NÚMEROS 31 - Guarani Bible with DC

Israel iñemuña reta oyepɨ Madián pegua reta re

1YandeYa jei Moisés pe:

2“Eyepɨ Madián pegua reta re Israel iñemuña reta pe, jókuae jaɨkue rupi remanota.”

3Jayave Moisés jei opaete vae pe:

—Pegüi ambuaegüe reta toyupavo jembiporu reve reve ñeraro peguarä, jare toyogüɨraja toporepeña Madián pegua reta re, toyepɨ yandeYa jee re.

4Opaete Israel iñemuña reta güi ñemuña ñavo tomondo mil kuimbae reta ñeraro pe.

5Jökorai opaete Israel iñemuña reta güi omondo reta mil kuimbae, ñemuña ñavo güi, opaete reve doce mil jembiporu reve reve oñeraro vaerä.

6Jare Moisés omondo ñeraro pe Finees sacerdote Aarón taɨ ndive, jae güɨraja vaso reta o mbaemboetea pegua, jare mimbɨguasu ipo pe omoñee vaerä.

7Jare oñeraro reta Madián pegua reta ndive, yandeYa oyókuai Moisés rami, jare oyuka reta opaetei kuimbae reta.

8Jare oyuka reta mburuvicha guasu Madián pegua reta: Evi, Requem, Zur, Hur jare Reba; pandepo mburuvicha guasu reta. Jare oyuka reta vi kɨsepuku pe Balaam, Beor taɨ.

9Jare Israel iñemuña reta opa güɨraja tembipɨɨrä kuña reta Madián pegua, jare michia reta, jare opaetei jɨmba reta; opaetei opɨ̈ro chugüi reta imbaembae;

10jare oapɨ reta opaete tëta guasu, jare iyɨvɨrigua tëta raɨ reta jare jeyupa reta.

11Jare opaete mbaembae opɨ̈rogüe, kuña jare michia reta jare mɨmba reta,

12güeru reta Moisés pe, sacerdote Eleazar jare opaete Israel iñemuña reta pe, Moab pegua ñuu, ɨ̈aka Jordán iyɨpɨ pe, Jericó re katu.

13Moisés, jare sacerdote Eleazar jare opaete mburuvicha reta, ñogüɨnoe oövaiti teyupa güi ikatu pe.

14Ërei Moisés iyarasɨ sundaro mil vae reta juvicha pe jare cien vae reta juvicha pe, ñeraroa güi oyerova reta ye vae pe,

15Jare jei chupe reta:

—¿Maera pa pemaeño oikove opaete kuña reta?

16Mase, Madián pegua kuña reta jeko pegua ko, Israel iñemuña reta oyemboyovaicho yandeYa kotɨ, omboete reta Baal-peor, Balaam iporomboarakuaa rupi, jáeramo ko ou mbaerasɨ pɨ̈chɨi yae vae oparapiti, opaete vae reta re.

17Peyuka opaete michia kuimbae reta; jare opaete kuña oasa ma kuimbae ndive vae reta.

18Ërei pemaeño toikove opaete kuñatai reta ndei kuimbae ndive oasa vae reta.

19Pe reta, oipotagüe oporoyuka vae, ani tëogüe oyavɨkɨ vae, topɨta teyupa güi ikatu pe chiu ara; jare peyetɨo jare vi perembipɨɨ reta mboapɨa ara pe jare chiúa ara pe.

20Jare peitɨo vi opaete temimonde reta, jare oipotagüe mbae mɨmba ipire pegua, kavara jaa pegua, jare opaete tembiporu ɨvɨra pegua.

21Sacerdote Eleazar jei kuimbae reta ñeraroa güi yogüeru ye vae pe:

—Kuae ko jae mborookuai yandeYa omee Moisés pe vae:

22Oipotagüe mbaembae oro pegua, korepoti pegua, jiero iyu vae pegua, jiero pegua, estaño jare plomo pegua,

23opaete mbaembae tata pe jösa vae, tata pe peitɨo; jare ɨ pe peitɨo opaete mbaembae mbaetɨ jösa tata pe vae reta.

