2 CRÓNICAS 30 - Guarani Bible with DC

Ezequías oyapo Pascua

1Ezequías omondo oikuaauka opaete Israel pegua reta pe jare Judá pegua reta pe, oikuatía reve tupapire chupe reta, jae ko ɨvɨ Efraín pegua reta pe jare ɨvɨ Manasés pegua reta pe, yogüeru vaerä Jerusalén pe, yandeYa jo pe PascuaEx 12.1-13,21-27; Lv 23.5-8; Dt 16.1-8. yandeYa pe oyapotaa pe, Israel iTumpa pe.

2Echa mburuvicha guasu güɨnoi miari iyɨvɨrigua reta ndive jare opaete Jerusalén pegua reta ndive, jare ombojee reta oyeapo vaerä Pascua mokoía yasɨ pe,

3echa mbaetɨ ipuere oyapo reta Pascua jókuae yasɨ, mbaetɨ oupitɨ sacerdote reta oñeñono tee Tumpa pe vae jeko pegua,Nm 9.9-11. jare Israel iñemuña reta ave mbaetɨ vi oyomboatɨ Jerusalén pe.

4Jare jókuae yemongeta ikavi yae mburuvicha guasu pe jare jeta vae reta pe ramo,

5oyemongeta reta omondo vaerä tupapire rupi omoërakua opaete Israel rupi, Beerseba güive Dan kotɨ, oparea reta chupe yogüeru vaerä Jerusalén pe oyapo Pascua yandeYa pe, Israel iTumpa pe. Echa ɨma ma mbaetɨ oyapo reta Pascua jeta vae ndive, oyekuatía oï rami.

6Jökorai yogüɨraja ñee jerajaa reta opaete Israel rupi jare Judá rupi mburuvicha guasu jare iyɨvɨrigua reta jembikuatía ndive, omoërakua vaerä mburuvicha guasu iporookuai jei reta reve: “Israel iñemuña reta, peyerova ye yandeYa kotɨ, Abraham, Isaac jare Israel iTumpa kotɨ, jare jae oyerova yeta pekotɨ, opaete pe perembɨre mburuvicha guasu reta Asiria pegua ipo güi vae.

7Agüɨye peyeapo peñemuñagüe reta rami jare perëtara reta rami, oyembopɨapochɨ reta yandeYa kotɨ, iñemuñagüe reta iTumpa kotɨ, jare jae omee opa vaerä oyemboai, pe reta peecha rami.

8Añave, agüɨye peyembopɨa täta peñemuñagüe reta rami; peñeñono yandeYa ipo pe jare peyu o mbaemboetea pe, jae oñono tee jekuae avei pegua vae pe. Peyeokuai yandeYa Tumpa pe, jökorai agüɨye vaerä ma iyarasɨ pekotɨ.

9Pe reta peyerova ye yandeYa kotɨ yave, tovaicho reta iporopararekota perëtara reta jare peraɨ reta ñogüɨnoi tembipɨɨrä jae reta ipo pe vae re, jare omaeñota yogüeru ye kuae ɨvɨ pe, echa yandeYa Tumpa ipɨakavi jare iporoparareko, ngaraa ko pereröɨro, pe reta peyerova ye ikotɨ yave.”

10Ñee jerajaa reta yogüɨraja tëta guasu ñavo rupi, ɨvɨ Efraín pegua rupi jare ɨvɨ Manasés pegua rupi, ɨvɨ Zabulón kotɨ yogüɨraja oväe regua. Ërei jokoropigua reta opuka jare oyóyai yóyai mbae jei reve ikotɨ reta.

11Ërei jeseve amogüe kuimbae reta ɨvɨ Aser pegua, ɨvɨ Manasés pegua jare ɨvɨ Zabulón pegua oñemomichi Tumpa kotɨ jare yogüeru Jerusalén pe.

12Tumpa omongúe vi Judá pegua reta ipɨa-kɨ̈reɨ vaerä oyapo reta mburuvicha guasu iporookuai jare iyɨvɨrigua reta iporookuai, yandeYa jei rami.

