1Jare Mardoqueo oikuaa yave jókuae jökorai oï vae, omondoro iyeugüi jemimonde mbɨatɨtɨ jeko pegua, jare oekɨ omonde temimonde jaimbe vae, oñono iñäka re tanimbu, jaema oë oguata tëta guasu rupi osapúkai reve: “¡Metei tëta jekombae reve opata oñemokañɨtei!”
2Jare jökorai ojo oväe mburuvicha iporookuaía jöke pe, jare joko pe opɨta, echa joko pe mbaetɨ oñemaeño kia oike vaerä jökorai oyemonde reve jare iñäka tanimbu katuai güɨnoi reve.
3Jare provincia ñavo jókuae mborookuai ojo oväea rupi, judío reta omboyekuaa osapúkai reve mbɨatɨtɨ pe ñogüɨnoi vae, jare oyapakua reta tanimbu re jare temimonde jaimbe vae omonde reta.
Ester iñemoë4Jaema Ester jembiokuai kuña reta jare kuimbae jae järoa reta, imiari ma chupe mbae oasa oï vae re. Jare mburuvicha kuña, jókuae oendu rupive, ou täta ipɨatɨtɨ jare güɨrajauka temimonde Mardoqueo pe oipoepɨ vaerä jókuae temimonde jaimbe vae omonde güɨnoi vae, ërei jae mbaetɨ oipota.
5Jaema Ester oenɨi jayave Acrateo, jae ko jae järoa aeño vae, jare jei chupe ojo vaerä jae omae Mardoqueo re jare oikuaa kavi vaerä mbae etei ra ko oasa oï vae.
7Jare Mardoqueo opa imiari kavi chupe mbae ko oasa oï vae re, jare jei vi chupe tresciento treinta mil kilo korepoti Amán omeeta mburuvicha ikorepoti rɨru pe opa vaerä judío reta oñemokañɨtei vae.
8Jare omee vi chupe metei tembikuatía oyekuatía yoapɨ yegüe jókuae mborookuai opa vaerä judío reta oñemokañɨtei vae regua Susa tëta pe jërakua oï vae jae güɨraja vaerä omee Ester pe. Jare omondo jei Ester pe jae etei ojo vaerä imiari jókuae re mburuvicha guasu pe jare oñemoë vaerä jëta ipo reta re;] jare imaendúa vaerä kërai paravete oikose yepi Mardoqueo ndive oikose yave vae re, jare oikuaa vaerä kërai Amán, jae ko oï mburuvicha guasu iyɨvɨriguarä vae, jare jae ko jökorai jei mburuvicha guasu pe opa vaerä judío reta oyeyuka vae. Jare jei vi chupe oyerure vaerä Tumpa kotɨ jare imiari vaerä mburuvicha guasu ndive oepɨ vaerä judío reta opa vaerä güɨroasayepe mano güi.
[
9Jaema Acrateo ou ye imiari Ester pe.
10Jare jae jei ye chupe: “Añave ekua ye ere Mardoqueo pe:
11‘Opaete vae tëta ipo reta ko oikuaa oime kia nunga kuimbae ani kuña yepe ojo yave oike mburuvicha joka tenondegua pe mburuvicha guasu oenɨimbae reve, mbaetɨ ko oasayepe vaerä, jaeño ma mburuvicha guasu omopove ko ipopoka oro pegua vae jókuae ojo vae re oiparareko jeko pegua yave, jökorai güɨroasayepeta chupe jekove. Jaema añave che, oupitɨ treinta ara rupi ma ko mburuvicha guasu mbaetɨ ombou chereeka oï.’ ”
12Jaema Acrateo ojo ye yave imiari Mardoqueo pe Ester jeigüe vae re,
13Mardoqueo jei ye chupe: “Ekua ere chupe: ‘Agüɨye erovia, Ester, nde mburuvicha jëta pe reï güiño, nde aeño ko joko pe judía reï vae reasayepeta vae.
