SALMOS 37 - Guarani Bible with DC

SALMO 37Jeko kavimbae reta jeko

1Jeko kavimbae reta jeko pegua agüɨye ndearasɨ;

agüɨye vi ndeakatúä jupimbae oyapo vae reta re.

2Echa opata jarembaeño ñana rami,

¡opata ipiru ñana rokɨ rami!

3Eyeko yandeYa re, jare eyapo ikavi vae;

reikota ɨvɨ pe, jare jae ndeangarekota jupi rupi.

4Eyerovia katu vi yandeYa re,

jare jae omeeta ndeve ndepɨa reve reiporu vae.

5Eñeñono yandeYa ipo pe,

eyeko jese, jare jae ndemborɨta ko.

6Omboyekuaata jupi rupi reiko vae tembipe rami,

jare ndereko kavi ara mbɨte pe ma kuaraɨ rami.

7Nekïrii eiko yandeYa jóvai, jare eäro.

Agüɨye neñeenguru oiko kavi vae kotɨ,

jókuae kuimbae oyapo ikavimbae vae kotɨ.

8Eeya arasɨ, esɨrɨ mbochɨ güi;

agüɨye etei eñemokɨ̈reɨ reyapo vaerä ikavimbae.

9Echa jeko kavimbae reta oñemokañɨteita ko;

ërei ngatu yandeYa re oyeko vae reta,

güɨnoita ɨvɨ imbaerä.

10Jarembaeño mbaetɨta ma yogüɨreko jeko kavimbae reta,

peeka tëita ñogüɨnoia rupi,

ërei mbaetɨta peväe chupe.

11Ërei oñemomichi vae reta,

güɨnoita imbaerä ɨvɨ,

yogüɨreko pɨagüiveta mbɨakatu rupi.

12Iyoa vae oeka oyapo vaerä ikavimbae jupi vae kotɨ,

omotareɨ yae omae jese.

13Ërei yandeYa oyoyaiñota,

echa oikuaa köiño ma ou oiporara vaerä.

14Iyoa vae reta güɨnoe ikɨsepuku jɨru güi jare omoata igüɨrapa,

oyuka vaerä paravete vae jare mbae oata chupe vae,

¡oyuka vaerä jeko kavi vae reta!

15Ërei ikɨsepuku pe aeño omanota,

jare igüɨrapa reta opata oñemopë.

16Jupi vae mbovɨ mbae güɨnoi vae ikavi ko,

iyoa vae reta jeta mbaeyekou güɨnoi vae güi.

17Echa iyoa vae reta opata ko,

ërei jupi vae reta omborɨ vae jae ko yandeYa.

18YandeYa oyangareko jupi yogüɨreko vae re,

jae reta imbae ɨvɨ oikota jekuae avei rupi.

19Ngaraa oñemomaraiuka oime yave mbae oata,

karuai yave jae reta güɨnoita tembíu.

20Ërei iyoa vae reta omanota,

yandeYa jovaicho reta opata ókai vecha kuimbae ikɨragüe rami,

opata okañɨtei reta tätati rami.

21Iyoa vae ombaeporu yave mbaetɨ omboepɨ;

ërei jupi vae iporoparareko jare omee ngatu.

22Echa yandeYa iporerekua jese vae güɨnoita ɨvɨ,

ërei oyepopeyu jese vae okañɨteita.

23YandeYa ko oñono kavi kuimbae kërai oiko vaerä,

chupe jaekavi vae rupi;

24maratu oasa yave, ngaraa opɨta jökorai,

echa yandeYa ko omborɨ.

25Chetaɨrusu güive añave chendechi pe,

mbaetɨi aecha jupi vae imborɨambae vae,

ani iñemuña reta oyerure tembíu re vae.

26Ara ñavo iporoparareko jare oiporuka mbae,

iñemuña reta yogüɨreko iporerekua vaerä.

27Eyembosɨrɨ ikavimbae güi jare eyapo ikavi vae,

jare reikota jekuae avei pegua.

28Echa yandeYa oaɨu isɨmbi rupi mbae oyeapo vae,

mbaetɨ oeya oñeñono tee chupe vae reta,

oyangarekota jese reta jekuae avei;

ërei iyoa vae reta iñemuña opata okañɨtei.

29Jupi vae reta güɨnoita imbaerä ɨvɨ,

jare yogüɨreko aveita jókuae ɨvɨ pe.

30Jupi vae, iñee omoë yarakuaa katu reve,

imiari jupi rupi.

31ITumpa iporookuai oï ipɨa pe,

jáeramo ngaraai ogüɨapi.

32Iyoa vae oipïaro jupi vae,

oipota oyuka.

33Ërei yandeYa ngaraa omaeño oa ipo pe,

ngaraa vi omaeño oyemboekouka oñejäa yave.

34Eyeko yandeYa re,

eyapo jae jemimbota,

jae ndembotuichata jare omeeta ndembaerä ɨvɨ.

¡Iyoa vae reta oñemokañɨteiuka yave, reechata!

35Aecha iyoa vae ipɨayemboete yae,

oyembotuicha, ɨvɨra jokɨ katu vae jäka oyembotuicha rami.

36Ërei opa oasa, jare mbaetɨ ma oiko,

aeka tëi, ërei mbaetɨ ma aväe.

37Emae jupi oiko vae re,

echa oime yerovia katu jókuae kuimbae mbɨakatu rupi oiko vae pe.

38Ërei ipɨapochɨ vae reta metei jeia pe oñemokañɨteiukata,

iyoa vae reta opata okañɨtei.

39Ërei jupi vae reta iyereroasayepe ou yandeYa güi,

jae ko iñepɨ̈roa mbɨatɨtɨ iara pe.

40YandeYa omborɨta jare oepɨta,

oepɨta iyoa vae reta güi jare güɨroasayepeta,

echa yandeYa reño oyeko reta.