DANIEL 3 - Guarani Bible with DC

Mbae iä oro pegua imboetea regua

1Mburuvicha guasu Nabucodonosor oyapouka metei mbae iä oro pegua vae, ɨvategüe güɨnoi treinta metro, jare jete ipɨgüe mboapɨ metro; omopüauka ɨvɨpe kavi Dura jee vae pe, ɨvɨ Babilonia pe.

2Javoi mburuvicha guasu Nabucodonosor omondo omboatɨuka ɨvɨ iyangarekoa reta, tëta ruvicha reta, sundaro ruvicha reta, oyeapɨsaka vae reta, korepoti iñovatúa reta, oporomboarakuaa vae reta, oporojäa vae reta, jare opaete tëta ñavo tenondegua reta, yogüeru vaerä mbae iägüe mburuvicha guasu Nabucodonosor omopüaukagüe oyemboaretea pe.

3Jayave yatɨ opaete jókuae mburuvicha reta, mbae iä mburuvicha guasu Nabucodonosor omopüagüe oyemboaretea pe.

4Jare ñee imombeúa osapúkai reve jei körai: “Opaete peveguarä oï kuae mborookuai, tëta reta, tëta guasu reta, jare ïru ñee pe imiari vae reta.

5Peendu oñemoñee mimbɨ vecha kuimbae-räti pegua, mimbɨ, angúa, arpa, ngitara, zampoña jare opaete temimbɨ reta tairari pegua yave, peyetavatɨka jare pemboete kuae mbae iä mburuvicha guasu Nabucodonosor omopüauka vae;

6jare oipotagüe vae mbaetɨ oyetavatɨka omboete yave, jupiveiño oyemombota metei horno tuicha vae jendɨvuku oï vae japɨpe.”

7Jáeramo, opaete vae tëta reta oendu oñemoñee mimbɨ vecha kuimbae-räti iñee, jare mimbɨ, angúa, arpa, ngitara, zampoña jare opaete temimbɨ tairari pegua yave, opaete tëta reta, tëtaguasu reta, jare ïru ñee pe imiari vae reta oyetavatɨka omboete reta jókuae mbae iä oro pegua, mburuvicha guasu Nabucodonosor omopüauka vae.

8Kuae re jókuae ara rupi amogüe kuimbae Caldeaɨgua iyarakuaa vae reta yogüeru oñeapo iyemongeta kavimbae reve judío reta re.

9Imiari jare jei reta mburuvicha guasu Nabucodonosor pe:

—¡Eikove katu avei oreruvicha guasu!

10Nde mburuvicha guasu, remee ko metei mborookuai, opaete kuimbae reta oendu oñemoñee mimbɨ vecha kuimbae-räti, mimbɨ, angúa, arpa, ngitara, zampoña jare opaete mimbɨ reta tairari pegua yave, toyetavatɨka tomboete jókuae mbae iä oro pegua;

11jare mbaetɨ oyetavatɨka omboete vae, toyemombo metei horno jendɨvuku oï vae japɨpe.

12Mburuvicha guasu, jókuae kuimbae judío reta, ndeɨvɨ iyangarekoarä reñono kuae Babilonia pe vae, jae reta ko: Sadrac, Mesac jare Abed-nego; kuae kuimbae reta mbaetɨ ndemboete; mbaetɨ omboete reta netumpa reta, mbaetɨ ave omboete reta mbae iä oro pegua remopüaukagüe.

13Jayave Nabucodonosor iyarasɨ reve jare pochɨ reve jei güeru reta vaerä Sadrac, Mesac jare Abed-nego. Jare jupiveiño opa güeru reta mburuvicha guasu jóvai.

14Jayave Nabucodonosor oparandu chupe reta:

—¿Añete pa, pe Sadrac, Mesac jare Abed-nego, mbaetɨ pemboete chetumpa reta, jare mbaetɨ ave pemboete jókuae mbae iä oro pegua amopüaukagüe?

15Añave, peendu oñemoñee mimbɨ vecha kuimbae-räti, jare angúa ipu, arpa, ngitara, zampoña, jare opaete temimbɨ tairari pegua yave, ¿peyetavatɨkata pa pemboete mbae iä amopüaukagüe? Echa mbaetɨ yave pemboete, jupiveiño peyemomboukata metei horno jendɨvuku oï vae japɨpe; ¿jare kia nunga tumpa pa ipuereta pereepɨ chepo güi?

