1David oiko ma jo pe yave, jei Tumpa iñeemombeúa Natán pe:
—Mase, che aiko o kavi ɨvɨra ɨ̈vɨrare pegua pe, ërei Tumpa ikäjou morogüɨrökuavee päve pegua oï o guakapi pegua peño.
2Jare Natán jei David pe:
—Eyapo o kavi ndepɨa pe reyemongeta vae, echa Tumpa ko oï nde ndive.
3Ërei jókuae pɨ̈tu voi Tumpa jei Natán pe:
4“Ekua cherembiokuai David pe ere: YandeYa jei körai: ‘Mbaetɨta nde remopüa o aiko vaerä pɨpe vae,
5echa jókuae ara Israel iñemuña reta anoe güive añave regua, mbaetɨi aiko o pe, jaeño aiko küaraɨa guakapi pegua pe oipota rupi.
6Israel iñemuña reta aroataa rupi, mbaetɨi aiporu chembae vae itenondeguarä che añono vae reta pe, omopüa vaerä cheve metei o ɨ̈vɨrare pegua.’
7Jáeramo, añave ere cherembiokuai David pe: Körai jei yandeYa imbaepuere yae ete vae: ‘Che ko rogüeru mɨmba rókai güi, jare mɨmba jaɨkue reguatase vae güi, reiko vaerä Israel chembae vae juvicharä;
8jare aiko nde ndive kerupi reoa rupi, opa amoamɨri nderovaicho reta ndeve jare amee ndeve nerërakua yae vaerä, kuae ɨvɨ pe amogüe kuimbae reta jërakua yae rami.
9Jaeramiño vi ayapo kavi tëta Israel chembae vae jendarä, jare joko pe añono yogüɨreko vaerä iɨvɨ ae pe, agüɨye mo vaerä oyembosɨrɨ iɨvɨ güi, ani jekopochɨ vae reta opɨ̈ro chugüi tenonde yave rami.
10Añono güire mburuvicha oporojäa vae reta tëta Israel chembae pe; che amomichita opaete nderovaicho reta. Jare aikuaauka ndeve neñemuñarä ameeta vae.
11Jare remano ma yave, che amopüata metei neñemuñagüe jare amboguapɨta mburuvicharä.
12Jae omopüata metei o cheve, jare che ameeta oiko avei vaerä iporookuaía.
13Che aïta turä, jare jae oïta cheraɨrä.2 Co 6.18; Heb 1.5. Ngaraa ambosɨrɨ chugüi cheporoparareko tenonde oiko ndegüi vae güi ambosɨrɨ rami,
14jaeño amomɨ̈ratata jekuae avei pegua tëta chembae vae re, jare cheporookuaía pe, jare iporookuaía oikota jekuae avei pegua.’ ”
15Natán imiari opaete oechagüe jare oendugüe re David pe.
16Jayave mburuvicha guasu David oike imiari vaerä yandeYa ndive, jare jei: “CheYa Tumpa, mbaeä etei ko che jare cheñemuña reta, reyapo vaerä kuaekuae che ndive.
17¡Jare mbaeä ndeve cheYa Tumpa, cheñemuña re ave nemiari këraita yogüɨreko kuri vae re, jare cheapo metei kuimbae imboetea yae vae rami cheYa Tumpa!
18¿Mbae ye pa jaeta ndeve cheYa Tumpa? Echa nde chekuaa ko.
19CheYa Tumpa, cheraɨu ramo jare ndepɨa jemimbota rupi kuae reyapo reikuaauka vaerä ndembaepuere tuicha yae vae.
20CheYa, mbaetɨ yé kia nde rami, mbaetɨ yé ïru Tumpa ndegüi ore etei roendu oreapɨsa rupi rami.
21¿Oime ra ïru tëta ɨvɨ pe tëta Israel ndembae rami vae? ITumpa güɨnoe Egipto güi imbaerä mɨakañɨ tuichagüe rupi vae, nerërakua yae vaerä. Nde remoë remombo jenonde güi ïru tëtaguasu reta,
22echa nde reiparavo Israel ndembaerä jekuae avei pegua, jare nde cheYa reiko jae reta iTumparä.
23Añave cheYa, emoañete jekuae avei pegua morogüɨrökuavee reyapo cheve vae, jare cheñemuña reta pe vae toyembopo.
24¡Toyembopo neporogüɨrökuavee, jare nderee toyembotuicha jekuae avei pegua, opaete vae jei vaerä: Israel iTumpa, jae Tumpa Israel peguarä! ¡Cheñemuña reta toyogüɨreko avei nderóvai!
25Echa nde cheTumpa reikuaauka ma cheve cheñemuña reta yogüɨreko aveita vae; jáeramo che nderembiokuai añemoäta ngatu, ayerure vaerä ndeve.
26CheYa, nde ko jae Tumpa rerökuavee kuae ñee kavi reta cheve vae.
27Jare añave nekɨ̈reɨ ndeporerekua cheñemuña reta re yogüɨreko vaerä jekuae avei pegua nderóvai rupi. Nde cheYa ko ndeporerekua jese reta, jare ndeporerekua rupi yogüɨrekota jekuae avei pegua.”
Who We AreWhat We EelieveWhat We Do
2025 by iamachristian.org,Inc All rights reserved.
