2 REYES 17 - Guarani Bible with DC

Samaria ñamɨri, Israel oyererajauka iɨvɨ güi

1Acaz doce año ma oiko mburuvicha guasurä Judá pe yave, Oseas, Ela taɨ omboɨpɨ oï mburuvicha guasurä Samaria pe opaete Israel re; jare chau año oiko mburuvicha guasurä.

2Oyapo ikavimbae yandeYa jesa róvai, ërei mbaetɨ tenonde rupi mburuvicha guasu reta Israel pe yogüɨreko chugüi vae reta rami mbatee.

3Kuae mburuvicha guasu re oporepeña Salmanasar mburuvicha guasu Asiria pegua; jare Oseas opɨta oiko jae jeia re, ombaemboepɨ oiko chupe.

4Ërei mburuvicha guasu Asiria pegua oipokou Oseas oñemopüa vɨari ko oiko ikotɨ vae; echa omondo jekovia pe kuimbae reta imiari vaerä So mburuvicha guasu Egipto pegua ndive, jare mbaetɨ ombaemboepɨ oiko año ñavo oyapose rami; jáeramo mburuvicha guasu Asiria pegua oñono tembipɨɨrɨru pe,

5javoi mburuvicha guasu Asiria pegua oike isundaro reta ndive opaete ɨvɨ Israel pe, jare oñova tëta guasu Samaria, oïraro güɨreko mboapɨ año rupi.

6Oseas chau año ma oiko mburuvicha guasurä yave, mburuvicha guasu Asiria pegua oike tëta guasu Samaria omoamɨri, jare güɨraja Israel pegua reta tembipɨɨrä Asiria pe, jare oñono Halah pe, Habor pe, ɨ̈aka Gozán iyɨ́vɨri, jare ɨvɨ Media pegua reta jëta guasu reta rupi.

7Echa Israel pegua reta iyoa iYa Tumpa kotɨ, ɨvɨ Egipto güi güɨnoe vae, Faraón mburuvicha guasu Egipto pegua ipo igüɨ güi vae kotɨ, jare omboete reta tumpa ambuae reta,

8yogüɨreko, jae reta jenonde güi yandeYa opa omoë omombo tëtaguasu reta vae jeko rupi, jare Israel pegua mburuvicha guasu reta oyapo vae rupi.

9Israel iñemuña reta oyapo vɨari mbaembae ikavimbae iYa Tumpa kotɨ, omopüa reta iyeupe mbaemboete renda opaete jëta guasu ñavo rupi; sundaro reta tëta oäro vae oyemboɨa ñavo rupi jare tëta guasu reta oñekëse kavía ñavo rupi,

10omopüa reta mbae iä jare Asera iä opaete ɨvɨtɨ ɨvate vae ñavo re, opaete ɨvɨra iküaraɨa kavi yae vae igüɨ ñavo rupi,

13Jayave yandeYa omboeta Israel jare Judá pegua reta pe opaete ñeemombeúa reta rupi; jare opaete mbae re oecha voi vae reta rupi jei: “Peeya pereko ikavimbae jare peñovatu cheporookuai reta che jae peñemuñagüe reta pe rami, che amombeu peve cheñeemombeúa reta rupi rami.”

14Ërei Israel iñemuña reta mbaetɨ oendu, ipɨatäta yae reta iñemuñagüe reta ipɨatäta yae rami, echa jae reta mbaetɨ güɨrovia iYa Tumpa;

15güɨröɨro reta iporookuai jare morogüɨrökuavee päve oyapo iñemuñagüe reta ndive vae, mborookuai reta omee chupe reta vae, jare omboete reta tumpa-raanga reta, tëtaguasu reta iyɨ́vɨri ñogüɨnoi vae rami, yandeYa oyókuai tëi agüɨye vaerä oyapo jókuae tëtaguasu reta jeko vae.

16Oeya reta opaete iYa Tumpa iporookuai reta, oyapo reta iyeupe mókoi toro taɨrusu vae iä jiero iyu vae pegua1 R 12.28. jare Asera iä reta, omboete reta opaete ara ipo reta jare Baal.

17Oapɨ reta vi taɨ reta jare tayɨ reta tumpa-raanga pe, jare güɨrovia katu reta mbaekuaa rupi maratuta vae re omombeu vae,Dt 18.10. jare moroäɨvo reta re, oyapo reta ikavimbae yandeYa jesa róvai vae rupi omboarasɨuka.

18Jáeramo yandeYa iyarasɨ yae ete Israel pegua reta kotɨ, jare opa omombo iyeugüi; jare mbaetɨ etei opɨta vae, jaeño opɨta Judá pegua reta.

19Ërei Judá pegua reta mbaetɨ vi oyapo yandeYa Tumpa iporookuai, echa ko oyapo reta vi Israel pegua reta oyapo mborookuai reta iyeupe vae rupi.

20YandeYa opa omboai opaete Israel iñemuña reta, oiporarauka chupe reta, opa omee omaepɨ̈ro vae reta ipo pe, opaetei omoë omombo iyeugüi regua.

