PROVERBIOS 28 - Guarani Bible with DC

1Iyoa vae otekuarai mbaetɨ tëi reve kia oaɨkuemoña,

ërei jupi vae oiko okɨɨyembae reve yaguapope rami.

2Metei tëtaguasu pe mbaetɨ teko ikavi yave, jeta mburuvicha reta jeko kavimbae,

ërei mburuvicha yarakuaa katu vae oikatu güɨroata kavi tëtaguasu.

3Kuimbae paravete jare jeko kavimbae omaeñomi yave paravete vae güi,

okɨrai yave opaetei güɨrokomegua oeya mbaagüɨye rami ko.

4Tumpa iporookuai güi oyembosɨrɨ vae reta omboete iyoa vae reta,

ërei mborookuai oyapo vae reta oyoaka jókuae reta ndive.

5Kuimbae jeko kavimbae reta mbaetɨ etei oikuaa ikavi vae regua,

ërei yandeYa reño oyeko vae reta oikuaa opaete mbaembae.

6Ikaviño ko paravete reve jupi rupi oiko vae,

ipɨapochɨ vae jare oikokatu yae vae güi.

7Tumpa iporookuai oyapo vae, yarakuaa katu ko,

ërei ikause vae reta ndive oñemoïru vae omomarai ko tu.

8Mbae re oasa ete okovara vae rupi oyemboikokatu vae,

omboatɨ ko, jókuae paravete vae re iporoparareko vae peguarä.

9Tumpa iporookuai mbaetɨ oipota oendu vae,

Tumpa güɨröɨrota vi chugüi iyerure.

10Jupi rupi oiko vae pe oyavɨuka vae, jae yeño ko oata pɨpe;

ërei jupi vae reta yogüɨreko kavita.

11Kuimbae oikokatu vae, yarakuaa yae ko omae iyé;

ërei paravete reve yarakuaa katu vae, oikuaa chugüi kërai ko jae vae.

12Jupi vae reta oyerovia yave, tuichagüe ko yerovia,

ërei jupimbae reta oñemopüa yave, oñemi opaete vae reta.

13Ngaraa oiko kavi, imbaeyoa reta oikuaku vae,

ërei oyemombeu vae jare oeya ete iyoa vae, oikota mboroparareko rupi.

14Oyerovia ko Tumpa güiño oipoɨu avei vae,

ërei ipɨa omotäta vae, oata ikavimbae pe.

15Yaguapope oñee mbae oeka ani oso yɨmbɨaɨ yae oï vae rami,

jökorai ko mburuvicha jupimbae oï metei tëta paravete vae juvicharä yave.

16Mburuvicha yarakuaambae, ombojeiete mbae ikavimbae jasɨ katu vae,

ërei mbaetɨ imbaepotarai vae oiko pukuta.

17Kuimbae oyuka japicha vae, omanota ko,

¡ngaraa kia oepɨ!

18Jupi rupi oiko vae, oasayepeta,

ërei ipɨapochɨ vae, oata ikavimbae pe.

19Iko pe oparavɨkɨ vae, yangapɨɨta tembíu re,

ërei iparavɨkɨsembae jeko omomoe vae, paraveteta ko.

20Kuimbae mbaetɨ teko oñeväe jese vae, oikota mborerekua rupi;

ërei oipota jarembae pegua oyemboikokatu vae, ngaraa opɨta jekombae.

21Yayoparavoño yayoparareko vae mbaetɨ ko ikavi;

metei mbɨyape jaɨgüe re ave, ipuere ko yandeyoa.

22Imbaepotarai vae, oipota jarembae pegua oyemboikokatu,

ërei mbaetɨ oikuaa oikota ko mbaravete rupi vae.

23Japicha pe omboeta mbae re vae, taɨkue rupi imboetea yae ko,

jókuae iñee yeaeä raanga vae güi.

24Tu güi ani ichɨ güi omaeñomi vae jei yave: “Mbaeyoaä ko kuae”,

jókuae nunga, oporoyuka vae iñeïru ko.

25Ipɨarai yae vae, oporomoñerarouka katu ko,

ërei yandeYa reño oyeko vae, oiko kavita.

26Oyererovia katu omae iyé vae, mbaetɨ ko yarakuaa,

ërei yarakuaa katu reve oiko vae, oasayepeta.

27Paravete vae omborɨ vae pe, ngaraa mbae oata,

ërei mbaetɨ oipota oporomborɨ vae kotɨ, jeta yaeta oyepopeyu vae.

28Jupimbae reta oñemopüa yave, kuimbae reta opa oñemi;

ërei opa okañɨtei reta yave, jupi vae r eta oñemuña.