ECLESIÁSTICO 41 - Guarani Bible with DC

Mano

1¡Mano täta ko ikaviä imaendúa vaerä nderé

jo pe oiko pɨagüive vae,

mbaetɨ etei yemboavai güɨnoi vae, jare opaete mbae oï kavi chupe vae,

jare oimeño täta oï oikoño oiko vaerä!

2¡Mano, täta jaekavi reiko

pea ipuereä reve ma oiporara oiko vae pe,

jare pea oyepɨaka kai ma oiko vae pe,

ipɨatɨtɨ oï mbaetɨ ma oipota oikove oiko!

3Agüɨye ekɨɨye mano güi, jae ko neraro oï vae;

nemaendúa katu jae aeño ko tenonde yave jare oikota kuri taɨkue rupi.

4Kuae jae ko Tumpa omombeu oï opaete oikove oï vae reta pe vae;

¿maera yera ñaroäseta pea ɨvate ete pe oï vae iporookuai?

Ngaraa ma ñaneñeenga jese tɨvɨa pe

maera ya amogüe payandepo año oikove oiko, jare ïru vae cien año oiko, ïru mil año oiko vae.

Jeko kavimbae reta imbaeporara

5Kuimbae ikavimbae vae ko jekopochɨ vae tai reta;

kuimbae iyarakuaambae vae ko ipɨapochɨ vae jëtara reta.

6Metei taɨ ipɨapochɨ vae jeko pegua ko mburuvicha guasu omokañɨ imbaepuere,

jaema iñemuña yoapɨgüe reta yogüɨrekota ñemomarai rupi.

7Metei yanderu ipɨapochɨ yave, taɨ vae reta oyepopeyuta ko jese,

echa jae jeko pegua oiporarata yogüɨreko ñemomarai.

8¡Aa pe reta, kuimbae jekopochɨ vae reta,

peeya ɨvate ete pe oï vae iporookuai vae!

9Oime peraɨ yave, oikomeguata ko,

jare pembopɨatɨtɨta,

pe reta peguapɨ ma yave, opaete vae ko oyeroviata,

jare pemano yave, opaete vae ko oyepopeyuta nderé.

10Opaete mbae oyekuaambae rupi ou vae, oyekuaambae rupi ko ojo yeta;

jökorai, iporogüɨrovia mbae, ipombae kotɨ güi ko ou jare ipombae kotɨ ko ojo yeta.

11Kuimbae jete metei pɨ̈tueño ko,

ërei ipɨakavi vae jee ngaraa okañɨ.

12Eyeandu nderee güi, echa jae ko omeeta reikopuku vaerä

mbae ikavigüe jepɨ vae rami.

13Yerovia mbovɨ ara peguaño oiko,

ërei ikavigüe ko jae oikota oiko.

14Arakuaa oyekuaku vae jare mbaeyekou oñeomi oï vae,

¿mbaerä ra kia pe ikavita?

15Má ko ikavi ñañomi yandearakuaambae

arakuaa ñañomi vae güi.

Mbae güi ñanemara vaerä vaerä

16Peyeapɨsaka, cheraɨ michi reta, cheporomboe ñemomarai regua;

tamombeu peve mbae ko ñanemomarai vae.

Opaeteä ko ñemomarai reta ikavi;

mara yandemboe vae, yanderova pɨ̈ta mara güi vae jaenunga vi.

17Nemara, nderu reta jovake, eyapo mbae ikavimbae;

jare mburuvicha jóvai, ndeapu vaerä;

18jare ndeya reta jóvai, reporombotavɨ vaerä;

jare yemboatɨa pe, reporoyuka vaerä;

19jare nechëi vae ani ramo neïru vae, rembotavɨ vaerä;

ndeɨpɨ pe oiko vae reta jóvai, ndearakuaambae reiko vaerä.

20Nemara epɨta kia ndive reñemoïruta tëi vae reyapoä yave,

jare rekaru reï yave nderendɨvanga renoe nderenonde renoi yave,

21jare kia mbae oiporu ndeve vae remeeä chupe yave,

kia nemomiari vae pe neñee remoeä yave,

22jare kuña ambuae vae re reipota remae yave,

nechëi vae renoti yave,

23reipotaä kia opoko ndembae vae re yave,

reasa kuña ime vae ndive yave

24ani ramo jae jembiokuai ndive yave;

agüɨye eya ikea kotɨ.

25Nemara, nechëi güi, reyangao vaerä,

jare kia rembopota mbae pe vae remomarai yave;

26ñee ndaye rejäa ye yave remoërakua yave,

jare mbae yae rapembae vae remombeu yave.

27Kuae jae ko mara añetegüe vae;

jökorai yave opaete vae ko nderaɨuta.