24Jare chiúa ara pe peputuka peremimonde, jökorai yave pepɨtata ikɨambae; jayave ramo peike teyupa pe.

Mbaembae oñepɨ̈rogüe oyemboyao vaerä

25YandeYa jei Moisés pe:

26“Sacerdote Eleazar jare opaete vae itenondegua reta ndive, peipapa opaete mbaembae oñepɨ̈rogüe, mɨmba reta jare kuimbae reta,

27pemboyao mbɨte rupi; mbɨte pemee ñeraroa pe yogüɨraja vae reta pe jare ïru mbɨte opaete vae pe.

28Jare embosɨrɨ cheve jókuae ñeraro regua reta imbaerä vae güi, quiniento vae güi metei, kuimbae ani güeye yepe, mburika ani vecha yepe

29jare emee sacerdote Eleazar pe mbɨte rupi, mbota cheveguarä.

30Jare jókuae Israel iñemuña reta imbaerä vae güi, cincuenta güi metei, kuimbae ani güeye yepe, mburika ani vecha jare oipotagüe mɨmba jare pemee Leví iñemuña reta chero pe oparavɨkɨ vae reta pe.”

31Moisés jare sacerdote Eleazar oyapo yandeYa oyókuai Moisés vae rami.

32Jare sundaro ñeraro pegua reta opɨ̈ro vae güi jembɨregüe jae ko, seisciento setenta y cinco mil vecha,

33setenta y dos mil güeye,

34sesenta y un mil mburika

35jare treinta y dos mil kuñatai reta ndeiño kuimbae ndive oasa vae.

36Jare ñeraro pe yogüɨraja vae reta peguarä vae jae ko, tresciento treinta y siete mil quiniento vecha,

37jare yandeYa peguarä jae ko, seisciento setenta y cinco;

38güeye, treinta y seis mil; jare yandeYa peguarä vae jae ko, setenta y dos;

39mburika, treinta mil quiniento; jare yandeYa imbaerä sesenta y uno.

40Jare kuimbae reta, diecisei mil; jare yandeYa imbaerä treinta y dos.

41Jare omee Moisés yandeYa peguarä mbota, sacerdote Eleazar pe, yandeYa oyókuai rami.

42Jare Moisés omboyao ñeraro pe yogüɨraja vae reta güi Israel iñemuña reta peguarä vae, jae ko,

43ïru reta rami etei: Tresciento treinta y siete mil quiniento vecha,

44güeye, treinta y seis mil,

45mburika, treinta mil quiniento

46jare kuñatai reta, diecisei mil;

47jare jókuae mbɨte rupi omee Moisés Israel iñemuña reta pe vae güi oekɨ cincuenta ñavo güi metei, kuimbae ani mɨmba yepe, jare omee Leví iñemuña reta pe, yandeYa jo pe oparavɨkɨ vae reta pe, yandeYa oyókuai Moisés vae rami.

48Jare yogüeru Moisés oïa pe sundaro mil vae jare sundaro cien vae juvicha reta

49jare jei reta Moisés pe: “Roipapa kuimbae ñeraro pegua reta rogüɨnoi orepo pe vae, jare mbaetɨ oata metei ave.

50Jáeramo, rogüeru mbota yandeYa pe metei ñavo roväe chupe mbae ikavi vae oro pegua, yɨva regua, poapɨ regua, moäka-vera, namicha jare mboɨ Tumpa iñɨ̈ro vaerä oreyoa re.”

51Moisés jare sacerdote Eleazar oipɨɨ chugüi reta opaete mbaembae oro pegua jare mbaembae ikavi yae vae.

52Jare opaete oro omee jókuae sundaro mil vae jare sundaro cien vae juvicha reta vae, oyeapo ciento ochenta y cuatro kilo oasa,

53echa metei ñavo sundaro reta güeru iyeupe jovaicho reta güi opɨ̈rogüe.

54Jayave Moisés jare sacerdote Eleazar oipɨɨ chugüi reta ioro, jare güeru reta tupao guakapi pegua pe, oime vaerä yemomaendúa yandeYa jóvai Israel iñemuña reta re.