2 MACABEOS 5 - Guarani Bible with DC

Jasón imano

1Jókuae ara reta rupi, Antíoco oyeapo katu opüa vaerä ye Egipto re.

2Jökorai yave, irundɨpa ara seri rupi, oyekuaa opaete tëta rupi kavayu regua reta jemimonde oro pegua, jembiporu jare oñesɨro reve, osɨi reta ɨvate rupi ikɨsepuku reve;

3kavayu regua reta, ñoraro pe rami opüa jare okua oyoe ɨvate rupi, jetagüe mii jare yeopiaka reta overa jare oipotagüe tembiporu ñeraro pegua oro pegua jare oipotagüe temimonde ñeraro pegua.

4Opaete vae oiporu Tumpa pe kuae mbaɨu reta güeru vaerä teko kavi.

5Ñee ndaye reta rupi jërakua yave Antíoco imano, Jasón güɨraja mil kuimbae rupi jare oñemoërakuambae reve, okua tëta guasu re. Jasón oike tëta guasu pe, jare Menelao oeka oñepɨ̈ro vaerä tëta mí kotɨ.

6Jasón oñaseokɨ̈ti jeta rupi jokuaeɨgua reta, mbaetɨ ave ko oikuaa jëtaɨgua retai oyuka yave, jae ko oyeapa oï ikotɨi; ërei iyemongeta peko jovaicho retaecha omoamɨri güɨnoi.

7Ërei katu mbaetɨ oväe mbaepuere, echa jova mókoi oyeapo ramo jaeño ma oväe iyeupe ñemomarai, jáeramo osɨi ye Amón kotɨ.

8Jae jeko ikavimbae vae ojo iyapɨasɨkatu chupe: Oama tembipɨ́ra Aretas ipope yave, jaeko arabe reta juvicha, otekuarai tëta tëta rupi; opaete ma oakuemuña vae, oñemotareɨ uka mborookuai reta omboete mbae rami, jare jëtare ami ramo jëtaɨgua reta omotareɨ rami oiko, jokogüi ojo oiko Egipto pe.

9Kuae mbɨa, tenonde yave jëtara omombo iɨvɨ güi vae, ojo omano ɨvɨ mbuae kotɨ, jae ko Lacedemonia kotɨ ojo tëi oñepɨ̈ro, echa jokuaeɨgua judío reta ndive ko oñoëtara.

10Añave ko jae etei, tenonde yave oporoñotɨmbae vae, mbaetɨ etei kia oyaeo jese; mbaetɨ vi oñotɨ reta, mombɨrɨ opɨta tamɨigüe reta jɨvɨa güi.

Tupao oa ñemomarai pe(1 Mac 1.16-28)

11Mburuvicha guasu oikuaa yave kuae, oñono ipɨa pe Judea ikɨ̈reɨ opüa ikotɨ vae, jayave iyarasɨ reve mɨmba rami, omboɨpɨ oguata Egipto kotɨ, oipɨɨ sundaro reta ndive Jerusalén

12jare omee isundaro reta pe okua vaerä ipɨa pïrimbae reve jokuaeɨgua reta re jare oñaseokɨ̈ti vaerä oñemi ñogüɨnoi ñepɨ̈roa rupi vae reta.

13Yavaete katu oyuka taɨrusu jare ndechi reta, jare oparapiti kuña jare michia reta re, okambu vɨteri vae reta ave opa oñaseokɨ̈ti.

14Mboapɨ ara peño, omano opaete reve ochenta mil: cuarenta mil opa oyeyukauka jare ïru reta opa omee tembiaurä.

15Ërei jae mbaetɨ yangapɨɨ kuae re, jáeramo oike jókuae tupao ikɨambae yae opaete güi vae pe, Menelao omboeteä mborookuai reta jare jëtaguasu ramo güɨroike joko pe.

16Ipokɨa reve mburuvicha guasu opoko vaso reta tupao pegua re, jare oñomi imbaembae reta japicha mburuvicha guasu reta omee mbaemboete peguarä vae, tupao peguarä.

17Antíoco oyembotuicha yae, ërei mbaetɨ oikuaa vae jae ko, Jerusalén-ɨgua reta imbaeyoa ramo, tumpa iyarasɨ mbovɨ ara peguaño jare ñakañɨecha mbaemboetea güi.

18Judío reta mbaetɨ iyoa mbatee yave, tumpa omboepɨukata tëi ko Antíoco pe omboɨpɨ rupive jare ngaraa tëi vi omaeño oyapo jókuae, Heliodoro ndive rami, echa jae ou mburuvicha guasu Seleuco iñee oipapa vaerä tëi mbaeyekou tupao pegua.

19Ërei Tumpa mbaetɨ oiparavo tëta itupao oaɨu ramo, oiparavo ko tupao tëta oaɨu ramo.

20Jáeramo, jókuae tupao, oiporara yave maemegua tëta ndive, ovɨakatu vi jae ndive, teko kavi iara pe. Tumpa iyarasɨ ramo oeya, ërei jekuae oñemopüa ye ipöra reve, echa yandeYa oipota jökorai.

Mbaeyuka Jerusalén(1 Mac 1.29-40)

21Antíoco, opa ma yave güɨraja sesenta mil kilo korepoti, jaema voi ou ye Antioquía kotɨ, iyaguara jare oyembotuicha yae ramo, ipɨa pe oyemongeta ko ipueretaecha barco omboguatauka ɨvɨ rupi ani ramo kuimbae reta oguata vi ɨguasu rupi.

22Ërei nagtu, oeya kuimbae reta oyapo vaerä pɨ̈chɨi vae judío reta pe. Jerusalén pe oeya Filipo, Frigia pegua, jae ko metei mbɨa oasa ete yé ipɨapochɨ jenɨia güi vae;

23ɨvɨtɨ Guerizim pe oeya Andrónico, jare oenɨi yeti Menelao, jekopochɨ yae jëtaɨgua reta kotɨ vae. Mburuvicha guasu oasa ete omotareɨ judío reta ramo,

24omondo Apolonio, ñoraro regua Misia pegua reta juvicha, veintidó mil kuimbae reta iñäka pe, jare omee ñee chupe oñaseokɨ̈ti vaerä opaete mbɨa okuakuaa vae jare opa vaerä omee kuña jare michia reta.

25Oväe ma yave Jerusalén pe, Apolonio ipɨakatu oyeapo jaanga jare oäro oväe vaerä ara mbutuu; oecha ma yave judío reta oputuu ñogüɨnoi, omee ñee isundaro reta pe oguata vaerä jokoropi.

26Opaete oë omae vae reta, jaema voi etei oyeyukauka, jare jökorai jae reta oguata opaete tëta rupi, jare oporoyuka reta jupi.

27Ërei Judas Macabeo oyemboatɨ pandepo mbɨa reta ndive jare yogüɨraja ɨvɨ pöreɨ kotɨ, jókuae ɨvɨtɨ rupi oiko iñeïru reta ndive mɨmba jesaete vae rami, jare agüɨye vaerä oyemongɨa reta, jaeño ma jou reta yogüɨreko ñana-rokɨ michi.