ECLESIÁSTICO 30 - Guarani Bible with DC

Yemboe ñemuña reta kotɨgua

1Kia ñavo oaɨu imichia vae ngaraa oinupambae,

jaema iyapɨ pe oyeroviata ko kuri omae jese.

2Kia ñavo omboe kavi imichia vae ipɨakatuta ko opɨta,

jaema kia oikuaagüe reta jóvai oyemboeteta ko opɨta jese.

3Kia ñavo omboe imichia vae ombopɨamiita ko pɨpe jovaicho,

ërei jovaicho reta jóvai tätata oyerovia katu jese.

4Tu omano yave, mbaetɨechata ko omano,

echa oeya metei jae rami etei vae.

5Oikoño oiko yave, oyerovia katu omae oecha yave,

jaema omano yave mbaetɨ ipɨatɨtɨ opɨta.

6Echa oime oeya kia oepɨ reta vaerä jovaicho güi,

jare ichëi vae reta ndive oyerovia katuta ko.

7Kia taɨ re oyeaeä yae vae, kuri iperegüe oyokua chugüi vaerä ko,

jare oendu jäse yave ipɨa pe etei ko jasɨta.

8Kavayu imaso mbae jekoraitɨ yae ma ko oyeapo,

jaema michia re oñemaeño vae oyeyuru mondorota ko.

9Ndepɨakúe katu nderaɨ pe, jare jae ndemborɨta ko kuri;

ndeyurungiche jae ndive, jaema ndemboyaeota ko kuri.

10Agüɨye eyembovɨa vɨa jae ndive, neäteɨ reiporara jae ndive yave

jaema reota ndeapɨ yembopɨaä yavaetegüe pe.

11Agüɨye embotuicha itaɨrusu reve

jare agüɨye emaeiño jese ikavimbae oyapo yave.

12Taɨrusu oï ramboeve, toiko rerea rupi,

jare einupa indei oï ramboeve,

agüɨye vaerä oyemboekopochɨ ndeve jare oyeapa nderé

jare täta ndembopɨatɨtɨ.

13Emboe kavi nderaɨ jare eyókuai ñeeäta ndive,

agüɨye vaerä mbae oata chupe yave oyeapa nderé.

Ikavi vae jare yerovia

14Má ko jaekavi mbaravete mbaetɨ maratu yaiko reve vae

pea oikokatu vae oikoño mbae vae güi.

15Oipota jaekavi oiko vae oro rami vae,

jae ñemoäta ngatu ikavigüe ita ipöra yae vae rami vae.

16Mbaetɨ ko yemboikokatu má tuichata yanderete pe mbaetɨ maratu yaiko vae güi,

ani ramo má tuicha yerovia güi vae.

17Má ko ikavi mano jókuae yaiko kavi mbae vae güi,

jare mbutuu opambae yaiporara avei yaiko vae güi.

18Ñamee tembíu ikavigüe jou vaerä kia ipuere mbae okaru vae

metei mbota yaraja tumpa-raanga pe rami ko.

19¿Mbaerä ya ikavita jókuae tumpa-raanga reta pe,

ipuere mbae okaru vae jare mbae oëtu mbae vae pe?

Jökorai etei ko oasa kia mbaeyekou güɨnoigüe pe

mbaetɨ oyerovia oiko vae.

20Omae jese jare ipɨayekɨita,

metei kuimbae oyeapiaogüe kuñatai oiküava oiko rami ko.

21Agüɨye eñemee mbɨatɨtɨ pe,

jare eiporarauka ndeyeupe ndeyemongeta pe.

22Yerovia yandepɨa pegua jae ko kuimbae oiko jese vae,

yerovia ko omee oikopuku vaerä.

23Eñemokïrii, emokïrii ndepɨa

jare embosɨrɨ ndeyeugüi mbochɨ,

echa tekorai jeta jei vae ma ko oporoyuka

jare mbochɨ mbaetɨ ko güeru mbae ikavigüe.

24Ñemopɨamii jare ñoraro reta ko tekove ombochutu,

jare yemoambeko reta ko jare oporombondechi rai vae.

25Yandepɨa yerovia katu ñaï vae metei tembíu ikavigüe

kia jou vae pe ikavi rami ko.