ECLESIÁSTICO 28 - Guarani Bible with DC

1Iyepɨse vae re Tumpa oyepɨta ko;

Tumpa oikuaa kavi yaeta mbaeyoa reta re.

2Neɨ̈ro nderapicha pe ndekura vae re,

jaema Tumpa iñɨ̈rota vi ndeve ndeyoa re rere chupe yave.

3Kia japicha omotareɨ yave,

¿këraita ra chupe Tumpa omee jete ikavi oiko vaerä?

4Mbaetɨ oiparareko metei kuimbae jae rami vae,

¿jare oiporu Tumpa pe iñɨ̈ro vaerä chupe iyoa re?

5Jae ko metei oporombopaa michi vae jare iporomotareɨ vae,

¿kia pa chupe iñɨ̈rota iyoa reta re?

6Eyemongeta ndeapɨta vae re jare agüɨye mo eporomotareɨ;

eyemongeta mano re jare eyapo mborookuai reta.

7Nemaendúa mborookuai reta re jare agüɨye nderapicha emotareɨ;

eyemongeta ñemoïru ɨvate pegua ndive oï vae re jare neɨ̈ro mbaeyavɨ reta re.

Agüɨye mo yepea eitɨ tata pe

8Eñemoata ñoraro reta güi jaema ngaraa ndeyoa,

echa ipɨarai vae omboɨpɨta ñoraro.

9Imbaeyoa vae oyapo yomboyao oñochëi vae reta pe,

jare kia pe pɨakatu oïa pe oñono omoai ñomotareɨ.

10Má jeta oï yepea yave, jeta ete vi ko tata jendɨ,

ma ñee oendu vae yave, má ko oyepotata ñoraro.

Má mɨ̈rata oï yave, má vi ko oï arasɨ,

má tuicha mbaeyekou yave, má vi ko tuicha arasɨ.

11Kapii jare ɨvɨra iyaɨsɨ ko omopɨ̈rata tata;

ñoraro takuvo güi vae ojota ko ipaa manoɨvɨ pe.

12Metei opiriri vae reipeyu yave, jendɨta ko,

ërei rendɨvɨ jese yave, ogüeta ko;

jare jókuae reipeyugüe nderendɨayɨ rami vae ndeyuru güi ko oë.

Yurupochɨ reta

13¡Ikavimbae vae ko iñeenguru pota vae jare iyapu vae,

echa jae ko jeta ma omokañɨteiuka oiko kavi vae reta!

14Apu reta jeta ko ombosusere vae

jare opa omondo tëta guasu ñavo rupi;

omokañɨtei reta tëta guasu reta jëguambae vae

jare omboai kuimbae reta imbaepuere vae reta jo.

15Apu jeko pegua ko

kuña ikavigüe reta opa oyemombo,

opa omokañɨuka chupe iparavɨkɨagüe.

16Kia apu jeigüe oyapo vae ngaraa oväe kia pe oputuu vaerä

jare ngaraa oiko kavi.

17Ñenupa omboperegüe opɨta ko ipire re;

ñanekü omboperegüe oakɨota ko maekägüe.

18Jeta ko kɨsepuku pe omano vae,

ërei má jeta omano yurupochɨ jeko pegua vae.

19¡Oyerovia ko ñee güi oasayepe oï vae,

mbaetɨ iyarasɨ oiporara vae,

jare mbaetɨ vi oa iporookuai igüɨ pe,

mbaetɨ vi opɨta oyeokenda jese oiko vaerä!

20Yuvo jiero pegua ko,

jare ikarena jiero iyu vae pegua ko.

21Iporoyuka mano jasɨkatugüe ko;

má ko jaekavi tɨvɨa.

22Ñanekü ngaraa ipuere mbae ikavigüe re;

jendɨgüe ngaraa ipuere oapɨ.

23Ërei pɨpe oata Tumpa oeya vae reta,

jendɨta ikotɨ reta jare ngaraa ma ogüe;

yaguapope rami opota ikotɨ reta,

jare yaguarovɨ rami opɨ̈saata.

24Ndeuva reikëse yuu pe yave

jare reñovatu kavi ndeoro jare ndekorepoti yave,

25eñono vi öke jare kandao ndeyuru re

jare ejäa ipoɨgüe ñee rejäagüe.

26Eyeandu agüɨye vaerä reyapo mbaeyoa nekü pe,

agüɨye vaerä rea nderovaicho ipo pe.