JONÁS 4 - Guarani Bible with DC

Jonás iyarasɨ

1Ërei Jonás pe mbaetɨ etei ipöra kuae jare iyarasɨ yae.

2Jare oyerure Tumpa pe körai:

—Añave, cheYa Tumpa aikuaa voi ko kuae, cheɨvɨ pe vɨteri aï yave. Jáeramo ko atekuarai Tarsis kotɨ; echa aikuaa nde ko jae Tumpa ipɨaguasu yae vae, mbaetɨ iyarasɨ voi vae,Ex 34.6. jare iporoparareko yae ete vae, jare reipoepɨ ndeyemongeta ikavimbae reyapota tëi vae.

3Añave cheYa romoñera reekɨ vaerä chegüi cherekove; echa, mano ikavi yaeta cheve tekove güi.

4Ërei yandeYa jei chupe:

—¿Jupi pa ko ndearasɨ yae vaerä?

5Jare Jonás ou tëta guasu güi, jare oyembojeyupa tëta guasu güi kuaraɨ oëa kotɨ, jare joko pe oyapo iyeupe metei küaraɨa, jare oguapɨ igüɨ pe, joko pe oäro maratuta ra tëta guasu pe vae.

6Jare yandeYa Tumpa omojeñɨiuka metei andai, kuae okuakuaa Jonás iküaraɨa iárambo, omoküaraɨa vaerä, jökorai omboasa vaerä iyarasɨ chugüi; jare Jonás oyerovia yae jókuae andai rokɨ re.

7Ërei pɨareve köe jembipe ma ou yave Tumpa ombou metei taso, kuae jou andai japo jare opa ipiru.

8Jare kuaraɨ oë ma ou yave, Tumpa ombou ɨvɨtuakuvo täta yae vae, jare kuaraɨ omombaerasɨ Jonás iñäka pe, oyuka seri, jare oipotaecha omano, jei körai:

—Ikavi ndipo amano, aikove aiko vae güi.

9Jayave Tumpa jei Jonás pe:

—¿Ndearasɨ yae pa andai rokɨ re?

Jare Jonás jei:

—¡Chearasɨ yae, aipotaecha amano chearasɨ güi!

10Jare yandeYa jei:

—Nde reiparareko andai rokɨ, mbaetɨ reve reparavɨkɨ jese, ndeä vi rembokuakuaa; metei pɨ̈tu pe oë, jare ïru pɨ̈tu pe omano.

11Jare che, ¿aiparareko potaa pa Nínive jókuae tëta guasu tuicha yae vae, joko pe oime oasa ciento veinte mil michia reta mbaetɨ vɨteri oikuaa ikavi vae jare ikavimbae vae jare jeta mɨmba reta?