JOSUÉ 23 - Guarani Bible with DC

Josué omboarakuaa Israel iñemuña reta

1Ɨma ma yandeYa omee yogüɨreko pɨagüive Israel iñemuña reta opaete jovaicho iyɨvɨrigua reta güi yave, jare Josué indechi yae ma yave,

2oenɨi opaete Israel iñemuña itenondegua reta, jare mburuvicha reta, oporojäa vae reta, jare opaete ïru mburuvicha reta, jei chupe reta:

“Che chendechi yae ma ko.

3Jare pe reta peecha opaete kërai yandeYa Tumpa omoamɨri peve opaete kuae tëtaguasu reta vae; echa yandeYa Tumpa ko oñeraro perekovia pe.

4Che amboyao ma peñemuña reta peguarä opaete kuae tëtaguasu reta suerte rupi, ɨ̈aka Jordán güive Ɨguasu Mediterráneo jee vae kotɨ, kuaraɨ oikea kotɨ; opaete kuae tëtaguasu reta oñepɨ̈rogüe, jaeramiño vi opaete ndeiño oñepɨ̈ro vae reta.

5YandeYa Tumpa oekɨta omombo reta perenonde güi; jare pe reta peiketa penoi vaerä iɨvɨ reta, yandeYa Tumpa jei peve rami.

6Peñemoäta ngatu peyapo vaerä opaete Moisés iporookuai reta kuae tupapire pe oyekuatía oï vae, pepiambae reve chugüi ketɨ ave yepe;

7agüɨye vaerä peyea kuae tëtaguasu reta opɨta pepɨte pe vae ndive, agüɨye peenɨi itumpa reta jare agüɨye mbae peiporu jare peyapo itumpa reta jee re, agüɨye peyeokuai chupe, agüɨye ave peyetavatɨka jae reta jóvai.

8Ërei yandeYa Tumpa jupieño peguata, peyapo ma peyu peiko rami.

9Echa yandeYa oekɨ omombo perenonde güi tëtaguasu tuichagüe reta jare imbaepuere yae vae reta, jare mbaetɨño kia ipuere peré oñeraro pe reta ndive yave añave regua.

10Metei kuimbae vaeño pegüi reta ombosɨita mil kuimbae,Dt 32.30. echa yandeYa Tumpa ko oñeraro perekovia pe, jae jei peve rami.Dt 3.22.

11Peyeandu reve kavi peñeñovatu, peaɨu yandeYa Tumpa.

12Echa pesɨrɨ jare peñemoïru kuae tëtaguasu reta, pepɨte pe jembɨregüe reta ndive yave, menda rupi peyea yave jae reta ndive, jare jae reta oyea pe reta ndive yave,

13peikuaa voi, yandeYa ngaraa ye ma oekɨ güɨnoe omombo perenonde güi kuae tëtaguasu reta, yogüɨreko retata peve ñuai rami, pepɨ̈sa-yeyuka rami jese reta vaerä, yogüɨreko retata chikote rami peve, yogüɨreko retata peve ñurati rami peresa peguarä, opa regua pekañɨtei kuae ɨvɨ kavi yandeYa Tumpa omee peve vae güi.

14Mase, che amanota ma ko; añave, pemaendúa kavi opaete pepɨa ndive jare opaete perekove ndive, kërai mbaetɨ oata metei ave ñee kavi yandeYa Tumpa jei pekotɨ vae; opaete oyembopo peve, mbaetɨ oata metei ave.

15Ërei opaete ñee kavi reta yandeYa Tumpa jei peve vae oyembopo rami, jökorai vi yandeYa güeruta peré opaete ñee kavimbae, opa regua pemokañɨtei kuae ɨvɨ kavi jae omee peve vae iárambo güi,

16perokomegua yave yandeYa Tumpa iporogüɨrökuavee päve rupi peokuai vae, peo jare pemboete yave tumpa ambuae reta, jare peyetavatɨka yave jae reta jóvai. Jayave yandeYa iyarasɨta pekotɨ, jare ɨmambae pekañɨteita kuae ɨvɨ kavi jae omee peve vae güi.”