TOBIT 2 - Guarani Bible with DC

Tobit jesaa ma opɨta

1Oï güire Asarhadón mburuvicha guasurä, ayu ye cherëta pe jare omee reta ye cheve cherembireko Ana jare cheraɨ Tobías, jare metei ara Pentecostés romboarete roï yave (jaeño vi ko oyeero “semana iyarete pe”). Oyapo reta yepe cheve tembíu ikavigüe vae, jare aja aguapɨ mesa pe.

2Oñono kavi reta mesa jare güeru reta tembíu cheve ikavigüe vae. Jaema jae cheraɨ Tobías pe:

—Cheraɨ, ekua eka Israel-ɨgua reta tembiokuairä yogüeru Nínive pe vae, ipɨa reve jaekavi oiko Tumpa kotɨ vae, jare paravete oiko vae, ere chupe toyogüeru tokaru yande ndive. Toroäro, cheraɨ, reyu regua.

3Jaema Tobías ojo oeka Israel-ɨgua reta paravete oiko vae, ërei jarembaeño ou ye jare chereeni.

—¿Maratu yera, cheraɨ? —jae chupe.

—¡Taita! —jei cheve—, ¡oime metei Israel-ɨgua oyeyuka vae oï okavɨte pe, oyuka ramo etei vae!

4Jare che ajäa etei jókuae tembíu reta. Jarembae pegua aja aväe okavɨte pe, jare araja joko güi jókuae tëogüe, araja añono metei o pe, jaema pɨ̈tu yave araja añotɨ.

5Ayu ye cherëta pe, jare opa ayau kavi jaema aguapɨ akaru chepɨatɨtɨ reve.

6Jare jayave chemaendúa ñeemombeúa Amós Betel kotɨ jeigüe vae re: “Arete aipoepɨta yaeo pe, jare yemongoi mbɨatɨtɨ pe.” Jaema apoko ayaeo.

7Ojo pɨ̈tu yave, aja ayoo ɨvɨkua jaema añotɨ omano vae.

8Cherëta ipɨ pegua reta cheyóyai jare jei reta cheve: “Oasa vae ara pe kuae jeko pegua ko oeka reta güɨreko oyuka vaerä, ërei osɨi; ¡jare mbaetɨ okɨɨye no! ¡Joko jekuae ma tëogüe oñotɨ ye oï! ¡Jei reta cheve!”

9Jókuae pɨ̈tu ayau kavi, jare aë chero güi aja ayapakua ovapetea iyɨ́vɨri cheäka anoe reve ikatu pe jare mbaetɨ añeäka-soi echa täta jakuvo.

10Mbaetɨ aikuaa oime ko oï ovapetea, iárambo, metei güɨra, jaema omaña cheresa pe etei, jare jaku yae jaema cheresa jäve apɨta vaerä. Aja añepoanouka oporopoano vae reta pe, ërei jeta oñono reta cheresa pe yave; jeiete cheresaä aja aiko, jare aja cheresaä apɨta. Irundɨ año amaeä etei aiko. Jare opaete cherëtara reta pe täta jasɨ jökorai aiko vae. Jare Ajicar mókoi año oyangareko oiko cheré, jare ojoi Elimaida kotɨ chegüi.

Tobit iporomboete

11Opaete jókuae ara reta rupi, cherembireko Ana oparavɨkɨ ma oiko oipotagüe kuña jembiapo pe.

12Jaema jae omondo mbaravɨkɨ iya pe, jare omboepɨ chupe. Metei ara, chiu yasɨ ma Distro pe yave, opa oyapo jembiapo jare omondo mbaravɨkɨ iya reta pe. Jaema jae reta opa omboepɨ chupe jare omee reta chupe metei kavara raɨ rou vaerä.

13Jare ou oväe ore reta pe yave, jókuae kavara raɨ opoko oñee. Jaema che aenɨi aparandu chupe:

—¿Ketɨ güi pa oë aipoa kavara raɨ?, ani ¿reñomi? Eraja ye eeya iya reta pe, echa ngaraa ikavi yau vaerä mbae oñeomigüe.

14Jaema jae jei cheve:

—Pe pe ko chembopota reta pɨpe omboepɨ cheve vae iárambo.

Che mbaetɨ arovia, jekuaeño jae chupe güɨraja ye vaerä oeya iya pe. Täta chemara cheapo oï jókuae oyapogüe. Jaema jei ye cheve:

—¡Kuae pe ojo iyapɨ ndeporoparareko! ¡Jökorai ojo iyapɨ ndeparavɨkɨ kavi! ¡Jaema añave reikuaa reï kërai reï vae!