1Jayave Tobías jei tu Tobit pe:
—Che ayapota ko opaete rere cheve vae.
2¿Ërei këraita pa ayapo Gabael omee vaerä cheve jókuae korepoti, jae mbaetɨ chekuaa jare che mbaetɨ vi aikuaa? ¿Këraita pa ayekuaauka chupe chererovia vaerä jare omee vaerä cheve korepoti? Jare, mbaetɨ vi aikuaa tape Media kotɨ ojo vae.
3Jare Tobit jei chupe:
—Gabael omee ko cheve metei kuatía, jare che amee vi chupe metei kuatía. Joko güi jókuae kuatía amboyao mbɨte rupi, metei peraso opɨta chupe jare ïru cheve, jare che chembae añono korepoti ndive. ¡Jare oasa veinte año ma ko jókuae añovatuuka aeya güire! Añave cheraɨ, eka metei kuimbae rerovia katu vae nemoïru vaerä, peo vaerä peeka jókuae korepoti. Jare yamboepɨta chupe peyu ye yave.
Guataïru Araɨgua Rafael4Jaema Tobías ojo oeka metei kuimbae tape oikuaa vae ojo vaerä jae ndive Media pe. Jare oë ojo oka pe rupive oväe chupe araɨgua Rafael. Ërei Tobías mbaetɨ oikuaa jae ko metei Tumpa jembiokuai vae.
5Jare oparandu chupe:
—¿Kia pegua pa nde?
Jare Tumpa jembiokuai jei chupe:
—Che ko jae Israel-ɨgua nde rami ko ayu aeka cheparavɨkɨrä.
Jaema Tobías oparandu ye chupe:
—¿Reikuaa tape Media kotɨ ojo vae?
6—¡Aikuaa! —jei chupe—.
Aikose joko pe. Jaema aikuaa kavi yae ko opaete tape reta joko pe. Jare ajase Media pe yave aja vi aputuu yepi Gabael jëta pe, jae ko Israel-ɨgua vi Ragues tëta pe oiko Media pe vae. Ecbatana güi mókoi ara pe yaja ñaväe Ragues pe. Opaete ko jókuae mókoi tëta reta ñogüɨnoi ɨvɨtɨ rupi.
7Jaema Tobías jei chupe:
—Cheräro kuae pe, ajata kuae amombeu räri cheru pe. Aipota chemoïru reo vaerä che ndive. Jare amboepɨta ndeve kërai yepe.
8Jare araɨgua jei chupe:
—Ikavi, kuae pe roärota, ërei ndeapuraoño.
9Jaema Tobías oike ojo jare jei tu pe:
—Emae aväe ma chupe metei kuimbae yande vae Israel-ɨgua vae.
Jare Tobit jei chupe:
—Ere chupe, tou taikuaa, kia iñemuña pegua ko jae ani kia jëtara ko jae vae, jare yaikuaagüe yave ojo vaerä nde ndive.
10Jaema Tobías oë ojo oenɨi jare jei chupe:
—Kunumi, eyu cheru nereenɨi.
Jaema araɨgua oike ojo, jare Tobit voi iñee ombou chupe. Jare araɨgua jei vi chupe, ikaviño vi oï vaerä.
Jaema Tobit jei ye chupe:
—¿Täta aipo ayerovia aï? ¡Cheresa jäve ko, jaema mbaetɨ ko aecha kuaraɨ jembipegüe! Jaema pɨtumimbi pe ko aiko omano vae reta rami, echa jae reta mbaetɨ ma ko oecha tembipe. Che omano vae rami ma ko aiko. Aendu imiari vae, ërei mbaetɨ chepuere aecha.
Jaema araɨgua jei chupe:
—¡Enoi mborogüɨrovia! Tumpa nepoanota ko. ¡Enoiño mborogüɨrovia!
