1Simón, tenonde ñanemiari ma jese vae, jae ko jëta re oyeapa imiari yave tupao imbaeyekou re apu rupi vae, oyangao Onías jare omboeko opaete mbae pɨ̈chɨi vae oasa Heliodoro kotɨ vae re.
2Onías, tëta re oparavɨkɨ vae, jëtaɨgua reta oapɨ vae jare oaɨu mborookuai reta vae, Simón ombojee ko tëta jovaicho.
3Oyovaicho ete kavi opɨta reta, jáeramo metei mbɨa Simón iñeïru oporoyuka jokoropi mbovɨ katu.
4Oecha yave Onías mbaetɨ ikavi körai yogüɨreko vaerä, jare oecha yave Menesteo, jae ko sundaro ruvicha Celesiria jare Fenicia pegua, omborɨ katu yae Simón,
5ojo imiari mburuvicha guasu ndive, agüɨye vaerä omboeko jëtaɨgua reta, echa jae ko omae opaete tëta oiko kavi vaerä re,
6echa mbaetɨ yave metei mborookuai Simón jeko ombosɨmbi, ngaraa yogüɨreko pɨagüive reta.
Antíoco IV Epífanes: Teko ambuae reta oike Israel pe(1 Mac 1.10-15)7Seleuco omano ma yave, oguapɨ jendagüe pe Antíoco, opaete vae oenɨi ko Epífanes. Jókuae ara rupi Jasón, Onías jëtara, omboepɨ oiko vaerä sacerdote ruvicharä.
8Imiari mburuvicha guasu ndive, jare oñererökuavee omee vaerä chupe once mil ochociento ochenta kilo korepoti tributo jepɨrä, jare dos mil seiciento cuarenta yeti omoïru vaerä.
9Iñererökuavee vi, omboepɨ vaerä cinco mil kilo korepoti, ikɨ̈reɨ ramo oyapo yuvanga renda reta, yemboe reta griego reta jeko rupi, jare omee vaerä vi Jerusalén pegua reta ipuere vaerä Antioquiaɨgua reta rami vi.
10Mburuvicha guasu ikɨ̈reɨ ma chupe yave, jare Jasón omboɨpɨ güive oguapɨ, güɨroike jëtaɨgua reta pe griego reta jeko.
11Oeya teko kavi mburuvicha reta ipɨakatu reve oeya judío reta pe Juan rupi vae, jae ko Eupólemo tu, kuae Eupólemo jae ko ojo tenonde yave oñochëi Romaɨgua reta ndive vae, Jasón omboai vi teko reta mborookuai jeia rupi oyeapo vae jare güɨroike teko ambuae reta.
12Jani voi opa oyapo yuvanga renda tëta mí igüɨ pe, jare güɨraja taɨrusu jäta ngatu vae reta oyuvanga joko pe.
13Jeta yae mbae pɨ̈chɨi vae oyapo kuae jekopochɨ vae jare sacerdote ruvicha oiko jaanga vae Jasón ramo, oñemoai opaete ɨvɨ rupi griego reta jeko jare jökorai oipɨɨ reta teko ambuae.
14Kuae jeko pegua, sacerdote ruvicha reta ikɨ̈reɨ pa ma mɨmba oyeyuka oyeapɨ jese vae pegua mbaravɨkɨ güi, jae reta etei güɨröɨro tupao jare ombaeyuka poi reta. Oporoenɨi vae ipu ñavo jae reta etei yogüɨraja omborɨ oyemboe oñoraro vae reta, mborookuai guasu oyopia vae.
15Opia ete kavi mboromboete ɨvɨ guasu kotɨ güi, echa ipöra yae chupe reta griego reta jembiapo.
16Ërei kuae jeko pegua vi teko oyemboavai chupe reta: echa tenonde yave jae reta ndive yogüɨreko vae reta etei, opa oyeapo jovaichorä.
17Echa Tumpa iporookuai oyavɨ vae reta mbaetɨita opɨta oiporarambae, añave yaechata rami.
