderembiokuai oyeapɨsaka oï.”

Jökorai Samuel ojo, jare oyapakua ye jupa pe.

10Jare ou yandeYa oyemboɨ, jare oenɨi tenonde yave oenɨi rami, jei:

—¡Samuel! ¡Samuel!

Jayave Samuel jei:

—Nemiari, echa ko che nderembiokuai oyeapɨsaka oï.

11Jare yandeYa jei Samuel pe:

—Mase, che ayapota mbae Israel iñemuña reta pe, jare opaete kia nunga vae oendu yave ombopɨakɨɨye yaeta.

12Jókuae ara che ambopota cheñee Elí kotɨ, opaete mbaembae che jae iñemuña reta kotɨ vae, iyɨpɨ güive iyapɨ kotɨ.

13Che amombeu chupe aiporarauka vaerä iñemuña reta pe jekuae avei pegua, mbaeyoa jae oikuaa oï vae re; echa taɨ reta cheangao, jare jae mbaetɨ oyopia taɨ reta.

14Jáeramo, che amombeu kavi voi cheree re Elí iñemuña reta pe, kërai imbaeyoa reta ngaraa mai oyemboai, mɨmba oyeyukagüe reta pe ave ani mbota reta pe ave.

15Jare Samuel oyapakua oke köe regua, jayave oipea yandeYa jo jöke. Jare Samuel oipoɨuño omombeu Elí pe jókuae Tumpa güi oendugüe.

16Elí oenɨi Samuel jare jei chupe:

—¡Cheraɨ Samuel!

—¡Ko aï! —jei chupe.

17Jare Elí jei:

—¿Mbae pa jei yandeYa ndeve? Romoñera agüɨye vaerä reikuaku chegüi. ¡Tumpa täta toiporarauka ndeve, reikuaku yave chegüi opaete mbaembae jei ndeve vae!

18Jare Samuel omombeu chupe opaete, oikuakumbae reve mbae. Jayave Elí jei:

—¡YandeYa ko! ¡Toyapo jaekavi chupe vae!

19Jare Samuel okuakuaa, jare yandeYa oï jae ndive, mbaetɨ iñee oasaiño ombopombae reve.

20Jare opaete Israel iñemuña reta, Dan güive Beerseba kotɨ, oikuaa reta Samuel jae ko yandeYa iñeemombeúa jupi vae.

21Jare yandeYa oyekuaa ye Samuel pe tëta Silo pe; echa joko pe yandeYa omombeu chupe iñee.