1Ara oikuaauka Tumpa iyemboetea,
ara ipo reta oikuaauka Tumpa jembiapo.
2Ara reta jare pɨ̈tu reta oikuaauka vi oyoupe jókuae.
3Mbaetɨ kia jei ñee,
mbaetɨ vi oyeendu ñee.
4Ërei jërakua opaete ɨvɨ rupi,
oupitɨ opaete ɨvɨ iyapɨ rupi.
Jese oñono kuaraɨ jendarä.
5Jare kuaraɨ, omenda ramo vae jo güi oë rami,
oñoñókuai vae oyerovia reve osɨi vae rami.
6Araɨpɨ kotɨ güi ko oë,
jare ojo oike jovaicho kotɨ,
jare mbaetɨ etei oñemi jakuvogüe güi vae.
7YandeYa iporookuai jupigüe ko, oporopoepɨ vae ko;
yandeYa iporookuai jupi ko,
arakuaa oupitɨ katumbae pe omee arakuaa.
8Sɨmbi ko yandeYa iporookuai reta, oporomboyerovia vae,
ikɨambae ko yandeYa iporookuai,
oechauka opaete mbaembae vae.
9YandeYa güi yaipoɨu vae ko ikɨambae jare jekuae avei vae;
yandeYa iporookuai añete ko jare jupi ko opaete.
10¡Ipotaa yae ko oro güi, oasa yé ipotaa oro ikɨambae güi!
¡Jëeasɨ yae ei güi, ñana rupigua ei güi!
11Jaeramiño vi che nderembiokuai ayemboarakuaauka pɨpe;
ayapo yave, chemboyekou yae.
12¿Kia pa ipuereta oikuaa imbaeyoa reta?
Chereepɨ mbaeyoa reta aikuaambae oï cheré vae güi.
13Che nderembiokuai, cheövatu vi pɨapochɨ güi,
agüɨye togüɨnoi mbaepuere cheré;
jayave opaeteita chekɨambae reve aiko,
jare aiko teeta chekɨambae pɨapochɨ güi.
14Ñee reta ikavigüe toë cheyuru güi,
jare chepɨa güi cheyemongeta oë vae nderóvai,
cheYa Tumpa, ita guasu cheñepɨ̈roa, chereepɨ vae.
Who We AreWhat We EelieveWhat We Do
2025 by iamachristian.org,Inc All rights reserved.
