1Jökorai Tumpa ikäjou güeru reta oñono o guakapi pegua David oyapo chupea pe. Javoi omee reta mɨmba oyeyuka opaetei oyeapɨ vae jare mɨmba oyeyuka yembopɨakatu peguarä vae Tumpa jóvai,
2jare David opa omee jókuae mɨmba oyeyuka vae reta yave jei ñee kavi opaete vae reta kotɨ yandeYa jee re,
3jare opaete Israel iñemuña kuimbae ani kuña reta pe omee, metei mbɨyape, metei peraso soo jare metei ipe uva oñemotinigüe.
4David ombojee levita reta güi oyeokuai vaerä yandeYa ikäjou jóvai, oyapo avei reta vaerä mbaemboete, omee reve yasoropai yandeYa Israel iTumpa pe.
5Tenondegua jae Asaf, jare mokoía Zacarías; javoi Jeiel, Semiramot, Jehiel, Matatías, Eliab, Benaía, Obed-edom jare Jeiel, kuae reta güɨnoi jembiporu tairari pegua: Ngitara jare arpa reta. Asaf ombopu platillo reta,
6jare sacerdote reta Benaía jare Jahaziel omoñee avei mimbɨguasu käjou morogüɨrökuavee päve pegua Tumpa imbae jóvai.
David itairari yasoropai pegua(Sal 96.1-13; 105.1-15; 106.47-48)7Jayave, jókuae ara voi David omboɨpɨ oyókuai Asaf jare jëtara reta otairari vaerä yandeYa pe omee reve yasoropai körai:
8“¡Pemboete yandeYa!
¡Pemboete jee!
Peikuaauka opaete vae pe jae jembiapo reta.
9Petairari chupe tairari mbaemboete pegua.
¡Pemiari opaete mɨakañɨ oyapogüe re!
10Peyerovia jae jee ikɨambae re.
¡Ipɨa toyerovia katu yandeYa oeka vae reta!
11Peeka yandeYa, jare imbaepuere;
peeka avei yandeYa opaete ara rupi.
12Pemaendúa mɨakañɨ tuichagüe oyapo vae re,
jare omoërakua oyapo vaerä vae re;
13pe jembiokuai Israel iñemuña reta,
pe jembiparavo Jacob iñemuña reta.
14YandeYa, jae ko ñaneTumpa.
¡Jae ipo pe oï opaete ɨvɨ!
15Imaendúa avei iñererökuavee re,
yepe tëi oasa jeta ñemuña,
16morogüɨrökuavee päve Abraham ndive oyapo vae re,
jare Isaac pe jei añetete oyeapo vaerä vae re,
17jókuae omoañete mborookuairä Jacob pe,
morogüɨrökuavee opambae vae Israel pe,
18jei yave:
‘Ndeve ameeta ɨvɨ Canaán nderu imbaegüe,
nderugüe pe oñemee rami.’
19Yepe tëi jae reta mbovɨ,
mbovɨ jare ketɨgua kuae ɨvɨ pe
20yogüɨraja tëtaguasu reta ñavo rupi
jare mborookuaía reta ñavo rupi,
21Tumpa mbaetɨ omaeño kia oyuvanga jese reta;
oaɨu jeko pegua oiporarauka mburuvicha guasu reta pe.
22Jei: ‘Agüɨye pepoko aiparavogüe reta re
agüɨye vi peyuvanga cheñeemombeúa reta re ave.’
23Ɨvɨ pegua reta, petairari yandeYa pe,
pemoërakua ara ñavo iporomborɨ.
24Pemoërakua iyemboetea jare mɨakañɨ reta oyapogüe
opaete vae reta jóvai jare tëtaguasu reta pe,
25echa yandeYa tuicha yae ko,
jupi ko oyemboete vaerä,
jare kɨɨyea yae ko opaete tumpa-raanga reta güi.
26Opaete tëta itumpa reta, tumpa-raangaño ko,
ërei yandeYa ko jae ara reta iyapoa.
27¡Oime mbaemboete tuicha yae vae jae jóvai!
¡Oime mbaepuere jare yerovia katu jae oïa pe!
28Tëtara reta tëta ñavo peï vae,
pemee mbota yandeYa pe,
pemee yandeYa pe mbaemboete, mbaepuere iya pe;
29pemee yandeYa pe mbaemboete chupegua vae;
peru mbota jare peyu jóvai;
peyetavatɨka yandeYa jóvai imbaemboetea ikavi yae
35Pere chupe:
‘¡Orereepɨ oreYa Tumpa oporoepɨ vae!
¡Orerenoe jare orereepɨ tëtaguasu reta güi romee vaerä mbaemboete ndeve,
royerovia reve romboete vaerä!
36¡Toyemboete yandeYa, Israel iTumpa, jekuae avei rupi!’ ”
Jare opaete vae reta jei: “¡Amén!”, jare omboete reta yandeYa.
37Jökorai David oeya Asaf jare jëtara reta käjou morogüɨrökuavee päve pegua yandeYa imbae jóvai, oyeokuai avei vaerä joko pe ara ñavo.
38Oeya vi Obed-edom sesenta y ocho jëtara reta ndive, Obed-edom, Jedutún taɨ Hosa ndive öke iyangarekoarä.
39Oeya vi sacerdote Sadoc jare jëtara sacerdote reta yandeYa jo jóvai, mbaemboetea oï ɨvɨtɨ Gabaón re vae pe,
40omee avei reta vaerä mɨmba oyeyuka opaetei oyeapɨ vae mɨmba oyeyuka oyeapɨ jese vae re ndeimbove yave jare kaaru yave, oyekuatía oï yandeYa omee mborookuai Israel pe vae rami.
41Oeya vi jae reta ndive Hemán, Jedutún jare opaete oyembojee otairari vaerä vae: “Omee reta vaerä yandeYa pe mbaemboete, echa iporoparareko opambae ko.”
42Kuae reta omoñee mimbɨguasu, platillo jare ïru tembiporu tairari pegua, omoïru reta otairari Tumpa pe vae. Jedutún taɨ reta ñogüɨnoi öke re oyangareko vaerä.
43Jaɨkue rupi opaete vae yogüɨraja jo pe, David ojo vi jo pe jei vaerä ñee kavi jo pegua reta pe.
Who We AreWhat We EelieveWhat We Do
2025 by iamachristian.org,Inc All rights reserved.