Jaema Tobit jei ye chupe:
—Cheraɨ Tobías ikɨ̈reɨ ojo Media pe. ¿Ndepuere pa reo jupíe tëtara? Che amboepɨta kuri ndeve kërai yepe.
Jare araɨgua jei ye chupe:
—Chepuere aja. Aikuaa kavi yae opaete tape reta. Jeta ma aja Media pe jare aja vi aguata jókuae ñuu rupi jare ɨvɨtɨ rupi. Jaema opaetei ko tape reta aikuaa.
11—Ere cheve, chëi —jei chupe Tobit—, ¿kia iñemuña pa ko nde, jare kia jëtara pa ko nde?
12Jare araɨgua jei chupe:
—¿Maera pa reipota reikuaa kia iñemuña che vae?
—Emae cherëtara —jei ye chupe Tobit—, aipota aikuaa kavi kia ko nde vae, jare mbae nderee vae.
13—Che ko jae Azarías —jei chupe—, ndechi Ananías jɨmɨmino, Israel-ɨgua nde rami vae.
14Jaema Tobit jei ye chupe:
—¡Ayerovia, yae! Jare agüɨye ndepochɨ kuae nerëtara reta re aparandu ndeve vae re. Ko yepe nde jae orerëtara. Orerëtara ikavigüe ko nde. Che aikuaa ko aï Ananías jare Natán, jare Semelías taɨ reta. Che ajase yepi ko jae reta ndive Jerusalén pe ambaemboete vaerä, jare mbaetɨ ete ko opia reta kuae tape ikavigüe güi. ¡Ñemuña ikavigüe ko neñemuña reta! Jayave tëtara ikavigüe ko nde. ¡Ayerovia yae aï!
15Jupivei jei ye:
—Che amboepɨta ndeve metei dracma ara ñavo rupi, jare ameeta ndeve opaete mbae cheraɨ pe amee rami.
16Ekua michi cheraɨ emoïru cheve kuae ata pe, jare amboarambogua yeta ndeve amboepɨta ndeve vae.
17Jare araɨgua jei ye chupe:
—Ajata ko jae ndive. Agüɨye eipoɨu. Royerova yeta ko ikavi añave rojota roï rami. Tape ikavi ko oï.
Jare Tobit jei chupe:
—¡Tumpa tandemborɨ tëtara!
Jaema oenɨi taɨ jare jei chupe:
—Cheraɨ, eyupavo reo vaerä nerëtara ndive. Tumpa ara güi tomae peré jare peyerova ye ikavi peyu peväe cheve. Tumpa iaraɨgua tojo pe ndive jare tapeangareko cheraɨ michi.
Jaema Tobías oovapɨte tu jare ichɨ, jare opa yogüɨraja reta.
Tobit ipɨakatu opɨta, jei:
—¡Tojo kavi reta!
Guata regua18Jaema Tobías ichɨ omboɨpɨ oyaeo, jare jei Tobit pe:
—¿Maera pa remondo chemembɨ jokotɨ? Jese ko yaiko jare kuae pe oiko yande ndive.
19¿Mbae ra pa yaipota ye korepoti? ¡Ikavi ko ñamokañɨtei jókuae korepoti, ñanemichia ñamokañɨ vaerä güi, michia korepoti jeko pegua!
20Yaiko vaerä, ikaviño ma ko yaiko kuae yandeYa omee yandeve vae re.
21Jare Tobit jei chupe:
—¡Agüɨye ndepɨatɨtɨ! Ñanemichia oyerova yeta ko ikavi, kuae ojo rami. Reechata ko reï ou ye ikavi oväe yave.
22Agüɨye ndepɨatɨtɨ michi ree, agüɨye ekɨɨye mbae oikota vae, araɨgua ikavigüe ko ojota jae ndive; ikavita ko oguata, jare ikavita oyerova ye.
23Jaema jayave jae mbaetɨi ma oyaeo.
Who We AreWhat We EelieveWhat We Do
2025 by iamachristian.org,Inc All rights reserved.