21Güɨnoe Israel pegua reta David iporookuaía güi yave, Israel pegua reta omboguapɨ juvicha guasurä Jeroboam, Nabat taɨ; kuae mburuvicha guasu omombiauka iYa güi jare oyapouka chupe reta mbaeyoa ikavimbae yae vae.

22Jökorai Israel pegua reta omomoe opaete Jeroboam iyoa reta, jare mbaetɨ oyembosɨrɨ jókuae mbaeyoa reta güi.

23Taɨkue ete rupi yandeYa omoë omombo iyeugüi, jae jei rami opaete iñeemombeúa reta rupi; jare Israel pegua reta oyererajauka tembipɨɨrä iɨvɨ güi Asiria pe, joko pe yogüɨreko añave rupi.

Asiria omboipo ye Samaria

24Mburuvicha guasu Asiria pegua güeru kuimbae reta Babilonia güi, Cuta güi, Ava güi, Hamat güi jare Sefarvaim güi, jare oñono tëta guasu reta ɨvɨ Samaria pegua rupi, Israel pegua reta jekovia pe. Jökorai yogüɨreko ɨvɨ Samaria pe tëta guasu ñavo rupi.

25Jare omboɨpɨ ramo yogüɨreko joko pe yave, jae reta mbaetɨ omboete yandeYa jeko pegua, ombou jeta yaguapope chupe reta, jare oparapiti jese reta.

26Jayave jei reta mburuvicha guasu Asiria pegua pe: “Kuimbae reta reroyakavo Samaria kotɨ vae, reñono tëta guasu reta Samaria pegua pe vae reta, mbaetɨ oikuaa reta jókuae ɨvɨ pegua Tumpa iporookuai ramo, jae ombou jeta yaguapope chupe reta, jókuae yaguapope reta oparapiti ñogüɨnoi, echa jae reta mbaetɨ oikuaa joko pegua Tumpa iporookuai.”

27Jayave mburuvicha guasu Asiria pegua oporookuai, jei körai: “Peraja jokotɨ amogüe sacerdote joko güi perugüe reta güi, peraja toiko joko pe, jae tomboe reta jókuae tëta pegua Tumpa iporookuai re.”

28Jayave Samaria güi sacerdote reta oyererajauka tembipɨɨrä vae güi ou metei sacerdote oñemoëta Bet-el pe; jae omboe reta këraita ko omboete reta yandeYa vae.

29Echa tëtaguasu pegua ñavo oyapo iyeupe itumpa ae ae iä reta, jare oñono reta tupao reta mbaemboete renda ɨvɨtɨ rupigua rupi, Samaria pegua reta oyapogüe pe. Tëtaguasu ñavo yogüeru oñemoëtaa rupi.

30Babilonia pegua reta oyapo Sucot-benot iä, Cuta pegua reta oyapo Nergal iä, Hamat pegua reta oyapo Asima iä.

31Ava pegua reta oyapo Nibhaz jare Tartac iä, jare Sefarvaim pegua reta oapɨ taɨ reta omboete vaerä itumpa-raanga reta Adramelec jare Anamelec.

32Omboete reta vi yandeYa Tumpa, ërei oiparavo reta sacerdoterä oyougüi aeño, jókuae reta oyapo vaerä mbaravɨkɨ mbaemboete renda reta ɨvɨtɨ rupigua pe.

33Oipoɨu reta tëi yandeYa güi, ërei omboete reta vi itumpa ae ae reta, tëtaguasu reta oyereroyakavoa güi vae jeko reta rami aeño.

34Jekuaeñoi añave rupi oyapo reta tenonde rupi oyapo reta rami, mbaetɨ oipoɨu reta yandeYa güi, mbaetɨ oñovatu reta iporookuai, mbaetɨ oyapo reta mborookuai jei rami, yandeYa omee Jacob iñemuña reta pe vae, jae ombojee Jacob, Israel pe vae.Gn 32.28; 35.10.

35YandeYa oyapo morogüɨrökuavee päve kuae reta ndive yave, oyókuai körai: “Agüɨye peipoɨu ïru tumpa reta güi, agüɨye pemboete, agüɨye vi pemee chupe mɨmba oyeyukagüe reta,Ex 20.5; Dt 5.9.

36che peYa, pogüɨnoe ɨvɨ Egipto güi mbaepuere yae ndive,Dt 6.13. chegüi peipoɨu, chemboete jare cheve pemee mɨmba oyeyukagüe.

37Peiko avei opaete cheporookuai reta jeigüe rupi kavi, agüɨye pemboete tumpa-raanga reta.

38Agüɨye peakañɨ morogüɨrökuavee päve che ayapo pe reta ndive vae güi, agüɨye pemboete tumpa-raanga reta.

39Jaeño chemboete che peYa Tumpa, jare pogüɨroasayepeta opaete perovaicho reta güi.”

40Ërei ngatu mbaetɨ oendu reta, jekuaeñoi yogüɨreko jeko tenondegua rupi.

41Echa oipoɨu reta tëi yandeYa güi jare omboete reta vi tumpa-raanga reta. Jökoraiño vi taɨ reta jare jɨmɨmino reta oyapo iñemuñagüe reta rami, añave regua.