2 MACABEOS 13 - Guarani Bible with DC

Menelao imano(1 Mac 6.28-30)

1Año ciento cuarenta y nueve pe, Judas pe jërakua Eupátor ou Judea kotɨ jeta sundaro reta ndive vae.

2Jare jae ndive ou vi Lisias, jae ko iyokoka jare imborɨka vi, yogüeru reta cien mil sundaro griego ɨvɨ rupigua reta ndive, cinco mil tresciento kavayu regua reta, veintidó elefante reta jare tresciento guataka reta jembiporu reve reve.

3Kuae reta ndive oñomoïru Menelao, jae iyemongeta pɨ̈chɨi reve omoäta ngatu Antíoco, echa mbaetɨ oyemongeta jëta oepɨ vaerä, jaeño ma ko oeka iparavɨkɨrä.

4Ërei Tumpa, mburuvicha reta juvicha, omboarasɨuka Antíoco jókuae iporoyukase vae kotɨ. Lisias oechauka mburuvicha guasu pe Menelao jembiapo rupi ou chupe reta teko kavimbae reta vae; jayave mburuvicha guasu güɨrajauka Tëta Berea kotɨ, jare jokotɨ oyukauka jokuaeɨgua reta jeko rupi.

5Oime Berea pe metei o veintidó metro ɨvategüe vae, tɨnɨe tanimbu pɨpe, jare güɨnoi vi iyereka, jaema jókuae oyere yere, ñapɨa tanimbu kotɨ.

6Kia imonda yave tupao pe ani oporoyuka yave jasɨ katu rupi, pɨpe oyuka reta.

7Jökorai ko, mbaetɨ reve kia oñotɨ, omano joko pe jekopochɨ vae Menelao;

8jupi rupi oyemboepɨ chupe, echa jeta oyapo mbaeyoa mɨmba oyeyuka oyeapɨ jese vae kotɨ; omongɨa jókuae tata jare itanimbu, jáeramo, jökoraiño vi jae omano tanimbu pe.

Antíoco Eupátor ndive ipɨakatu oyoupe(1 Mac 6.31-63)

9Mburuvicha guasu Antíoco, ou mɨmba pochɨ vae rami, echa ikɨ̈reɨ oiporarauka judío reta pe, oasa ete yé tu amɨri güi.

10Kuae oikuaa yave Judas, oiporu tëta pe oyerure vaerä yandeYa pe ara pe jare pɨ̈tu rupi, jekuaeño omborɨ vaerä, agüɨye vaerä vi omokañɨtei mborookuai guasu, iɨvɨ jare itupao.

11Jaeramiño vi agüɨye vaerä jëta, jáeramo etei ipɨa oï ngatu vae, jekuae oë ye itumpa ambuae vae reta jare Tumpa oyangao vae reta ipo pe.

12Opaete tëta oyapo jeigüe, jare mboapɨ ara rupi oyerure reta Tumpa iporoparareko vae pe oyaeo jare oyekuaku reve, oñaɨvɨ reta yave, güɨrajai jova omboya reta ɨvɨ re. Jayave Judas omoäta ngatu reta, jare oenɨi oñemoïru vaerä jae ndive.

13Ërei opa ma yave yatɨ iyokoka reta ndive, omboɨpɨ oguata reta, yandeYa iporomborɨ ndive oipoano vaerä teko, agüɨye vaerä tovaicho räri opɨ̈ro Judea pe jare oyemboiya Jerusalén re.

14Oyeko reve opaete mbae iyapoa re, omee ñee isundaro reta pe oñemoäta ngatu vaerä ñoraro pe, omano regua mborookuai guasu re, tupao, tëta, iɨvɨ jare jeko reta re; joko güi oyembojeyupa reta Modín iyɨpɨ kotɨ.

15“Tumpa iporomborɨ”, jei vae ñee omee reta oyoupe oyokuaa vaerä pɨpe, Judas oporepeña pɨ̈tu yave mburuvicha guasu jeyupa re kereɨmba taɨrusu reta ndive; oyuka dos mil sundaro, jare ïru reta oyuka elefante tuicha vae reta, iya reve reve.

16Jökorai, oiämondo tuicha jare opa ombojopa jovaicho reta, jae reta oyerova jokotɨ güi oyerovia katu reve.

17Köe ma yave, iyapɨ ma vi tekorai, yasoropai yandeYa iporomborɨ omee Judas pe ramo.

18Mburuvicha guasu oecha yave judío reta ipoki yae ñoraro pe, oñejäa oporepeña vaerä iñepɨ̈roa reta re.

19Oguata Bet-sur kotɨ, kuae ko jae judío reta iñepɨ̈roa, ërei oyopia reta; jae mbaetɨ ipuere jare iñamɨri opɨta.

20Judas omondo tembiporu jare tembíu sundaro reta pe,

21ërei Ródoco, jaeko sundaro judío, jae imiari tovaicho reta pe, ërei oikuaa reta yave, oipɨɨ jare oyuka reta.

22Jökorai mburuvicha guasu oyemongeta ye mokoía ma Bet-sur pegua reta ndive; omboyoupíe reta ye yemongeta jare jae ojo joko güi. Jayave oporepeña Judas jare isundaro reta re ma, ërei iñamɨri.

23Jökorai yave jërakua chupe Filipo, jae ko jekovia pe opɨta vae, oyeapa ma jese Antioquía pe. Kuae omongɨɨye, jare oenɨi judío reta; jae reta ndive ma ikɨ̈reɨ omboyoupíe yemongeta jare oyapo vaerä jae reta oiporu chupegüe; opa ma yave ipɨakatu oyoupe, oyapo reta mɨmbayuka, omboete tupao jare mbaemboetea renda reta.

24Ipɨakatu Macabeo ndive, oeya Hegemónidas sundaro ruvicharä, Tolemaida güive Gerra pe,

25joko güi ojo Tolemaida kotɨ, ërei jokuaeɨgua reta pe mbaetɨ ipöra yemongeta oyapogüe, iyarasɨ reta jese jare oipota tëi omboai.

26Jayave Lisias oyeupi ɨvate, jare oepɨ jeta yemongeta oyeapogüe, joko güi opa ye oyerova reta Antioquía kotɨ. Körai opa mburuvicha guasu iporepeña jare iñemoiti.