NÚMEROS 4 - Guarani Bible with DC

Leví iñemuña reta iparavɨkɨ

1YandeYa jei Moisés pe jare Aarón pe:

2“Peipapa Leví taɨ Coat iñemuña reta, jëtara ñavo rupi, metei tu ñavo rupi,

3treinta año güɨnoi vae güi cincuenta año güɨnoi vae pe, opaete ipuere oyapo tupao guakapi pegua pe mbaravɨkɨ vae reta.

Coat iñemuña reta regua

4Coat iñemuña reta iparavɨkɨrä tupao guakapi pegua pe, jae ko oñeñono tee kavi yae Tumpa pe vae:

5Teyupa oyereroyakavota yave, toyogüeru Aarón jare taɨ reta, jare topa toekɨ asoya o imboyaoa, jare toyasoi pɨpe käjou yemomaendúa pegua;

6jare iárambo toñono reta mɨmba pire ikavi yae vae jare jókuae iárambo toñono reta temimonderä vae vecharaagüe pegua jovɨ vae jare toñono reta jese iɨ reta.

7Jare mesa mbaemboete pegua iárambo toñono reta temimonderä vae vecharaagüe pegua jovɨü vae, jare iárambo toñono ñae reta, kuchara reta, kopa reta, tasa guasu reta vino mbota oyepɨyere pɨpe vae, jare mbɨyape toï avei iárambo.

8Jare kuaekuae iárambo toñono reta temimonderä vae vecharaagüe pegua pɨ̈taasɨ vae, jare toyasoi mɨmba pire ikavi yae vae pe; jare toñono reta jese iɨ reta.

9Jare toyasoi reta temimonderä vae vecharaagüe pegua jovɨü vae pe mechero renda, mechero reta, mechero imecha oyeasɨa pɨpe vae tenasa reta, iñae raɨ raɨ, jare opaete tembiporu reta olivo iasaite oñeñono pɨpe vae;

10jare toñono reta mɨmba pire ikavi yae vae pe jare tomboiɨ reta iyeupe, oyóvai jese vaerä.

11Ikäti kavi vae incienso oyeapɨ jese vae oro pegua iárambo toñono reta temimonderä vae vecharaagüe pegua jovɨü vae jare toyasoi reta mɨmba pire ikavi yae vae pe, jare toñono reta jese iɨ reta.

12Toupi reta opaete tembiporu o mbaemboetea pegua jare toñono reta temimonderä vae vecharaagüe pegua jovɨü vae pe, jare toyasoi reta mɨmba pire ikavi yae vae pe, jare tomboiɨ reta iyeupe, oyóvai jese vaerä.

13Toitɨo reta tanimbu mɨmba oyeyuka oyeapɨ jese vae güi, jare toyasoi reta temimonderä vae vecharaagüe pegua pɨ̈taasɨ vae pe.

14Jare toñono reta iárambo tembiporu reta joko pe oyeporu vae: sɨpe reta, tɨ̈ai reta, tätapɨi oyemboyeupi pɨpe vae reta, jare tasa guasu reta, jare opaete ïru tembiporu reta jókuae mɨmba oyeyuka oyeapɨ jese vae pe oyeporu vae; jare toyasoi reta mɨmba pire ikavi yae vae pe, jare toñono reta jese iɨ reta.

15Jare Aarón jare taɨ reta opa güire oñono kavi o mbaemboetea oyereraja vaerä jare opaete ïru tembiporu reta yave, jaema oguata retata yave, toyogüeru Coat iñemuña reta, güɨraja reta vaerä. Ërei agüɨye toyavɨkɨ reta mbae oñeñono tee Tumpa peguarä vae, agüɨye vaerä omano reta. Opaete kuae mbaembae tupao guakapi pegua jae Coat iñemuña reta ivoɨtarä.

16Ërei sacerdote Eleazar, Aarón taɨ ipo pe toï olivo iasaite mechero pegua, jare incienso ikäti kavi yae vae, jare mbota mbɨyape oñemee avei vae, jare olivo iasaite yeparavo pegua; opaete tupao guakapi pegua, jare opaete mbaembae oï joko pe vae, jare o mbaemboetea jare opaete tembiporu reta.”

17YandeYa jei vi Moisés pe jare Aarón pe:

18“Agüɨye pemaeño topa tokañɨtei Coat iñemuña reta jëtara reta Leví iñemuña reta ipɨte güi.

19Oikoveño reta vaerä oyavɨkɨ yave mbaembae oñeñono tee kavi yae vae; kuae peyapo jae reta ndive: Aarón jare taɨ reta toyogüeru tomee metei ñavo pe iparavɨkɨ ae jare ivoɨta aerä.

20Agüɨye toike reta tomae peñova peï yave mbaembae oñeñono tee vae re, agüɨye vaerä omano reta.”

Gersón iñemuña reta regua

21YandeYa jei vi Moisés pe jare Aarón pe:

22“Peipapa vi Gersón iñemuña reta, metei tu ñavo rupi, jëtara ñavo rupi,

23treinta año güɨnoi vae güi kutɨ cincuenta año güɨnoi vae pe eipapa, opaete ipuere oyapo tupao guakapi pegua pe mbaravɨkɨ vae reta.