16Jayave Sadrac, Mesac jare Abed-nego jei mburuvicha guasu Nabucodonosor pe:

—Mbaetɨta mbae roe ndeve kuae teko re.

17Oreruvicha guasu, mase, oreTumpa royeokuai chupe vae ipuere ko orereepɨ horno jendɨvuku oï vae güi; jare ndepo güi ave orereepɨta ko.

18Ërei mbaetɨ ko orereepɨ yave, eikuaa voi eï oreruvicha guasu; jeseve ngaraai royeokuai netumpa reta pe, ngaraai vi romboete jókuae mbae iä remopüaukagüe.

Horno jendɨvuku vae güi oasayepe vae reta

19Jayave Nabucodonosor jovapɨ̈ta etei iyarasɨ yae güi Sadrac, Mesac jare Abed-nego kotɨ, jare omee mborookuai oyemboakuasɨ yeyé vaerä horno tenonde rupi oyemboakuse vae güi.

20Jare oyókuai amogüe isundaro reta ipɨ̈rata yae vae oipokua vaerä Sadrac, Mesac jare Abed-nego, omombo reta vaerä horno jendɨvuku oï vae japɨpe.

21Jayave kuae kuimbae reta opa oipokua reta jemimonde mburuvicha pegua reve reve, jare opa omombo reta horno jendɨvuku oï vae japɨpe.

22Jare mburuvicha guasu iporookuai aramoete pegua yae jeko pegua, omboakuasɨ yeyé reta ramo, tata jendɨvukugüe opa oyuka jókuae sundaro reta Sadrac, Mesac jare Abed-nego ovoɨ güɨraja omombo vae reta.

23Jare kuae mboapɨ kuimbae reta: Sadrac, Mesac jare Abed-nego oyepokua reve oa ojo reta horno jendɨvuku oï vae japɨpe.

24Jayave mburuvicha guasu Nabucodonosor okɨɨye jare opüa rai voi jei imborɨa reta pe:

—¿Mboapɨ kuimbaeä pa peipokua pemombo horno pe?

Jare jae reta jei mburuvicha guasu pe:

—Jökorai ete ko, mburuvicha guasu.

25Jare jae jei:

—Ërei che aecha aï irundɨ kuimbae reta oyepokuambae oguata tata mbɨte rupi, mbaetɨ etei mbae tata oyapo chupe reta; jare jókuae irundɨa kuimbae tumpa retaecha oyekuaa.

26Jayave Nabucodonosor oya horno jendɨvuku oï vae jöke re, jare jei:

—¡Sadrac, Mesac jare Abed-nego, Tumpa Tuichagüe yae ete vae jembiokuai reta, peë peyu joko güi!

Jayave Sadrac, Mesac jare Abed-nego ñogüɨnoi tata iyɨvɨte güi.

27Jare oyemboatɨ ɨvɨ iyangarekoa reta, tenondegua reta, sundaro ruvicha reta, jare mburuvicha guasu imboarakuaa reta, omae reta vaerä kuae kuimbae reta re, kërai tata mbaetɨ ave güɨnoi mbaepuere jete reta re, ia reta ave mbaetɨ ókai; jemimonde reta ave mbaetɨ maratu, mbaetɨ ave tata piche yepe jae reta.

28Jayave Nabucodonosor jei: “Toyemboete Sadrac, Mesac jare Abed-nego iTumpa, echa ombou iaraɨgua oepɨ jembiokuai reta oyeko jese ramo, jare mbaetɨ oyapo reta cheporookuai, oñeñono reta oiporara vaerä, omboete äragüe ïru tumpa iTumpa güi.

29Jáeramo amee mborookuai, opaete tëta reta, tëtaguasu reta, ïru ñee pe imiari vae reta iñee nguru yave Sadrac, Mesac jare Abed-nego iTumpa kotɨ, toyembojaɨ jaɨ jare jo topɨta ɨtɨapɨrä; echa mbaetɨ ïru tumpa ipuere oporoepɨ kuae rami vae.”

30Jayave mburuvicha guasu ombotuicha yae Sadrac, Mesac jare Abed-nego opaete ɨvɨ Babilonia pe.