1 CRÓNICAS 29 - Guarani Bible with DC

1Jaɨkue rupi mburuvicha guasu David jei opaete oyemboatɨ ñogüɨnoi vae pe: “Cheraɨ Salomón, Tumpa oiparavo vae taɨrusu yae vɨteri, javoi mbaravɨkɨ ko tuicha yae, echa jókuae o mbaetɨ ko kuimbae peguarä, yandeYa Tumpa peguarä ko.

2Opaete chepɨa ndive añono kavi jeta mbaembae cheTumpa jo peguarä: Oro, korepoti, jiero iyu vae, jiero, jare ɨvɨra opaete ɨvɨra oyeporu vae peguarä. Jare vi ita ónice jee vae, ita ipöra yae vae, ita jüu vae, ita jeta ipïra vae, jare oipotagüe ita ipöra yae vae, jare ita mármol jee vae jeta yeyé.1 Cr 22.5.

3Opaete kuae reta añono kavi ma tupao peguarä vae reve, cheporoaɨu cheTumpa jo kotɨ ramo amee chembaembae jepɨ vae oñeñovatúa güi tupao peguarä oro jare korepoti:

4Amee cien mil kilo rupi oro oyeambae, dosciento treinta mil kilo rupi korepoti oyeambae oñeova vaerä pɨpe ovapetea.

5Opaete oro jare korepoti oyeapo vaerä chugüi oipotagüe mbae, opaete ipoki mbae oyapo vae reta ikɨ̈reɨ oiporu rupi. Jare añave, ¿kia pa ikɨ̈reɨ omee mbota ipɨakatu rupi yandeYa pe?”

6Jayave metei ñoëtara ñavo itenondegua reta, metei ñemuña ñavo itenondegua reta, sundaro ruvicha reta, sundaro jeta vae juvicha reta, jare mburuvicha guasu imbaeyekou re oyangareko vae reta itenondegua reta, omee reta mbota ipɨa-kɨ̈reɨ ngatu reve,

7omee reta tupao pe mbaravɨkɨ oyeapota vae peguarä ciento sesenta y cinco mil kilo jare diez mil reare oro pegua, tresciento treinta mil kilo korepoti, jare seisciento mil kilo seri jiero iyu vae jare mboapɨ millón tresciento mil kilo jiero.

8Jare ita ipöra yae vae güɨnoi vae reta omee Jehiel ipo pe, yandeYa jo pe mbaembae jepɨ vae oñeñovatúa peguarä. Jehiel jae ko Gersón iñemuña.

9Opaete vae reta oyerovia omee ramo mbota ipɨa-kɨ̈reɨ ngatu reve, echa kuae mbaembae reta omee yandeYa pe opaete ipɨa ndive.

10Jökoraiño vi David oyerovia yae. Jare omboete yandeYa opaete yatɨ vae reta jóvai, jei: “¡Mbaeyekou toï jekuae avei pegua, nde cheYa Tumpa, oreñemuña Israel iTumpa!

11CheYa, ¡ndembae ko mbaeyekou, mbaepuere, mbaemboetea, ndepuere opaete re vae jare imboetea vae! Echa opaete ñogüɨnoi ara pe jare ɨvɨ pe vae ndembae ko. Ndembae ko mborookuaía,Mt 6.13. echa nde oreYa tuicha yae opaete güi vae ko.

12Ndegüi ko ou mbaeyekou jare mbaemboete. Nde ko renoi mbaepuere opaete re. Mɨ̈rata jare mbaepuere ndepo pe ko oï, jare ndepo pe vi oï reporombotuicha vaerä jare remee vaerä mbaepuere opaete vae pe.

13Jáeramo oreTumpa, añave romee ndeve mbaemboete, romboete nderee imboetea yae vae;

14jare, ¿kia pa che jare kia pa cherëtaɨgua reta romee vaerä ndeve jeta mbota? Echa, ndembae ko opaete mbaembae, jare jaeño romee ndeve ndegüi romboresivegüe.

15Echa nderóvai ore reta ko ketɨgua oasa ojo oiko vae ramiño, oreñemuñagüe reta rami, jare orerekove ɨvɨ iárambo metei küaraɨa michi peguaño vae rami ko.

