SABIDURÍA 2 - Guarani Bible with DC

1Oyavɨ oyemongeta reve jei reta iyeupe:

“Yapúa jare mbɨatɨtɨ ko yanderekove;

kuimbae omano tai ko,

jare mbaetɨ ko yaikuaa kia ou ye tɨvɨa güi vae.

2Güɨramoi peguaño yaa, jare joko güi yaasata,

mbaetɨ yaikove yaiko rami,

echa ñanepɨ̈túe tätati ramiño ko,

jare yandeyemongeta, yandepɨa güi opiriri vae ramiño ko.

3Jaema jókuae opiriri vae ogüe yave,

jaema ko yanderete ojota tanimburä,

jare yande espíritu opata okañɨ ɨvɨtu jarembae oasa vae rami.

4Ara oasa ojo vae rupi,

yanderee güi opata iñakañɨ vae,

jare mbaetɨ eteita ko kia imaendúa yayapogüe re.

Yayanderekove oasata ko amapɨtu jaɨkueregüe ramiño

jare opata okañɨ ɨ̈vɨti

kuaraɨ oesapegüe omokañɨ rami

jare jakugüe pe oñemoamɨriuka vae rami.

5Yanderekove küaraɨa oasa vae ramiño ko;

yanderekove iyapɨ ou oväe yave, mbaetɨ ma ko yayerova ye.

Kuimbae omano vaerä oyembosello etei ko oï;

ngaraa ma ko kia ojo ye jaɨkue kotɨ.

6¡Jókuae ramo, yayeroviambae añave ñanoi vae pe

jare yayekou kuae ɨvɨ re

opaete yandetaɨrusu ñaï vae pe!

7¡Yayembosavaɨpo vino jepɨ vae pe jare yembopichea pe!

¡Agüɨye ñamaeño topa toasa mbaepotɨ iara pe!

8Ñañono ñaneäka re rosa ndei opa ipiru mbove;

9yandearete pe agüɨye kia toata yandegüi.

Yaeya oipota rupi yandeyerovia jaɨkueregüe:

¡Jókuae jae ko yaiko vaerä; jaerä ko ñaï kuae pe!

10¡Yambochombe kuimbae iporomboete ikorepotimbae reve vae;

agüɨye yaiparareko kuña imemano vae,

jare agüɨye ndechi iñatï yamboete chupe!

11Mɨ̈rata toiko yandeve yembojupirä,

echa ko yembopɨtu oëa mbaerä.

12Yambotavɨ ipɨakavi vae, echa täta yandemoambeko;

güɨröɨro mbae yayapogüe,

jare oyemboeta yandeve mborookuai yayapombae vae pe

jare yanderova pe jei yandeve yaikombae yandeyemboe rupi vae.

13Jae ndaye ko Tumpa oikuaa,

jare jaeiño jei iyeupe jae ko Tumpa taɨ vae.

14Yandeyemongeta rupi täta ñaröɨro;

yaecha vaeño ma täta yandemoambeko.

15Jae jeko ambuaeyee etei ïru vae reta güi,

jare mbae jei vae etei ambuaeyee.

16Ñanereröɨro korepoti jaangagüe rami,

jare oyemboyao etei yandegüi

yandekɨa yae vae rami.

Jae ndaye jeko kavi vae reta, omano yave, täta oyerovia,

jare tuicha pegua oï Tumpa turä güɨnoi jeko pegua.

17Jätu yaecha añete jei

jare ñamae jese këraita ojo jekove iyapɨ vae.

18Añetete ko jeko kavi vae Tumpa taɨ ko yave,

Tumpa omborɨta ko jare güɨroasayepeta ko

jovaicho reta ipo güi.

19Jätu yamboarasɨuka jare yaiporarauka chupe,

yaikuaa vaerä ipɨaguasu vae

jare yaecha vaerä jösa ko vae.

20Yayukauka mano ñemomarai pegua pe,

echa, jae jei, oimeta ko kia oepɨ vaerä vae.”

Ipɨapochɨ vae reta imbaeyavɨ

21Körai oyemongeta ipɨapochɨ vae reta, ërei ombaeyavɨ reta;

jae reta pɨ̈chɨi vae oyapogüei omboesaä.

22Oikuaa etei reta Tumpa iyemongeta güɨnoi vɨari vae,

jare oäroä etei reta tekove ikɨambae oiko vae oimeta ko mbota chupe kuri vae;

mbaetɨ güɨrovia reta jekombae vae jekopota ko kuri vae.

23Añetete, Tumpa oyapo ko kuimbae omanombae vaerä,

jare oyapo ko jae iyé ombojaanga rami etei;

24ërei ngatu, aña iporomotareɨ jeko pegua

mano oike ɨvɨ pe,

jare oiporarata aña ndive oï vae reta.