SABIDURÍA 11 - Guarani Bible with DC

1Jae omee nerëta reta iparavɨkɨ oë kavi vaerä chupe

Moisés rupi, neñeemombeúa ikɨambae vae.

2Oikúaasa ɨvɨ ipombae vae

jare oyembojeyupa reta ñuu tapembae vae rupi;

3oyemboɨ reta jovaicho reta pe

jare güɨröɨro reta imotareɨa reta.

4Iɨuve reta yave, oyerure reta ndeve,

jare ita jaimbe vae güi, ita täta vae güi,

remee ɨ chupe reta iɨuve omboasa vaerä.

5Jökorai etei vi jovaicho reta opa oiporara

jare oyeokuaiuka nerëta ipo reta pe jasɨ katu iara yave.

6Tovaicho reta mbaetɨ oväe iɨ̈aka pe ɨ tɨpambae vae,

jaeño ma oväe reta chupe ɨ juumbai vae, tugüɨ katuai jare tuyuapo vae,

7oiporara reta michia reta oyukauka vae jeko pegua,

ërei ngatu, nerëta ipo reta pe, oekambae reve,

remee chupe reta ɨ jeta rupi.

8Jökorai, opa ma yave ɨuve remboasa chugüi reta,

reechauka chupe reta kërai jovaicho reta pe reiporarauka vae.

9Jae reta oiporara vi, yepe mboroaɨu reve reyapo jókuae chupe reta oikuaa vaerä,

oikuaa reta vi tembiporara jeko kavimbae reta oiporaragüe vae,

ndearasɨ reve, reinupa reta vae.

10Nerëta ipo reta rembosɨmbi

michia tu imichia oyemboeta vae rami,

ërei tovaicho reta pe reechauka

metei mburuvicha guasu ipɨapochɨ vae oyapo rami.

11Yepe jëta pe oï ani ramo ïkotɨa jëta güi,

oyovakei oiporara reta mbɨatɨtɨ;

12mbɨatɨtɨ jare mbaerasɨ ojo yoapɨ apɨ chupe reta

imaendúa reta mbae oasagüe re yave,

13echa, oikuaa reta jókuae jembiporara ae

jare kuri oimeta maia nunga vae güeru nerëta ipo reta pe,

oecha reta nde etei ko, Tumpa, jókuae reyapo vae.

14Moisés indei oiko yave oeyauka reta,

jare taɨkue rupi omombo reta opuka jese reve,

ërei jaɨkue rupi ojo omboete reta omae jese.

Iɨuve jeko kavimbae reta oiporaragüe vae

ambuaeyee ko pea jupi vae reta oiporara vae güi.

Tumpa omaeiño ma Egipto re vae

15Imbaeyavɨ jeko pegua oiporara jare oikuaa kaviä vi,

jókuae jae omee chupe ombaeyavɨ vaerä omboete vaerä

mboi reta oikuaa kavimbae reve jare ïru mɨmba ikavimbae vae reta,

rembou chupe reta mbae mɨmba ikavimbae vae reta,

16oikuaauka vaerä chupe opaño mbae rupi kuimbae oyapo mbaeyoa vae,

jókuae rupi eteiño vi ko oiporarata vae.

17Ndepo täta imbaepuere vae,

mbae oyekuaambae vae rupi oyapo ɨvɨ,

ipuere tei viña yavaimbae reve ombou ikotɨ

oso jeta vae ani ramo yaguapope pochɨ vae reta,

18ani ramo oyapo ïru mɨmba pochɨ vae, yaikuaambae vae reta,

jare, ipɨ̈túe rupi tata omoë vae reta,

ani ramo ipüae vae rupi tätati omoë vae reta,

ani ramo jesa rupi opiriri vae yavaetegüe vae omombo vae reta,

19jókuae reta yogüeru yave ngaraa yogüeru opokoiño jese jare oyuka oeya,

oyeechauka chupe güiño ko

kɨɨye oyukata.

20Jaema jókuae oiko mbae reve,

nepɨ̈túe pe opata reaɨkuemoña reta jupigüe rupi

jare opata reyakambɨ reta ndembaepuere pe.

Ërei ngatu, nde opaete reñono mboki rupi

jare jenda jenda rupi ae oyoavɨmbae reve.

Mbae jeko pegua Tumpa ipɨaguasu vae

21Nde ndepuere, güɨramoiño, reyapo mbae mbaepuere tuichagüe rupi;

¿kia pa jösata ndeyɨva ipɨ̈ratagüe vae pe?

22Echa opaetei ɨvɨ nderóvai

mbae oñejäa pɨpe vae pe oñeñono vae michi vae rami ko,

ani ramo ɨsápɨi otɨkɨgüe

köe pota ma yave ɨvɨ re oa vae rami ko.

23Ërei ngatu, nde opaete vae peko reiparareko,

echa opaete re ko ndembaepuere

jare mbaetɨ vi remae kuimbae reta imbaeyoa re,

oyembopɨambuae reta vaerä.

24Reaɨu ko opaete mbae oikove vae reta

jaema mbaetɨ ko remotareɨ nderembiapogüe reta;

echa oime mbae nunga remotareɨ yave, ngaraa reyapo viña.

25¿Këraita pa yogüɨreko mbae oikove vae reta

nde reipotaä yave?

¿Këraita pa oiko oiko reta

nde mbaetɨ opa jenda rupi reñono yave?

26Nde ko opaete vae reiparareko vae,

echa opaete ko Tumpa, nde ndembae,

jaema nde reaɨu ko opaete oikove vae reta,