1Körai ramboeve, mburuvicha guasu Antíoco opa omboapɨ provincia ɨvɨtɨ rupi ñogüɨnoi vae reta. Joko pe jërakua chupe tëta Elimaida jee vae Persia pegua, jae ko jërakua yae oiko katu pe, echa jeta güɨnoi korepoti jare oro.
2Oime ko güɨnoi metei tupao oiko katu yae vae, yeopiaka jare tembiporu ñoraro pegua reta mburuvicha guasu Macedonia pegua oeyagüe, Alejandro jee vae, Filipo taɨ, kuae mburuvicha jae ko mburuvicha griego reta itenondegua ete.
3Antíoco ojo jókuae tëta pe jare ikɨ̈reɨ tëi opoko jare opavusu jese, ërei mbaetɨ ipuere, echa jokuaeɨgua reta oikuaa chugüi iyemongeta
4jare omomara reta chupe ñoraro pe, jáeramo otekuarai jare oyerova ye ipɨakatúä reve Babilonia kotɨ.
5Persia pe oï ramboeve, jërakua chupe jókuae sundaro reta oiketa tëi Judea pe vae opa iñamɨri,
6jare yepe tëi Lisias opüa jese ejército tuicha vae ndive, oa vi Israel-ɨgua reta ipo pe, echa jae reta oñemomɨ̈rata tembiporu ñoraro pegua jovaicho reta güi opɨ̈rogüe pe,
7jare judío reta opa vi omboai mɨmba oyeyuka oyeapɨ jese vae mbaeyuka renda jae oyapouka mɨmba oyeyuka oyeapɨ jese vae Jerusalén pegua iárambo vae, oimama reta vi tupao joguambɨ tuicha vae tenonde yave oiko rami, jare omomɨ̈rata tëta guasu Bet-sur pegua.
8Mburuvicha oikuaa yave kuae, ombopɨakaviä yae, jáeramo imbaerasɨ etei ipɨatɨtɨ güi jare oitɨ jupa pe, echa mbaetɨ ipɨapotaa oë kavi chupe.
9Jökorai oiko mbovɨ ara rupi, mbɨatɨtɨ oyaporai jare oyandu ma jete ogüɨapita yave,
10oenɨi opaete ivɨaka reta, jare jei chupe: “Cheresa jopeɨ veä ma; yemoambeko chembopɨakaviä ma.
11Tenonde yave aparanduse cheyeupe: ¿Maera pa ou oväe cheve mbɨatɨtɨ jare opüa cheré pɨandeko, chéveti, chembaepuere aiko yave ayerovia katu jare opaete cheraɨu yepi?
12Ërei añave chemaendúa opaete mbae pɨ̈chɨi vae ayapo Jerusalén kotɨ vae re, araja yave tembiporu korepoti jare oro pegua, jare omondo ambopaauka opaete Judea pe yogüɨreko vae reta jekombae reve.
13Aikuaa katu añave jókuae jeko pegua ou cheve kuae maemegua reta. ¡Añave, ko aï, mbɨatɨtɨ cheyukata ma tëta ambuae pe!”
14Jayave oenɨi Filipo, jae iñeïru, jare omee chupe mbaepuere opaete jókuae ɨvɨ re.
15Omboasa chupe äka-regua, tuvicha guasu reta jemimonde jare ipoäka-vera, oyókuai omboarakuaa vaerä taɨ Antíoco jare oyapo katu vaerä mburuvicharä.
16Joko pe omano mburuvicha guasu Antíoco, ciento cuarenta y nueve año pe.
17Lisias oendu yave mburuvicha guasu imano, omboguapɨ taɨrusu vae Antíoco, tu amɨri jendagüe pe, michi güive omboarakuaa güeru vae, jare ombojee Eupátor.
Ñoraro pɨau reta Jerusalén jare Bet-sur pegua(2 Mac 13.1-22)18Sundaro reta tëta mí Jerusalén pegua mbaetɨ yepi omaeño oë Israel-ɨgua reta tupao iyɨ́vɨri güi. Jaeñomai oeka oyapo vaerä pɨ̈chɨi vae chupe reta, jare omborɨ itumpa ambuae vae reta.
19Jáeramo Judas oñejäa opa vaerä ombopaa reta, jare omboatɨ opaete tëtaɨgua reta oikëse jare opüa vaerä jese reta.
20Año ciento cincuenta pe oyomboatɨ, oimama, omopüa reta ɨ̈vɨa joko güi oporoapi vaerä tembiporu ñoraro pegua pe.
21Ërei jeseve, amogüe reta oë joko güi, jare Israel-ɨgua güɨröɨro jeko vae reta oñemoïru jae reta ndive.
22Opaete kuae reta yogüɨraja oväe mburuvicha jóvai, jare jei reta chupe: “¿Oreruvicha guasu, kërai yave pa reyapota jupi vae oreve jare reyepɨta jókuae orerëtaɨgua reta re?