14Jaema añave nekïrii reï jare mbaetɨ mbae rere yave, judío reta imborɨarä jare güɨroasayepe vaerä outa ko ïkotɨa güi, ërei nde jare nderu jëtara reta opata ko omano. ¡Ani yepera nde reo reï mburuvicha kuñarä vae jae joko güi nde oremborɨ vaerä añave körai roï vae güi!’ ”
15Jaema jayave Ester omondo ye jei jókuae ñee jerajaa ndive Mardoqueo pe:
16“Ekua jare opa emboatɨ opaete judío reta oï Susa pe vae, jare peï karuëɨ pe cheré; agüɨye etei pekaru jare peɨu mboapɨ ara jare mboapɨ pɨ̈tu. Ore kuae pe kuae cherembiokuai ndive jökoraita vi royapo, jare joko güi ramo che ajata amae mburuvicha guasu re, yepe jókuae jaekaviä etei jökorai vaerä. Cheyuka yave, toime tacheyuka.”
Mardoqueo iyerure17Jaema Mardoqueo ojo jare oyapo opaete Ester jeigüe vae,]
17ajare opoko imaendúa opaete Tumpa iparavɨkɨ re, jaema opoko oyerure körai:
17b“CheYa, cheYa, Mburuvicha guasu opaete mbae re güɨnoi mbaepuere vae, echa opaete mbae oï ndepo pe: Mbaetɨta ko kia ipuere tenonde ndegüi vae, jaema nderembimbota ko yave reroasayepe vaerä Israel.
17cNde ko reyapo ara jare ɨvɨ jare opaete mbae mɨakañɨ reta oï ara igüɨ pe vae; nde, Tumpa, jae ko opaete vae iTumpa, jare mbaetɨ yé ko kia tenonde ndegüi vae.
17dNde ko opaete reikuaa, jare reikuaa ko reï che mbaetɨ ko ayevatɨka yave Amán iyembotuicha vae jóvai, chepɨapochɨ güiä ko, cheaguara güiä ko ani mbae aipota vae güiä ko; nde ko reikuaa reï, Israel aroasayepe vaerä ko, jare chepuere ipɨ pɨte ave aipɨte chugüi.
17eËrei mbaetɨ ayapo, aipotaä ramo kuimbae pe amee mbaemboete Tumpa amboete vaerä vae iárambo rupi. Che ngaraa kia jóvai ayevatɨka ndegüi cheYa; jare jökorai ayapo yave, cheaguara güiä ko.
17f¡Jaema añave, cheYa Tumpa jare Mburuvicha guasu ko nde, Abraham iTumpa, agüɨye eiporarauka nerëta ipo reta pe! Orerovaicho reta oipota opa oremokañɨtei, oipota opaetei ombopaa reta tëta kugüive ndembaerä oiko vae.
17g¡Agüɨye neakañi ndembae vae reta güi, Egipto güi renoegüe jare ndembaera yogüɨreko vaerä vae!
17hEendu cheyerure cheve, cheYa; eiparareko emae Israel re, ndembae vae reta ko, eipoepɨ orepɨatɨtɨ vae yerovia pe, jare roikove roiko reve royemongoi vaerä roiko nderee pe. ¡Agüɨye emokïrii mbaemboete omee ndeve vae reta iyuru!”
17iJare jökoraiño vi, opaete Israel-ɨgua reta osapúkai Tumpa kotɨ opaete mɨ̈rata reve, echa oecha reta köiño ma ou chupe omano vaerä.
Ester iyerure17jJaeramiño vi mburuvicha kuña Ester, ipɨakaviä oyeapo vae rupi, oyeko vi Tumpa kotɨ. Opa vi omboi jemimonde ikavigüe, jare omonde temimonde jüu vae mbɨatɨtɨ pegua; jare yembopichea ikavigüe jekovia pe, oñono iñäka re tanimbu jare ɨtɨ; oyapo jae jeigüe jete pe jare, oñono vaerägüe iyé mbae ipöra vae, opa ia omoai jare iñäkapacha oyeapo. Joko güi jaema opoko oyerure Tumpa pe, Israel reta iTumpa pe, körai jei:
17k“¡CheTumpa, opaete vae oreRuvicha guasu ko nde, ndeño ete ko! Chemborɨ, echa che aeño aï; jare ndegüi, mbaetɨ yé ma kia anoi chemborɨ vaerä; ko aï mbae yavai vae pe.
