ECLESIÁSTICO 48 - Guarani Bible with DC

1jare ojo ou metei ñeemombeúa tata rami vae,

jae ñee jeigüe vae horno jendɨgüe rami vae.

2Jae opa tembíu opɨ̈ro chugüi reta

jare iyarasɨ jeko pegua mbovɨ michiño omboembɨre reta.

3Tumpa jeigüe vae rupi oyapo okɨmbae vaerä,

jare mboapɨ ye oyapo tata oa vaerä.

4¡Yavaete yepi ko, Elías!

¡Mbaetɨ yé ko kia tuicha vae nde rami vae!

5Nde ko remopüa ye metei omanogüe vae;

¡Tumpa jemimbota rupi ko reekɨɨye mano ipo güi!

6Nde ko mburuvicha guasu reta imbaepueregüe vae opa reraja tɨvɨa pe

jupa güi imbaerasɨ ñogüɨnoi vae güi.

7Nde ko reendu Horeb pe, ɨvɨtɨ Sinaí re,

yepopeyu jare tembiporara oiko vae.

8Reñono tee mburuvicha guasu reta jupigüe vae oyapo vaerä

jare metei ñeemombeúa nderekovia pe oiko vaerä vae.

9Jare reyererajauka ara kotɨ metei kusumiruu guasu pe

tata tuichagüe ou vae pe.

10Oyekuatía oï Tumpa etei ndeparavo ma kuri reyu ye vaerä

Tumpa iyarasɨ rembogüe kuri,

ndei Tumpa iara ou oväe mbove,

remoɨ̈rouka vaerä oyoupe ñemuña retaa tu reta ndive,

jare oiko ye vaerä ñemuña Israel pegua reta.

11¡Yerovia tuichagüe vae ko kia ndei remano mbove ndereecha vae pe,

jare má ko yerovia tuicha oimeño reikove rei vae regua!

Eliseo

12Metei kusumiruu guasu pe Elías okañɨ ma yave,

Eliseo opɨta tɨnɨe espíritu pe;

jae mókoi ye ma oyapo mɨakañɨ reta,

jare opaete mbae jeigüe vae oporomopɨakañɨ.

Oikove oiko ramboeve mbaetɨ ko orɨrɨi kia jóvai,

jare mbaetɨ vi kia ipuere jese.

13Chupegua mbaetɨ etei ko mbae yavai,

jare metei omano oï vae iárambo oyapakua vae pe omoingove ye.

14Oikove oiko yave oyapo mɨakañɨ reta,

jare omano jaɨkue rupi jekuaeño oyapo mbae oporomopɨakañɨ vae.

15Jare, jökorai reve, tëta reta mbaetɨ oyerova Tumpa kotɨ

jare mbaetɨ imbaeyoa oeya reta.

Jare güɨramoiti opa oyemombouka reta iɨvɨ ae güi

jaema opa vaerä oñemoai opaete ɨvɨ rupi.

Mburuvicha guasu Ezequías jare ñeemombeúa Isaías

16Ërei mbovɨ michi opɨtaño Judá pe,

mburuvicha guasu reta David iñemuñagüe reta güi ou vae pɨri.

Amogüe reta jekuaeño jupi rupi yogüɨreko,

ërei ïru vae reta oyapo teko tuicha vae.

17Ezequías omoëguaä etei jëta,

güɨraja ɨ güɨroväe iyɨvɨte pe

tembiporu jiero iyu vae pegua pe omombu ita,

jare ɨvɨtɨ reta ipäu pe oyapouka ɨrɨrurä.

18Jókuae ara rupi, Senaquerib oñemopüa jese

jare ombou metei isundaro reta juvicha tuicha vae,

jare jókuae ou güɨrave opoko tëta guasu Sión re

jare oyembotuicha reve oyovaicho Tumpa re.

19Tëta ipo reta oyapayere kɨɨye güi jare mbaerasɨ güi,

kuña jɨerasɨ oï vae rami.

20Oyerure reta Tumpa ɨvate ete pe oï vae kotɨ

oupi reve ipo reta ikotɨ.

Jare Tumpa oendu iyerure chupe reta

jare opa güɨroasayepe reta Isaías rupi.

21Opoko asiriaɨgua reta jeyupa re,

jare täta oporoiämondo joko pe mbaerasɨ pɨ̈chɨigüe vae pe.

22Ezequías oyapo ikavi vae,

ojo David jeko rupi

jare Isaías jae ko ñeemombeúa tuicha vae iporomboe

jare mbae oikuaa vae regua vae opaete güɨrovia jese vae.

23Jókuae ramo, jókuae ara pe kuaraɨ ou ye jaɨkue kotɨ

jare omee mburuvicha guasu oikopuku vaerä.

24Mbaepuere tuicha vae pe iyarakuaa, Isaías oecha kuri mbae oikota vae

jare opa ombopɨakatu Sión pe ipɨatɨtɨ ñogüɨnoi vae reta.

25Omoërakua kuri mbae oikota vae opambae vae regua,

jare mbaembae reta oikota vae opa omombeu ndei oiko mbove.