23Ore orepɨakatu reve royeokuai nderu amɨri pe, jae jeia rupi roiko jare royapo iporookuai.
24Jáeramo añave, orerëtaɨgua reta oikëse tëta mí jare oyovaicho orekotɨ. Jeiete yae ma añave, echa opa ma oyuka oreïru reta jare opɨ̈ro reta imbaembae chugüi.
25Mbaetɨ vi orereño opoko reta, jaeramiño vi mburuvicha guasu jëta-ɨpɨ rupigua reta re.
26Añaveño joko okua ñogüɨnoi tëta mí Jerusalén re, ikɨ̈reɨ ramo oyemboiya reta jese. Opa yeti omotïi tupao jare Bet-sur.
27Oreruvicha guasu mbaetɨ yave oyembotenonde oyopia ɨmambae pegua, oyembojeieteta tekorai, jare oreruvicha guasu ngaraa ma ipuere jese reta.”
28Mburuvicha guasu kuae oendu yave, iyarasɨ tuicha jare oekauka opaete ivɨaka reta, ejército juvicha reta jare kavayu regua reta juvicha.
29Yogüeru vi oñomoïru jae reta ndive korepoti re oporoyuka vae reta ïru tëta guasu rupigua jare ɨguasu iyɨ́vɨri rupigua reta.
30Mburuvicha guasu iejército reta oupitɨ cien mil ɨvɨ rupigua jare veinte mil kavayu regua reta, treinta y dos elefante ipoki ñoraro pegua vae reta.
31Oasa reta Idumea rupi jare oyembojeyupa reta Bet-sur pe, javoi mbovɨ ara rupi oporepeña reta jese tembiporu ñoraro regua pe; ërei Israel-ɨgua reta oë iñepɨ̈roa güi, jare oapɨ tembiporu ñoraro pegua jare oñoraro reta jäta ngatu reve.
32Jökorai yave, Judas oñemoata tëta mí güi jare oyembojeyupa Bet-zacarías iyɨpɨ pe, mburuvicha guasu jeyupa jóvai.
33Pɨareve pe, ndeimboveasɨ, mburuvicha guasu oeya jeyupa jare güɨraja rai rai iejército Bet-zacarías kotɨ. Oyeapo katu reta ñoraro pe jare omoñee reta jemimbɨ.
34Elefante reta pe oechauka reta uva jare mora tɨgüe omboarasɨuka vaerä ñoraro peguarä.
35Omboyao mɨmba reta sundaro jeta vae iñavo; elefante iyɨ́vɨri ñavo oñono reta mil kuimbae reta iyepopiaka reve reve jare iñäka-ɨru jiero iyu vae pegua, jae vi quiniento sundaro kavayu regua reta ipoki vae reta.
36Tenonde ma yepe opa oñono sundaro reta elefante reta oïtaa rupi, jare oguata reta mɨmba iyavei, mbaetɨ etei osɨrɨ chugüi.
37Elefante iárambo ñavo oñono reta metei ñepɨ̈roa ɨvɨra pegua, ombogüɨrapembɨ kavi iyapɨte jare oñapɨti kavi vi oñono reta jókuae mɨmba ikupe re, ñepɨ̈roa japɨpe ñavo ñogüɨnoi mboapɨ sundaro jare jeroataarä oñono metei tembiau.
38Kavayu regua reta jembɨregüe opa omboasa ejército iyɨke ñavo rupi oïraro vaerä jovaicho, ërei oyoepɨ reve vi sundaro jeta vae reta ndive.
39Kuaraɨ oesape ma yave, yeopiaka oro jare jiero iyu vae pegua reta re, overagüe omboesape etei ɨvɨtɨ re, tata jendɨ vae omoembipe rami.
40Mbovɨ katu sundaro atɨ reta opa oñemoai ɨvɨtɨ rupi, jare ïru reta opɨta ɨvɨ kotɨño. Oporepeña reta ipɨakɨɨyembae jare oñesɨro reve kavi.
41Kuae sundaro reta ipɨ ipugüe jare jembiporu ñoraro pegua opäraragüe oendu vae reta omborɨrɨi etei kɨɨye oyapo. Echa ko, metei ejército tuichagüe jare imbaepuere ete kavi vae.
42Judas jare isundaro reta oporepeña vi oñoraro, joko pe seisciento seri rupi mburuvicha guasu isundaro reta opa omano.
43Eleazar Avarán oecha metei elefante oë mbuku ete ou ïru reta ipɨte güi jare oñekëse kavi yae mburuvicha iyeopiaka pe yave, oyemongeta oimeecha ko ou mburuvicha guasu pɨpe.
44Jayave jae oñono jekove mano ipo pe oepɨ vaerä jëta, jáeramo vi jërakua avei opɨta.
