PROVERBIOS 31 - Guarani Bible with DC

Yemboeta mburuvicha guasu pe

1Mburuvicha guasu Lemuel iñee reta, ichɨ omboe jese vae reta, jei körai:

2Chemembɨ, cherɨe güi oëgüe,

cheTumpa amoñera jese vae omee cheve vae,

¿mbae yé pa jaeta ndeve?

3Agüɨye eyuvanga ndeyé kuña reta rupi,

echa jókuae rupi mburuvicha guasu reta oñererokomegua.

4Chemembɨ Lemuel, mbaetɨ ko ikavi mburuvicha guasu reta jare imborɨa reta jou vaerä vino jare mbae oporombosavaɨpo vae,

5echa okau reta yave, güɨramoi iñakañɨ retata mborookuai güi,

jare güɨrova paravete vae reta güi jupi vae.

6Eeya vino jare mbae oporombosavaɨpo vae,

ipɨtu jare ipɨatɨtɨ yae vae reta pe;

7tokau reta jare toñemoakañɨ reta mbae oata chupe vae güi,

jare jasɨ katu rupi yogüɨreko vae güi.

8Eñemoë mbaetɨ iñee vae reta re;

¡eepɨ, ipuerembae oyeepɨ vae reta!

9Eñemoë jese reta, jare eyapo jupi vae;

¡eepɨ, paravete vae reta jare mbae re oata vae reta!

Kuña yarakuaa jare jeko kavi vae

10Kuña jeko kavi vae, ¿kia pa ipuereta oväe?

¡Echa jeko oasa ete yé ko ikavi, ita ipöra yae vae güi!

11Ime güɨrovia katu avei omae jese,

jare mbaetɨi mbae oata chupe.

12Oyangareko kavi ime re, opaete ara oikove oiko ramboeve.

13Oeka iyeupe vecharaagüe jare mandɨyu,

jare ikɨ̈reɨ ngatu reve ombaapo.

14Metei barco güeru jeta mbae oñemee vaerä rami,

jökorai güeru mombɨrɨ güi iyeupe jembiurä.

15Ndei köe mbove opüa,

omongaru imembɨ reta,

jare jembiokuai reta pe omombeu iparavɨkɨrä.

16Oiparavo reve kavi ogua ɨvɨ,

jembiapo jepɨgüe pe oñotɨuka uva.

17Oyeumbɨkua kavi oparavɨkɨ vaerä,

jare jäta ngatu reve omboɨpɨ oparavɨkɨ.

18Oyangareko kavi iparavɨkɨ oguata kavi vaerä,

pɨ̈tu yave ave opoi raiviä iparavɨkɨ güi.

19Imaepövase yae, mbaetɨ opoi ëɨ güi.

20Omborɨ avei paravete vae reta,

jare mbae re oata yae vae reta.

21Mbaetɨ ipɨatɨtɨ imembɨ reta re iroɨ oa oï yave,

echa opaete imembɨ reta jemimonde yandambusugüe päve.

22Jae etei oyapo iyeupe asoya,

oyemonde temimonde pɨ̈taü vae pe jare lino oyeambae pegua katuai pe.

23Ime, jërakua kavi yae tëta guasu jöke pe,

oguapɨ yave jókuae tëtaguasu pegua tenondegua reta ipɨte pe.

24Jae oyapo temimonde ipöra vae jare kuakuaa,

jare omee omae vae reta pe.

25Oyemonde temimonde tätagüe pe jare ipöra yae vae pe,

mbaetɨ etei oyemoambeko pɨareve peguarä vae re.

26Imiari yarakuaa katu reve,

iporoaiu reve kavi oporomboarakuaa.

27Jo pegua reta re oyemoambeko;

mbaetɨ oiko ïru vae iparavɨkɨagüe reño.

28Imembɨ reta opüa yave jei reta chupe “oyerovia katu vae”;

jare ime omboete vi körai:

29“Oime jeta kuña jeko kavi vae,

ërei nde oasa ete yé chugüi reta.”

30Ipöra vae, ipöra raangaiño ko, mbaeä etei ko;

ërei kuña oipoɨu yandeYa güi vae, jókuae ko imboeteata.

31¡Pemboete, opaete vae reta jóvai!

¡Pemboete opaete oyapogüe re, tëta guasu jöke pe!