24Kuae ko jae Gersón iñemuña reta iparavɨkɨrä jare güɨraja vaerä:

25Togüɨraja reta tupao guakapi pegua iyasoika reta, iyasoika iarambogua, jare iarambogua ete mɨmba pire ikavi yae vae güɨnoi vae, jare jöke regua asoya,

26tupao joka oñekëse pɨpe vae asoya jare jöke regua asoya, mɨmba oyeyuka oyeapɨ jese vae güi köi oï vae; jaeramiño vi tɨmasa reta, jare opaete ïru tembiporu reta joko pe oyeporu avei vae jare opaete joko pe oyeporuta vae;

27Aarón jare taɨ reta ipo igüɨ pe Gersón iñemuña reta toparavɨkɨ; pe reta pemombeuta chupe reta opaete jae reta iparavɨkɨrä.

28Jókuae ko jae Gersón iñemuña reta iparavɨkɨrä tupao guakapi pegua pe; jare opaete kuae mbaravɨkɨ toyapo reta itenondegua Itamar iporookuai rupi, jae ko sacerdote Aarón taɨ.

Merari iñemuña reta regua

29Peipapa vi Merari iñemuña reta, jëtara ñavo rupi, metei tu ñavo rupi.

30Treinta año güɨnoi vae güive kutɨ cincuenta año güɨnoi vae pe peipapa; opaete ipuere oyapo tupao guakapi pegua pe mbaravɨkɨ vae reta.

31Kuae toñemee chupe reta iparavɨkɨrä jare güɨraja reta vaerä: Tupao guakapi pegua ɨvɨra oñeopagüe reta, ɨvɨra oyepɨasa vae reta, okɨta reta jare iguapɨka reta,

32joka ikësea poste reta, iguapɨka reta, etaka reta jare tɨmasa reta, jare opaete mbaembae reta jókuae peguarä oiporu vae. Pemokañɨmaa opaete mbaembae güɨrajata vae.

33Jókuae ko jae Merari iñemuña reta iparavɨkɨrä tupao guakapi pegua pe; jare opaete kuae mbaravɨkɨ toyapo reta itenondegua Itamar iporookuai rupi, jae ko sacerdote Aarón taɨ.”

34Moisés, Aarón jare opaete Israel iñemuña itenondegua reta oipapa Coat iñemuña reta, jëtara ñavo rupi, jare metei tu ñavo rupi,

35treinta año güɨnoi vae güi kutɨ cincuenta año güɨnoi vae pe; opaete ipuere oyapo tupao guakapi pegua pe mbaravɨkɨ vae reta,

36jare opaete jëtara ñavo rupi oyepapagüe jae ko dos mil seteciento cincuenta.

37Jae ko jókuae Coat iñemuña reta güi Moisés jare Aarón oipapagüe, yandeYa oyókuai Moisés vae rami, opaete oparavɨkɨta tupao guakapi pegua pe vae.

38Jare Gersón iñemuña reta güi oyepapagüe, jëtara ñavo rupi, jare metei tu ñavo rupi vae reta,

39treinta año güɨnoi vae güi kutɨ cincuenta año güɨnoi vae pe; opaete ipuere oyapo tupao guakapi pegua pe mbaravɨkɨ vae reta,

40jare opaete jëtara ñavo rupi, metei tu ñavo rupi oyepapagüe jae ko dos mil seisciento treinta.

41Jae ko kuae Gersón iñemuña reta güi Moisés jare Aarón oipapagüe yandeYa iporookuai rupi, opaete oparavɨkɨta tupao guakapi pegua pe vae.

42Jare Merari iñemuña reta güi oyepapagüe, jëtara ñavo rupi, jare metei tu ñavo rupi vae reta,

43treinta año güɨnoi vae güi kutɨ cincuenta año güɨnoi vae pe; opaete ipuere oyapo tupao guakapi pegua pe mbaravɨkɨ vae reta.

44Jare opaete jëtara ñavo rupi oyepapagüe jae ko tres mil dosciento.

45Jae ko kuae Merari iñemuña reta güi Moisés jare Aarón oipapagüe, yandeYa oyókuai Moisés vae rami.

46Opaete Leví iñemuña reta güi Moisés, Aarón jare opaete Israel iñemuña itenondegua reta oipapa tëtara ñavo rupi, jare metei tu ñavo rupi,

47treinta año güɨnoi vae güi kutɨ cincuenta año güɨnoi vae pe; opaete ipuere oyapo tupao guakapi pegua pe mbaravɨkɨ vae reta,

48jare opaete chugüi reta oyepapagüe jae ko ocho mil quiniento ochenta.

49YandeYa oyókuai Moisés vae rami oyepapa reta, metei ñavo pe oñemee iparavɨkɨ aerä jare ivoɨta aerä; jökorai Moisés oipapa yandeYa oyókuai vae rami.