PROVERBIOS 1 - Guarani Bible with DC

Maera ko ñee yemboarakuaa pegua reta oime vae

1Salomón, David taɨ iñee reta arakuaa katu pegua,

jare yaikuaa vaerä yemongeta ikavigüe.

3Yamboresive vaerä yemboarakuaa yeandu katu regua,

yembojupi, yembosɨmbi jare yae yaeiñombae vae regua.

4Yemboarakuaa mbaetɨ arakuaa güɨnoi vae pe,

taɨrusu vae reta pe oñemee vaerä arakuaa katu jare yemongeta kavi.

5Yarakuaa katu vae oenduta,

jare oñemoïru yé chupe iyarakuaa katu,

yarakuaa katu vae omoïru iyarakuaa katu.

6Yaikuaa vaerä ñee arakuaa pegua reta yarakuaa vae reta güi,

ñee reta mbae re ombojaanga vae,

yaikuaa vaerä mbae oipota jei vae.

7Arakuaa katu jae ko yandeYa güi yaipoɨu vae;

iyarakuaambae reta güɨröɨro arakuaa katu jare mboromboe.

Yemboarakuaa taɨrusu reta peguarä

8Cheraɨ, eendu nderu iporomboe,

agüɨye eröɨro ndesɨ iporomboarakuaa,

9echa ndeve ikavi yae vaerä ko:

Ipöra yaeta mboɨ rami ndeayu re,

ani äka-regua rami neäka re.

10Cheraɨ, iyoa vae reta oipota ndembotavɨ yave,

¡agüɨye emborɨ katu!

11Jei yave ndeve reta: “Eyu ore ndive;

yaeka kërai yaporoyuka vaerä,

ñaipïaro jekombae.

12Kuimbae jeko kavi vae ñamókoi jekove reveño,

omanogüe jokoreve tɨvɨa pe oyemondo rami.

13Ñanoita oipotagüe mbaeyekou,

¡ñamotɨnɨe yandero opaete mbaembae ñapɨ̈rogüe pe!

14Eyu emboyao ndesuerte ore ndive;

metei rami ñanoi yandembaembae.”

15¡Cheraɨ, agüɨye emomoe jae reta jape!

Eyembosɨrɨ jae reta jeko kavimbae güi,

16echa osɨi katu oyapo reta ikavimbae; yogüɨraja vaerä oporoyuka jarembae voi.

17Echa oñemoataiñota ma ko ñuai

güɨra reta jovake,

18ërei jókuae kuimbae reta iyeupe aeño oñono ñuai,

jekove aeño omoëgua reta mano pe.

19Jökorai ko iyapɨ imbaepotarai vae reta:

Imbaepotarai jeko pegua omano.

Arakuaa katu iparea

20Oka guasu reta rupi jare kaye reta rupi

arakuaa osapúkai.

21Osapúkai jeta vae oyemboatɨa rupi,

tëta guasu jöke retaPr 8.1-3. rupi, jei:

22“Pe, yarakuaambae reta,

peporoyóyai yóyai vae reta,

¿kërai yave regua pa peröɨrota arakuaa katu?

¿Kërai yave regua pa peporoyóyai yoyaita?

23Peyeapɨsaka cheporombosɨmbi re,

jare che ameeta peve chearakuaa katu,

jare aikuaaukata peve cheñee reta.

24Che poenɨi tëi, ërei mbaetɨ peipota peendu,

aparea tëi peve, ërei mbaetɨ peyu.

25Peröɨroño opaete cheporomboarakuaa;

mbaetɨ peipota cheporombosɨmbi ave.

26¡Jáeramo che apukata vi peré, oväe ma mbaesusere peve yave!

¡Poyóyai yoyaita, ou ma peve pekɨɨye yae chugüi vae yave,

27ou ma yave peve kɨɨye jare susere,

tembiporara jare mbɨatɨtɨ,

metei kusumirou opaetei oporomboai rami!

28Jókuae ara chereenɨita, ërei ngaraa aendu peve;

chereeka tëita, ërei ngaraa cheväe chupe;

29echa arakuaa peröɨro,

jare mbaetɨ peipota peipoɨu che peYa güi.

30Mbaetɨ peipota peendu cheporomboarakuaa;

peröɨro cheporombosɨmbi.

31¡Ërei peiporarata ko jókuae pereko re!

¡Peyombogüeraita peyemongeta reta ikavimbae pe!

32Mbaetɨ arakuaa güɨnoi vae reta omanota opia jeko pegua,

yarakuaambae reta oñemokañɨteiukata imbaeyekou pe;

33ërei oyeapɨsaka cheré vae, oikota oipoɨumbae reve,

oiko pɨagüiveta, okɨɨyembae reve ikavimbae güi.”