SALMOS 140 - Guarani Bible with DC

SALMO 140Yerure yandeangareko pegua

1CheYa Tumpa, chereepɨ kuimbae jeko pochɨ vae güi;

cheövatu kuimbae ipɨarai vae reta güi.

2Echa jae reta oyemongeta ipɨa pe ikavimbae re;

oporomoñerarouka avei reta.

3Oimbee reta ikü mboi rami;

jare mboi imbayachi oime iyuru pe.

4CheYa Tumpa, cheövatu jupimbae reta imbaepuere güi,

chereepɨ ipɨarai vae reta güi,

oyemongeta chererokomegua vaerä vae reta güi.

5Ipɨayemboete vae reta oñono ñuai cheraperä pe,

tɨmasa jare pɨsa ñuai oñono reta tape rupi cheregua.

6YandeYa pe jae: “Nde ko jae cheTumpa;

cheYa Tumpa, ¡eyeapɨsaka romoñera vae re!

7CheYa Tumpa, chereroasayepe vae imbaepuere yae vae,

nde reyangareko cheäka re ñeraroa pe.”

8CheYa Tumpa, agüɨye emee iyoa vae pe ipɨa jemimbota;

agüɨye emaeño toë kavi chupe iyemongeta reta,

agüɨye vaerä oyembotuicha.

9Opaete oyere cheré vae reta,

¡iñee ikavimbae aeño, toiporara reta!

10Toa jese reta tätapɨi jendɨ vae,

toyemombouka reta tata pe,

ɨvɨkua guasu pe, mbaetɨta ma oë vae güi.

11Kuimbae iñee kavimbae vae,

ngaraa oiko kavi ɨvɨ pe;

jupimbae oñemokañɨteiukata ikavimbae pe.

12Aikuaa yandeYa oyapota jupi vae oiporara vae pe,

jare mbae oata chupe vae pe.

13Añetete, jupi vae reta omeeta mbaemboete ndeve,

isɨmbi rupi yogüɨreko vae reta, yogüɨrekota nderóvai.