45Echa yavaete yé osɨi ikotɨ sundaro pɨte rupi, oporoyuka reve iyakatu jare iyasu kotɨ, jare Jökorai oipea güɨraja tape iyeupe.
46Ojo ma oväe elefante igüɨ pe yave, okua jese jare oyuka. Ërei jókuae elefante oyepɨaka yave oa Eleazar iárambo etei, joko peño voi omano paravete.
47Ërei ngatu, Israel pegua reta oecha yave mburuvicha guasu isundaro reta ipɨ̈rata jare ipɨ̈rata yae okua jovaicho re, jae reta oñemoiti joko güi.
48Mburuvicha guasu iejército güi amogüe reta oporepeña Jerusalén kotɨ okua vaerä Israel-ɨgua reta re, jare mburuvicha guasu oikëse Judea jare ɨvɨtɨ Sión.
49Iñɨ̈ro oyoupe Bet-sur pegua reta ndive, jae reta oë jëta güi echa mbaetɨ ma ipɨ̈rata jovaicho jóvai. Kuae oasa ko mbutuu iaño pe, opaete ɨvɨ ko oputuuta tëi jókuae año.
50Jökorai mburuvicha guasu opɨ̈ro Bet-sur jare oñono joko pe iyangarekoarä.
51Joko güi opüa tupao re mbovɨ ara rupi, omopüa reta iyɨ́vɨri ɨ̈vɨa joko güi oporoapi vaerä, güɨnoi tembiporu ñoraro pegua, tataendɨ imomboa, mí guasu reta jare tamamboka reta.
52Ërei Israel-ɨgua reta omopüa vi jembiporu oyeopia vaerä jovaicho reta güi, jare jökorai oñoraro reta yogüɨreko ɨma katu.
53Ërei ko, jókuae año yekuaku iara ramo, mbaetɨ jeta mbatee kia güɨnoi jembiurä iyavatío pe, jare Israel-ɨgua reta oyakavo ïru tëta güi Judea kotɨ vae, opa jou iyeugüi jembíu oñovatugüe.
54Yɨmbɨaɨ oyaporai yae reta ma yave, irundɨ kuimbae ñoete ma yogüɨreko tupao pe; ïru reta opa yogüɨraja jëta ñavo rupi.
Mburuvicha guasu omee yeyora Judaɨgua reta pe yogüɨreko vaerä iporogüɨrovia rupíe(2 Mac 13.23-26; 11.22-26)55-56Mburuvicha guasu Antíoco, ndei omano mbove, omboasa ko Filipo ipo pe taɨ Antíoco, omboarakuaa vaerä jare oyapo katu vaerä mburuvicha guasurä. Ërei Filipo, oyerova ma yave Persia jare Media güi mburuvicha guasu güɨraja ñoraro pe ejército vae ndive, ikɨ̈reɨ tëi jae oiko mburuvicharä. Lisias pe jërakua yave kuae,
57jaɨai voi omee ñee sundaro reta pe omboɨpɨ vaerä oguata. Jei mburuvicha guasu pe, ejército jare isundaro reta pe: “Ara ñavo jeiete ma yandepɨtu; mbaetɨve ma vi yanderembíu; kuae tëta yayere yaiko jese vae tïɨ yae oï, jare tembiapo reta ñanerëta pegua re oipotata ma vi yayangareko.
58Yayapo yemongeta kuae reta ndive, ñaneɨ̈ro oyoupe jare opaete tëta guasu ndive.
59Ñamee yeyora chupe reta ipɨagüive yogüɨreko vaerä iporookuai jare jeko rupi tenonde yave rami, echa yande yayopia chugüi yogüɨreko vaerä iporookuai jare jeko rupi ramo, iyarasɨ jare oyapo reta kuae.”
60Mburuvicha guasu pe ipöra kuae yemongeta, jaeramiño vi isundaro ruvicha reta pe, jayave omondo ñeeröɨsa Israel-ɨgua reta pe, jare jae reta ikɨ̈reɨ chupe,
61mburuvicha guasu jare ïru tuvicha reta ndive omogüɨ̈rakua iñee rupi kuae yemongeta, jae ramo, Israel-ɨgua reta oë iñepɨ̈roa güi,
62ërei mburuvicha guasu ou yave oväe ɨvɨtɨ Sión pe jare oecha yave mbaetɨ etei jëgua, oipoepɨ iyemongeta jare oyókuai opa vaerä omboai tëta ikësea oguambɨ guasu.
63Joko güi ojo rai rai Antioquía kotɨ, jare oecha ko Filipo oyemboiya ma jókuae tëta guasu re, opüa jese jare opɨ̈ro ye chugüi jókuae tëta.
Who We AreWhat We EelieveWhat We Do
2025 by iamachristian.org,Inc All rights reserved.