16‘¡OreYa Tumpa, opaete kuae mbaeyekou roñono kavi tupao oñemopüa vaerä nde nderee re vae, ndembae ko jare ndegüi ougüe katuai ko!

17CheRu Tumpa, che aikuaa nde reecha ko opaete vae ipɨa jare sɨmbi vae ndemboyerovia. Jáeramo chepɨa sɨmbi reve amee ndeve chepɨa-kɨ̈reɨ ngatu reve opaete kuae mbaembae reta. Jare añave yerovia katu reve aecha tëta ndembae kuae pe oyemboatɨ ñogüɨnoi vae omee ndeve mbota ipɨakavi reve.

18Oreya, Abraham iTumpa, Isaac jare oñemuñagüe Israel iTumpa, emee ndembae vae reta pe togüɨnoi avei vaerä kuae ipɨa-kɨ̈reɨ ngatu, emee ipɨa pe imaendúa reta avei vaerä ndekotɨ.

19Emee vi cheraɨ Salomón pe ipɨa isɨmbi vaerä, jökorai oyapo vaerä opaete ndeporookuai reta, jare remombeu opaete oyeapo vaerä vae, jare ipuere vaerä omopüa tupao, echa che añono kavi ma omopüa vaerä ndeve.’ ”

20Javoi David jei opaete oyemboatɨ ñogüɨnoi vae reta pe: “Añave pemboete yandeYa Tumpa.” Jayave yatɨ vae reta omboete yandeYa, iñemuñagüe reta iTumpa, oyetavatɨka itindɨasɨ reve ombaemboete reta yandeYa jóvai jare mburuvicha guasu jóvai.

21Pɨareve pe omee reta yandeYa pe mɨmba oyeyuka vae jare mɨmba oyeyuka opaetei oyeapɨ vae: Mil toro taɨrusu vae, mil vecha kuimbae jare mil vecha taɨrusu vae mbota vino oyepɨyere vae ndive jare jeta mɨmba oyeyuka oñemee vae, opaete Israel reta güeru vae.

22Jókuae ara okaru reta jare jou reta vino oyerovia katu reve yandeYa jóvai. Jaɨkue rupi omboguapɨ ye mokoía ma mburuvicha guasurä Salomón, David taɨ, oñono tee reta reve mburuvicharä asaite rupi yandeYa jóvai, oñono reta vi Sadoc sacerdoterä.

23Jökorai Salomón oguapɨ mburuvicha guasurä yandeYa iporookuaía pe tu David jekovia pe,1 R 2.12. jare ikavi yae opaete mbae oë chupe. Opaete Israel yogüɨreko jae jeia re.

24Jare opaete mburuvicha reta jare jëia vae reta, jare opaete mburuvicha guasu David taɨ reta vi ñogüɨnoi mburuvicha guasu Salomón ndive.

25YandeYa ombotuicha yae Salomón opaete Israel jesa róvai, jare omee chupe iporookuaía imboetea yae vaerä, mbaetɨi chugüi jókuae nunga mburuvicha guasu tenonde yave rupi.

David imano(1 R 2.10-12)

26Jökorai David, Isaí taɨ oiko mburuvicha guasurä opaete Israel re.

27Cuarenta año oiko mburuvicha guasurä Israel re: Chiu año Hebrón pe, jare treinta y tres año Jerusalén pe.2 S 5.4-5; 1 Cr 3.4.

28Omano indechi ae pe, jeta año güɨnoi yave, jeta imbaeyekou jare imboetea yae. Jare taɨ Salomón oguapɨ jekovia pe mburuvicha guasurä.

29Mburuvicha guasu David regua, iyɨpɨ güive iyapɨ pe oyekuatía oï mbae re oecha voi vae Samuel jembikuatía pe, jare Tumpa iñeemombeúa Natán jembikuatía pe jare mbae re oecha voi vae Gad jembikuatía pe,

30jae ko opaete mbaembae oyapo iporookuaía pe vae regua, kërai mbaepuere güɨnoi vae, jare mbaembae oasa jae ndive jare Israel ndive vae regua, jare opaete ïru tëtaguasu reta regua.