LEVÍTICO 21 - Guarani Bible with DC

Mborookuai reta sacerdote reta peguarä

1YandeYa jei Moisés pe:

“Ere Aarón iñemuña sacerdote reta pe agüɨye toyemongɨa reta Tumpa jóvai, tëta pe kia nunga vae omano vae rupi,

2ërei jëtara ete re, ichɨ re, tu re, taɨ re, tɨkeɨ ani tɨvɨ re,

3ani jeindɨ jaegüɨrai vae ípɨri oiko vae, ndeiño omenda vae; kuae reta re ipuere oyemongɨa reta Tumpa jóvai.

4Ërei agüɨye toyemongɨa reta Tumpa jóvai oipotagüe kuimbae tëta pegua rami.

5Agüɨye tomboapúa reta ia toñapi, agüɨye jendɨvaa iyapɨ toyasɨa reta, agüɨye jete tombopere reta,Lv 19.27-28; Dt 14.1.

6iyoambae toyogüɨreko Tumpa pe, agüɨye tomongɨa reta Tumpa jee, echa mbota oyeapɨ oñemee cheve vae jare mbɨyape Tumpa pegua jae reta ko omee, jáeramo iyoambae toyogüɨreko.

7Agüɨye tomenda reta kuña iyaguasa pota vae ndive, ani kuimbae ndive oasa ma vae ndive ani ime omombogüe ndive; echa sacerdote reta oñeñono tee ko Tumpa pe.

8Eñono tee reta opaete mbaembae güi, echa jae reta ko omee mbɨyape neTumpa pe. Jare iyoambae toyogüɨreko ndeveguarä, echa che peYa iyoambae ko añono tee reta.

9Jare sacerdote tayɨ omboɨpɨ yave iyaguasa pota, omboeteä ko tu; jekove reveño toyeapɨ tata pe.

10Jare sacerdote tenondegua vae, iñäka re opɨyere olivo iasaite yeparavo pegua, temimonde sacerdote pegua omonde vaerä vae, agüɨye toñeäkaöva, agüɨye vi tomondoro jemimonde ipɨatɨtɨ güi;

11agüɨye vi toike tëogüe oïa pe, tu re ave ani ichɨ re ave agüɨye toyemongɨa Tumpa jóvai.

12Agüɨye toë mbaemboetea güi, agüɨye tomongɨa Tumpa jo mbaemboetea; echa jese ko oyepɨyere olivo iasaite Tumpa imbae yeparavo pegua. Che ko peYa.

13Tomenda metei kuñatai ndei etei kuimbae ndive oasa vae ndive.

14Agüɨye tomenda imemano vae ndive ani ime omombogüe ndive, oyemboeteukambae ani iyaguasa pota vae ndive; tomenda metei kuñatai jëta pegua ndei etei kuimbae ndive oasa vae ndive,

15agüɨye vaerä omongɨa iñemuña reta, jëtaɨgua reta ipɨte pe; echa che peYa ko añono tee reta.”

Mbaemboavai reta sacerdoterä vae pe

16YandeYa jei Moisés pe:

17“Ere Aarón pe metei ave taɨ reta ani taɨ iñemuña reta jete oikomegua reve, agüɨye togüɨroike mbɨyape Tumpa pe.

18Agüɨye metei ave kuimbae jete oikomegua vae toya omee vaerä mbota: Jesambae, iköcho vae, itï ani inambi oikomegua vae,

19kuimbae ipɨ opë vae ani ipo opë vae,

20ikuperäti vae, okuakuaambae vae, jësatu vae, ikuru vae, iyandɨrakai vae, oyeapiaogüe ani japiaräɨ oikomegua vae.

21Metei ave kuimbae sacerdote Aarón iñemuña reta güi jete oikomegua vae, agüɨye tomee mbota reta oyeapɨ vae cheve. Echa oikomegua ko, agüɨye tou tomee mbota mbɨyape Tumpa pe.

22Tumpa pe mbɨyape oñemee vae güi, jare mbaembae oñeñono tee vae jare oñeñono tee kavi yae vae güi ipuere jou,

23ërei agüɨye toya asoya o imboyaoa re, ani mɨmba oyeyuka oyeapɨ jese vae re, echa jete oikomegua ko, agüɨye vaerä omongɨa chero mbaemboetea. Echa che ko peYa poñono tee vae.”

24Jare Moisés imiari opaete kuae re Aarón pe, taɨ reta pe jare opaete Israel iñemuña reta pe.