ÉXODO 10 - Guarani Bible with DC

Tuku reta regua

1YandeYa jei Moisés pe:

—Ekua Faraón oïa pe; echa che amotäta ipɨa jare jembiokuai reta ipɨa, aechauka vaerä jese reta kuae mɨakañɨ ayapo vae reta,

2jare nde nemiari vaerä nderaɨ reta pe, nerɨmɨmino reta pe mbaembae reta ayapo Egipto pe vae, mɨakañɨ ayapo jese reta vae; peikuaa vaerä che ko jae peYa vae.

3Jayave Moisés jare Aarón yogüɨraja Faraón pɨri, jare jei reta chupe:

—OreYa, hebreo reta iTumpa jei körai: “¿Kërai yave regua pa mbaetɨta reñemomichi cheróvai? Emaeño toyogüɨraja tëta chembae, chemboete vaerä;

4jare mbaetɨñoi reipota remondo reta yave, pɨareve ambouta ndeɨvɨ re jetagüe tuku,

5kuae tuku reta opaeteita ombopɨtumimbi ɨvɨ, ngaraa etei oyekuaa ɨvɨ; kuae reta jouta peremitɨ amandau oyukapambae, jökorai vi jouta opaete ñana rupi temitɨ ia vae.

6Jare omotɨnɨeta ndero reta jare opaete nderembiokuai reta jo, jare opaete Egiptoɨgua reta jo. ¡Nderu reta jare neramɨi reta ave mbaetɨ oecha kuae ɨvɨ pe yogüɨrekoɨpɨ güive vae!”

Opa körai jei yave, oyerova ye ojo Faraón jóvai güi.

7Jayave Faraón jembiokuai reta jei:

—¿Kërai yave pa ikueraita yandembosusere kuae kuimbae? Emaeño mo toyogüɨraja kuae kuimbae reta omboete vaerä iYa Tumpa. ¿Mbaetɨ pa reikuaa Egipto opa ma ko oyemboai oï vae?

8Faraón jekuae omondo ye oenɨiuka Moisés jare Aarón, jare jei chupe reta:

—Pekua pemboete peYa Tumpa. Ërei ere cheve: ¿Kia kia pa jae yogüɨrajata vae?

9Moisés jei chupe:

—Rojota oremichia reta ndive, ndechi reta ndive, oreraɨ reta jare orerayɨ reta ndive, orevecha reta jare oreguaka reta ndive; echa orearete tuicha yae vae ko oreYa peguarä.

10Ërei Faraón jei chupe reta:

—¡Ikañɨmaa peyemongeta ikavimbae ko vae! ¿Perovia pa yandeYa pemborɨta jare che amaeñota peo pemichia reta ndive?

11Ngaraa ko jökorai. Pe okuakuaa vae retaño pekua pemboete peYa, echa kuae ko pe reta peipota vae.

Jare Faraón güɨnoeuka omondo reta jae oïa güi.

12Jayave yandeYa jei Moisés pe:

—Emopüa ndepopoka ɨvɨ Egipto re, ou vaerä tuku reta opaete tëta guasu Egipto re, opa vaerä jou opaete amandau oyukapambae.

13Jare güɨropövee Moisés ipopoka ɨvɨ Egipto re, jare yandeYa güeru ɨvɨtu tëta guasu re kuaraɨ oëa kotɨ güi opaete jókuae ara jare jókuae pɨ̈tu; jare köe ma ou yave jókuae ɨvɨtu güeru tuku.

14Jare ou jetagüe tuku ɨvɨ Egipto re; opaetei oñemoai tëta guasu Egipto rupi,Ap 9.2-3. jeta yeyé mbaetɨi jökorai ou arakae jare ngaraai ou ye jökorai kuri;

15omotɨnɨe opaetei tëta guasu, ombopɨtumimbi ɨvɨ; jare opaetei ñana jou, opaetei ɨvɨra reta iagüe amandau oyukapambae; mbaetɨ etei opɨta mbae jovɨ vae ɨvɨra re ani ñana rupi opaete ɨvɨ Egipto pe.

16Jayave Faraón jaɨai oenɨiuka Moisés jare Aarón, jare jei chupe reta:

—Cheyoa peYa Tumpa kotɨ, jare pekotɨ.

17Ërei pomoñera peɨ̈ro ye vaerä chembaeyoa re cheve añave yepe, jare peyerure peYa Tumpa pe ombosɨrɨ vaerä chegüi kuae mbae pɨ̈chɨi yae vae.

18Jare Moisés oë Faraón jóvai güi, jare oyerure yandeYa pe.

19Jayave yandeYa güeru ɨvɨtu tätagüe kuaraɨ oikea kotɨ güi, jare opa güɨraja tuku oitɨ Ɨguasu Pɨ̈ta vae pe; mbaetɨ opɨta metei ave tuku opaete tëta guasu Egipto pe.

20Ërei yandeYa omotäta Faraón ipɨa, jare jae mbaetɨ omaeño yogüɨraja Israel iñemuña reta.

Pɨtumimbi regua

21YandeYa jei Moisés pe:

—Emopüa ndepo ara kotɨ ou vaerä pɨtumimbi opaete ɨvɨ Egipto re, tipɨtumimbi yeyé opaete vae oyandu etei vaerä.

22Jare Moisés omopüa ipo ara kotɨ, jare ou pɨtumimbi yeyé vaeSal 105.28; Ap 16.10. mboapɨ ara rupi, opaete ɨvɨ Egipto rupi.

23Mbaetɨ kia ave ipuere oecha japicha, jare mbaetɨ kia ave oë oïa güi mboapɨ ara rupi; ërei opaete Israel iñemuña reta güɨnoi tembipe jo rupi.

24Jayave Faraón oenɨiuka Moisés, jare jei chupe:

—Pekua pemboete peYa; ërei peeyaño pevecha reta jare peguaka reta, jare peraja perupíe opaete pemichia reta.

25Jare Moisés jei chupe:

—Nde remeeta vi ko oreve mɨmba oyeyuka vaerä jare mɨmba oyeyukagüe opaetei oyeapɨ vaerä vae, orepuere vaerä royuka romee oreYa Tumpa pe.

26Orerɨmba reta rogüɨrajata vi ko orerupíe, ngaraa metei ipɨ̈sa ave opɨta; echa chugüi reta roipɨɨta romee oreYa Tumpa pe, jare mbaetɨño roikuaa mbae pe romboeteta oreYa rojo ma roväe yave.

27Ërei yandeYa omotäta Faraón ipɨa, jare mbaetɨ omaeño yogüɨraja.

28Jayave Faraón jei chupe:

—Esɨrɨ chegüi; eyeandu jare agüɨye mo eyu cheróvai, echa oipotagüe ara rupi reyu ye cheróvai yave remanota.

29Jare Moisés jei:

—Ikavi kuae rere vae; ngaraa ye ma aecha nderova.