ISAÍAS 10 - Guarani Bible with DC

1Tumpa jei: ¡Peparavete, pe peyapo mborookuai reta jupimbae vae,

jare jókuae rupi peiporarauka pepïrimbae,

2mbaetɨ vaerä peyapo jupi vae paravete vae reta pe,

pemboeteä etei vaerä paravete vae reta kuae tëta chembae vae pegua,

peyuvanga vaerä imemano vae reta re,

pepɨ̈ro vaerä mbae tɨ̈reɨ reta güi!

3¿Mbae pa peyapota ou yave oväe ara peiporara vaerä opaete kuaekuae re?

¿Kia re pa peyekota pemborɨ vaerä, ou yave matɨ güi oiporarauka vaerä peve vae?

¿Kia pe pa peeyata pembaeyekou reta?

4Che mbaetɨ yave aï pe ndive, peñemomichiukata tembipɨɨ reta ndive,

jare pemanota oyeyukauka vae reta ndive.

Ërei yandeYa mbaetɨ iyarasɨ poi;

jekuaeñoi iyarasɨ oï.Tumpa oiporu tëtaguasu Asiria

5Echa Tumpa jei: “¡Tëtaguasu Asiria!

Jae ko popoka ɨvɨra pegua aporonupa pɨpe chearasɨ yave vae,

ipo pe añono chearasɨ.

6Amondota jókuae tëtaguasu iyoa vae kotɨ,

jókuae tëtaguasu chemboarasɨuka vae kotɨ,

opɨ̈ro vaerä chugüi imbaeyekou reta,

oñepɨ̈ro vaerä jese, tuyuapo re oñepɨ̈ro rami.

7Ërei mburuvicha guasu Asiria pegua mbaetɨta jökorai oyemongeta,

iyemongeta ambuaeyee ko.

Iyemongeta pe jaeño oipota opa oporomboai,

ikɨ̈reɨ opa omboai jeta tëtaguasu reta.

8Echa jae jei: ‘Opaete mburuvicha guasu, chepo pe ko ñogüɨnoi.

9Cheveguarä, oyovakeño ko tëta guasu Calno tëta guasu Carquemis ndive,

tëta guasu Hamat oyovake ko tëta guasu Arfad ndive,

tëta guasu Samaria oyovakeño ko tëta guasu Damasco ndive,

tëta guasu amoamɨrigüe reta.

10Aväe tëtaguasu reta itumpa-raanga reta jeta yae vae,

jeta itumpa-raanga reta Jerusalén güi jare Samaria güi vae.

11Samaria pe ayapo rami jare itumpa-raanga reta pe ayapo rami,

¿mbaetɨta pa chepuere ayapo jökorai Jerusalén jare itumpa-raanga reta?’ ”

12Ërei yandeYa opa ma oyapo ɨvɨtɨ Sión pe jare Jerusalén pe oyapota vae yave,

oinupata mburuvicha guasu Asiria pegua,

ipɨapochɨ jare ipɨayemboete rupi oyapo jeko pegua.

13Echa mburuvicha guasu Asiria pegua jei:

“Chembaepuere rupi ko ayapo kuae,

chearakuaa katu rupi ko ayapo.

Tëtaguasu reta güi opa apɨ̈ro iɨvɨ,

jare imbaembae jepɨ vae,

amoamɨri juvicha reta.

14Aipɨɨ tëta reta imbaembae jepɨ vae,

jare opaete iɨvɨ,

kia nunga vae güɨraja güɨra jupía

jaitɨ pe oeyagüe rami,

jare mbaetɨ kia ave oyemboavevo vae,

ani iyuru ave mbaetɨ opopira ani omoë iñee vae.”

15¿Ipuere pa yɨɨ oyererovia katu,

pɨpe ombaeasɨa oï vae güi?,

ani ¿siera oyererovia katu imomɨia güi?

Popoka ɨvɨra peguaño vae,

¿ipuere pa jae oupi iya?

16Jáeramo, yandeYa Tumpa Imbaepuere yae ete vae,

opɨ̈rota Asiriaɨgua imbaepuere yae vae reta güi imbaepuere,

jare oyatapɨta oyemboete jese vae re.

17Jare Tumpa Iyoambae, tembipe Israel pegua,

oïta tata jendɨ vae rami,

metei ara pe opata omboai

opaete ñana jare yuu reta.

18Kaa jare ko ipöragüe opaeteita omboai,

imbaerasɨ vae ipuereä etei rami oeyata.

19Mbovɨ yae ɨvɨra opɨtata jeko pegua,

metei michia ipuereta oipapa.

20Jókuae ara rupi,

Israel pegua reta oasayepegüe,

Jacob iñemuña pegua reta oasayepegüe,

ngaraa ye ma oyeko reta imoamɨría re,

ërei ngatu oyeko retata añetete pegua yandeYa re,

Iyoambae Israel pegua re.

21Jembɨregüe reta oyerova yeta,

Jacob güi jembɨregüe reta

oyerova yeta Tumpa Imbaepuere yae vae kotɨ.

22Israel, yepe tëi ɨguasu jembeɨ pegua ɨvɨkuitï rami reyembojeta,

jókuae reta güi jembɨregüeño ko oyerova yeta.

Kañɨtei oñemoërakua vae oyeapo tai jupi rupi.

23Echa yandeYa Tumpa Imbaepuere yae ete vae

oyapota kañɨtei oñemoërakua ma kuae tëtaguasu re vae.

24Jáeramo, yandeYa Imbaepuere yae ete vae jei:

“Tëta chembae vae, Sión pe peiko vae,

agüɨye pekɨɨye Asiriaɨgua reta güi,

yepe tëi oiporu peré ipopoka ɨvɨra pegua,

Egiptoɨgua reta oiporu peré rami.

25Echa köi yae ma oï chearasɨ poi vaerä pekotɨ,

jayave opata amokañɨtei tovaicho reta.

26Che peYa Imbaepuere yae ete vae ainupata

Madián pegua reta ayuka ɨvɨtɨ Oreb pe rami;

chembaepuere amboyekuaata Asiria re,

Egipto re amboyekuaa rami.

27Jókuae ara oyeekɨta ndegüi ipoɨgüe oñono ndekupe re vae,

jare yuvo oñono ndeatua re vae opëta.

Jare jókuae yuvo opata oyemboai,

echa nde ko cherembiparavo.”

Asiria pegua reta oporepeña vae regua

28Asiriaɨgua reta yogüeru oväe tëta Ajat pe,

jare oasa Migrón jee vae rupi;

Micmas pe oipapa isundaro reta,

29oasa reta ɨ̈aka tɨpɨmbaea rupi,

oyembojeyupa reta Geba pe;

tëta Ramá orɨrɨi okɨɨye güi,

Gabaa, Saúl jëta otekuarai.

30¡Pesapúkai, tëta Galim pegua reta!

¡Toyeendu tëta Lais kotɨ!

¡Emboyevɨ chupe, tëta Anatot!

31Madmena pegua reta opa oñemoai moai,

tëta Gebim pegua reta opa otekuarai.

32Tëta Nob pe ave metei ara oiketa tovaicho reta;

opüata Sión pegua reta re,

ɨvɨtɨ Jerusalén re.

33Mase, yandeYa Tumpa Imbaepuere yae ete vae,

opa oitɨ ipïrimbae reve ɨvɨra reta;

opa oyasɨa ɨvɨra ɨvate vae reta,

opa oa ɨvɨra ɨvate yae vae reta.

34Yɨɨ pe opa oitɨ kaa tëɨ yae vae,

ɨvɨra ikavigüe Líbano pegua opa oa.