13Jökorai oyemboatɨ mokoía yasɨ pe jeta yeyé Jerusalén pe, oyapo reta vaerä arete mbɨyape oyembovumbae mbaemboete pegua.

14Omboɨpɨ reta oekɨ opaete mɨmba oyeyuka oyeapɨ jese vae reta jare ikäti kavi vae incienso oyeapɨ jese vae reta Jerusalén pe oï vae, jare omombo reta ɨ̈aka raɨ Cedrón jee vae pe.

15Javoi oyuka reta vecha kuimbae taɨrusu vae Pascua pegua, mokoía yasɨ re catorce araa pe. Sacerdote reta jare levita reta imara yae reve oñeñono tee reta Tumpa pe, jare güɨraja reta yandeYa jo pe mɨmba reta oyeyuka opaetei oyeapɨ vaerä vae.

16Javoi oñeñono reta jenda jenda pe ae, Moisés, Tumpa jembiokuai iporookuai pe oyekuatía oï chupe reta rami. Sacerdote reta ñogüɨnoi oñapiramo vaerä tugüɨ pe, levita reta omee chupe reta vae pe.

17Echa joko pe ñogüɨnoi jeta mbaetɨ oñeñono tee Tumpa pe vae, jáeramo levita reta oyuka Pascua pegua mɨmba reta opaete jókuae mbaetɨ oñeñono tee Tumpa pe ñogüɨnoi vae reta re, oñono tee reta vaerä yandeYa pe.

18Echa jeta ɨvɨ Efraín pegua, Manasés pegua, Isacar jare Zabulón pegua reta jou vecha isoo Pascua pegua, ërei mbaetɨ yepe mborookuai jei rami, echa mbaetɨ oñeñono tee reta Tumpa pe. Ërei Ezequías oyerure jese reta körai: “CheYa ipɨakavi yae vae, neɨ̈ro opaete jókuae ipɨakatu reve kavi ndereeka vae pe vae;

19nde, iñemuñagüe reta iTumpa, yepe tëi mbaetɨ oyetɨo reta o mbaemboetea pe oyekuatía oï rami.”

20Jare yandeYa oendu Ezequías iyerure jare iñɨ̈ro opaete vae pe.

21Jökorai chiu ara Israel iñemuña reta Jerusalén pe ñogüɨnoi vae oyapo arete mbɨyape oyembovumbae mbaemboete pegua oyerovia reve. Jare sacerdote reta jare levita reta omboete ara ñavo yandeYa, otairari reta tembiporu reta tairari pegua ipu katu vae pe.

22Jare Ezequías oyapo yasoropai opaete levita reta oechauka kërai oyeokuai yandeYa pe vae reta pe.

Javoi okaru reta arete chiu ara vae pe, omee reta reve mɨmba oyeyukagüe yembopɨakatu pegua jare omee reta reve yasoropai yandeYa pe, iñemuñagüe reta iTumpa pe.

23Opaete joko pe oyemboatɨ vae reta oyemongeta ombopuku vaerä arete chiu ara yé; jare oyapo reta yé arete chiu ara rupi oyerovia reve.

24Echa Ezequías mburuvicha guasu Judá pegua omee opaete yatɨ vae pe mil toro jare siete mil vecha; jare mburuvicha reta omee vi opaete vae pe mil toro jare diez mil vecha; jare sacerdote reta jeta ma vi oñeñono tee Tumpa pe.

25Oyerovia opaete Judá pegua reta, jökorai vi sacerdote reta jare levita reta, jare jeta vae yogüeru ɨvɨ Israel güi vae reta oyerovia; jökoraiño vi ketɨgua reta yogüeru ɨvɨ Israel güi vae reta jare Judá pe yogüɨreko vae reta.

26Jayave oï yerovia tuichagüe Jerusalén pe; echa Salomón, David taɨ Israel iñemuña reta juvicha guasu oiko güire, mbaetɨ kuae nunga oyeapo Jerusalén pe.

27Javoi sacerdote reta jare levita reta oyemboɨ jare oyerure opaete vae reta re; jare yandeYa oendu chupe reta, iyerure ojo oväe ara pe, Tumpa oikoa pe.