18Tiro pe oyeapo yave, mburuvicha guasu jóvai, yuvanga irundɨ año ñavo oyeapo vae,
19jeko pochɨ vae Jasón omondo, Jerusalén jee re, amogüe Antioquiaɨgua reta, omae vaerä yuvanga reta re, jare omee tresciento korepoti chupe reta ombaeyuka vaerä tumpa Hércules pe, ërei jae reta oyemongeta agüɨye vaerä oiporu jókuae korepoti mbaeyuka re, echa ikɨ̈reɨ reta oiporu ïru mbaerä.
20Jare jökorai, korepoti Jasón omee mbaeyuka tumpa Hércules peguarä vae, oiporu reta guataka ɨ rupigua oyapo katu vaerä.
21Apolonio, Menesteo taɨ, ojo yave Egipto kotɨ mburuvicha guasu Filométor iguapɨ iara pe, Antíoco pe jërakua Filométor oyoupieä jae iyemongeta ndive vae, jáeramo oyemoambeko voiño oyeapo katu jenonde jare jókuae jeko pegua. Jope tëta kotɨ jare jokogüiño oasa Jerusalén kotɨ.
22Jasón jare opaete jëta reta, oövaiti ipɨakatu reve tataendɨ jare sapúkai rupi. Joko güi Antíoco oyembojeyupa isundaro reta ndive Fenicia kotɨ.
Menelao, sacerdote ruvicha23Mboapɨ año ma oasa yave, Jasón omondo Menelao, yei ñaenɨi vae Simón jëtara, jae ko güɨraja vaerä korepoti güɨrökuavee vae.
24Ërei Menelao, oväe ma yave mburuvicha guasu pɨri, oyembotuicha yae oyeapo jóvai, jare güɨrökuavee chupe Jasón omee korepoti chupe vae güi nueve mil noveciento kilo yé oasa, jare joko pe oyembojeeuka sacerdote ruvicharä.
25Opa mburuvicha guasu ombojee rupive, oyerova ye; ërei mbaetɨ oikatu oiko sacerdote ruvicharä, echa oasa ete ipɨapochɨ jare iyarasɨ yave metei mɨmba pochɨ vae rami etei.
26Jökorai, Jasón, tenonde yave ombogüɨ jëtara vae, añave oyembogüɨka ambuae vae pe, jáeramo osɨi Amón iɨvɨ kotɨ.
27Ërei Menelao, oï ma yave tuvicharä, mbaetɨ ma oyemoambeko omboepɨ vaerä mburuvicha guasu pe jókuae korepoti güɨrökuavee chupe vae,
28yepe tëi jeta omoñera Sóstrates, tuvicha tëta mí pegua, echa jae ko oï oiporu vaerä korepoti impuesto regua reta. Kuae jeko pegua, mókoi reve oenɨiuka mburuvicha guasu.
29Jayave Menelao oeya iparavɨkɨ, jare omboasa jëtara Lisímaco pe, jare Sóstrates omboasa Crates pe, sundaro ruvicha Chipre pegua.
Onías oyeyukauka30Kuae oasa ramboeve, Tarso jare Malos-ɨgua reta iyarasɨ tuicha, echa mburuvicha guasu omboasa jókuae tëta reta, iyaguasa Antióquida jee vae imbaerä.
31Mburuvicha guasu oyupavo jokotɨ ojo vaerä oñono kavi teko, oeya jekovia pe Antíoco, jae ko metei mbɨa tuicha yae jëta pe vae.
32Menelao oecha yave jëgua teko, oñomi mbovɨ katu tembiporu oro pegua tupao güi, pɨpe ombopota Andrónico jare jembɨregüe reta opa omee Tiro jare ïru tëta reta rupi.
33Onías pe jërakua yave kuae, osɨrɨ Dafne güi, jae ko Antioquía iyɨpɨ pe oï vae, tenonde yave mbaetɨ ipuere okua jese retaa güi, iyarasɨ täta Menelao kotɨ oyapogüe re.
34Menelao joko güi oyemboya vɨari Andrónico kotɨ jare omoñera oyuka vaerä Onías. Andrónico ojo Onías pɨri, jare omee reve ipo chupe oñererökuavee ngaraaí ko mbae oyapo ikotɨ vae, Onías ipɨayoyavi tëi, ërei ojo ikɨ̈reɨ taɨkue rupi jare oë iñepɨ̈roa güi. Oë rupive Andrónico oyuka paravete jupimbae reve.
