ECLESIÁSTICO 33 - Guarani Bible with DC

1Kia Tumpa omboete vae ngaraa maratu oiko;

yepe Tumpa ojäata mbae rupi, omboasa yeta ko.

2Kia ñavo mborookuai omotareɨ vae ngaraaí iyarakuaa,

mbae ɨ rupi oguata vae ɨvɨtuai omokana ramita ko.

3Iyarakuaa vae oikuaa kavi Tumpa iñee,

jare omae mborookuai re jare omae mborookuai yemboe ikɨambae rami.

4Eñono kavi mbae reyapota vae ndei reyapo mbove,

eñono kavi o ndei reiko pɨpe mbove.

5Yarakuaambae iyemongeta metei käretou iruera rami ko;

iyemongeta oyere yere avei.

6Metei ñochëi iporogüɨröɨro vae, kavayu imbokere vae rami ko;

oipotagüe jese ñavo oñee tai ko.

Tumpa oporoangareko

7¿Maera ra ara reta oyoavɨ avei oyougüi,

yepe tëi kuaraɨ iäñoi jembipe?

8YandeYa iyarakuaa pe ko jökorai oyapo;

jae ko oñono opaete mbae iara pe kavi kavi.

9Amogüe ara jae oñono tee mbaemboete peguarä,

ïru ara reta oeya jökoraiño.

10Opaete kuimbae reta ko ɨvɨ katuaiño;

Adán ɨvɨkúi güi oyeapo.

11Ërei Tumpa, iyarakuaa rupi, omokañɨmbaa

jare jei oimeta mbovɨ reta japerä.

12Amogüe oñono tee jare omee chupe jeta mbaembae reta,

ani ramo ombokavi oyemboya vaerä ikotɨ;

jare ïru vae reta re oyepopeyu

jare omomichi jare güɨrosɨrɨ jókuae güi.

13Tuyuapo mbae iyapoa ipo pe oï rami,

ipuere vaerä oyapo jae oikuaa rupi,

jökorai ko kuimbae iYapoa ipo pe,

oechauka chupe metei tenda jae oïa pe.

14Ikavimbae jóvai oï ikavi vae,

tekove jóvai oï mano;

jeko kavi vae jóvai oï, jekopochɨ vae,

tembipe jóvai oï pɨtumimbi.

15Emae opaete mbaembae reta Tumpa oyapogüe:

Mókoi mókoi ñogüɨnoi, oyóvai yóvai oï.

16Yepe che taɨkue rupi ete ma ayemoambeko aiko kuae yemboe re vae,

kia ombaepoo vae reta jaɨkue ombaepoo oiko vae rami,

17Tumpa iporomborɨ rupi chepuere amboyekuaa

jare aupi vi che aarɨvogüe.

18Pemae mbaetɨ ko cheyeupeguarä aeño aparavɨkɨ,

jaeño ma opaete arakuaa oeka vae reta pegua ko.

19Peyeapɨsaka, kavi, tëta guasu ruvicha oiko vae reta;

tëta ruvicha reta, peyeapɨsaka kavi.

Kërai yayangareko vaerä tëtara reta re jare tembiau reta re

20Nderaɨ pe ave nderembireko pe ave nechëi pe ave ndeɨpɨ pegua pe ave

agüɨye emee mbaepuere ndeyegua.

21Reikove jare nepɨ̈túe rei ramboeve

agüɨye emaeño kia jae jeigüe toyapo ndeve.

Agüɨye emee ïru vae pe mbae renoigüe,

echa reyembopɨapotaä ko jare reiporu yeta ko ikavi vae chupe.

22Ikavi ko nderaɨ reta oiporu vaerä ndeve

jese reta ma reiko vaerä.

23Opaete mbae reyapo vae rupi toiko nde reregüe,

jare agüɨye emaeño nderé kavi toyemongɨa.

24Nderekove michiño ma oiko vae ojo ma oväe iyapɨ pe yave

jare remanota ko, opa emboyao yao mbae renoigüe.

25Mburika pe, kapii, ɨvɨra jare voita;

tembiau pe, tembíu yembosɨmbi jare mbaravɨkɨ.

26Emee mbaravɨkɨ nderembiau pe, agüɨye vaerä oeka mbutuu;

echa iñäka omopüa yave, opüata ko nderé.

27Yuvo jare iyuru pegua iïcha pe ko mɨmba yarova,

jare ñenupa tätagüe ndive ko tembiau jekoasɨ vae.

28Emombaravɨkɨ nderembiau, agüɨye vaerä oikoiño,

echa mbae yayapombae jeta ko güeru ikavimbae.

29Emombaravɨkɨ jae chupegua vae pe;

jaema ndereroviaä yave, eñono karena ipɨ reta re.

30Ërei agüɨye oasa ete eyapo mbae,

jare agüɨye mbae eyapouka jupimbae reve.

31Oime renoi meteiño tembiau yave eyangareko jese ndeyé reyangareko rami,

echa tugüɨ pe ko regua.

32Oime renoi meteiño tembiau yave, eyangareko jese nderɨvɨ vae rami,

echa oatata ndeve nde ae rami.

33Reyuvanga jese yave, ojota ko ndegüi,

¿jaema kerupi ya reota reeka?