17lChendei yave, aiko yave cheru jëta ipo reta ndive, aendu ñee jei nde, cheYa, reiparavo Israel opaete tëta reta ipɨte güi jare oreñemuña reta opaete oreɨpɨ reta ipɨte güi, ndembae avei yogüɨreko vaerä, jare remee chupe reta opaete rerökuavee chupe reta vae.
17mËrei ore reta oreyoa ma ndekotɨ, jare nde oremee orerovaicho reta ipo pe, echa jae reta itumpa romboete jeko pegua. Nde ko jupi vae cheYa.
17nJare orerovaicho reta mbaetɨ yangapɨɨ jasɨkatu orereko vae rupi, jare itumpa reta jóvai oiporu reta agüɨye vaerä oyeapo nde mbae rerökuaveegüe vae, jare oipota opa omokañɨtei reta ndembae vae reta opa vaerä omokïrii reta mbaemboete omee ndeve vae reta iyuru, jare opa vaerä vi omboai reta nde tupao pe mbae ikavigüe oï vae reta jare ndealtar.
17oJare jökorai itumpa tee vae reta omboete vaerä itumpa-raanga imbaepuere añetembae reve, jare omboete avei yogüɨreko vaerä metei mburuvicha guasu kuimbaeño vae.
17p¡Agüɨye emee, cheYa, ndembaepuere tuicha vae tumpa-raanga reta añetembae vae reta pe! Agüɨye emee ïru vae reta topuka tomae orekañɨtei re. Eyapo jae reta iyemongeta toiko chupegua reta aeño, jare eiporarauka tesa pe jókuae kuimbae kuae yemongeta oyapo orekotɨ vae pe.
17q¡Ndemaendúa, cheYa! ¡Emae kuae körai roiporara roï vae re, jare emee mɨ̈rata cheve, tumpa reta Juvicha guasu, Tumpa imbaepuere yae vae!
17rChemborɨ ajäa vaerä ñee jaekavigüe vae yaguapope jóvai aï yave. Eyapo jae iporomotareɨ orekotɨ vae orerovaicho reta omotareɨ vaerä, jare jökorai jae oñemokañɨtei vaerä opaete jökorai jae ndive oyemongeta vae reta ndive.
17sJaema, ore, oremboasayepe ndembaepuere pe; jare che, ko che aeño aï vae, chemborɨ, echa mbaetɨ yé ma kia ïru vae anoi ndegüi, cheYa.
17tNde opaete ko reikuaa; nde reikuaa ko reï che amotareɨ ko kuimbae jeko kavimbae reta, jare aipotaä ete ko itumpa tee vae jare ketɨgua vae jembɨrekorä aiko vaerä.
17uNde reikuaa reï kuae teko yavai vae pe aï vae. Nde reikuaa reï kuae mburuvucha kuña iñäka-regua aipotambae reve añono cheyé aëta ayeechauka yave vae; aipotaä etei ko metei paño tugüɨ ikiagüe vae oyemboya jese vae rami, jaema che aeño aï yave mbaetɨ ko añono cheyé.
17vChe, nderembiokuai vae, mbaetɨ ete ko Amán imesa pe akaru, jare mbaetɨ ko mburuvicha guasu iyarete re aipota amae, jare mbaetɨ vi ko jau vino jae itumpa-raanga reta pe omeegüe vae.
17wJare chereru reta kuae pe güive joko añavea pe, mbaetɨ yé ko kia re ayeroviata ndegüi, cheYa, Abraham iTumpa.
17xNde, Tumpa, mbaepuere renoi opaete mbae re vae, eendu kuae körai ñogüɨnoi vae reta iyerure chupe, jare oreroasayepe kuae jekokavimbae reta ipo güi; jare che, chemboasa kuae mbae yavai vae akɨɨye aï chugüi vae güi.”
Who We AreWhat We EelieveWhat We Do
2025 by iamachristian.org,Inc All rights reserved.