35Kuae oasa ramo iyarasɨ täta. Judío retañoä, jaeramiño vi ïru tëtaɨgua reta, jupimbae rupi oporoyuka reta ramo.
36Mburuvicha guasu oyerova yave Cilicia güi, jokuaeɨgua judío reta ojo imiari jae ndive Onías imano re; griego reta pe jaenunga vi, mbaetɨ ipöra kuae mbaeyuka.
37Antíoco, tuicha rupi ipɨa oñátai jare jasɨ katu yae chupe, jáeramo oyaeo imaendúa yave kuae mbɨa amɨri iyarakuaa jare ipɨapoki vae re.
38Tuicha iyarasɨ reve, omboiuka Andrónico pe jemimonde pɨ̈taasɨ vae jare omondoro chugüi, joko güi güɨroatauka opaete tëta guasu rupi kuae mbɨa ipɨapochɨ vae oporoyukaa kotɨ, joko pe ombopaa reta jókuae tëta ikɨɨyea. Körai yandeYa omboepɨuka jembiapo chupe jupi rupi.
Menelao iyemoambeko39Menelao ndive, Lisímaco jeta imonda Jerusalén pe mbaemboetea pegua reta re. Tëta oikuaa yave kuae, opüa Lisímaco re, ërei jókuae ara rupi jeta yae ma mbaembae oro pegua reta okañɨ.
40Lisímaco oecha yave tëta iyarasɨ jare omboɨpɨ oyeapa juvicha reta re, omboatɨ tres mil kuimbae rupi omboɨpɨ vaerä oporoyopia, iñäka pe oñono Auranos jee vae, metei mbɨa indechi vae jare iyemongeta kavi veä ma vae.
41Tëta oecha yave Lisímaco omboɨpɨ okua, amogüe reta oipɨɨ ita, ɨvɨra ipoɨgüe jare amogüe reta oyara tanimbu ɨvɨ rupigua ipo pe, jare oyembokepegua amboɨpɨ reta oyapi Lisímaco imbɨa reta.
42Körai, jeta oporoapicha reta pe amogüe omano, jare ïru reta opa otekuarai; jare iporomomarai pota vae Lisímaco, oyuka reta tupao pegua mbaeyekou jóvai.
43Opaete kuae mbaembae oasa vae jeko pegua oñeapo reta Menelao re.
44Mburuvicha guasu ojo oväe Tiro pe yave, mboapɨ kuimbae reta oñeapo Menelao re chupe, echa jökorai oyapo yemongeta mburuvicha judío reta.
45Menelao oecha ma yave iñamɨrita, güɨrökuavee korepoti Tolomeo pe, jae ko Dorimeno taɨ, ombopɨangúeuka vaerä mburuvicha guasu ikotɨ.
46Jayave, Tolomeo güɨraja mburuvicha guasu ikatu kotɨ oñemoröɨsa jaanga, jare joko pe güɨroviauka chupe iyemongeta.
47Jáeramo, mburuvicha guasu oekɨ Menelao iárambo güi opaete jókuae ñeapo reta, jare oyukauka jókuae oñeapo jese paravete vete vae.
48Jae reta ko ikɨ̈reɨ tëi oepɨ jëta ipo reta jare mbaembae reta tupao pegua, ërei jae retai ombaemboepɨ jasɨ katu jare jupimbae reve.
49Kuae jeko pegua, amogüe Tiroɨgua reta, mbae pɨ̈chɨi vae kotɨ iñeenguru vae reta, omboepɨ ipɨakatu reve iñotɨ.
50Menelao, imbaepuere vae reta imbaepota rai ramo, jekuaeño oiko mbaravɨkɨ pe, taɨkue rupi ikaviä ete ma ramo, oyemboyovaicho jese opaete jëtaɨgua reta.
Who We AreWhat We EelieveWhat We Do
2025 by iamachristian.org,Inc All rights reserved.
